युहन्ना 20 - पुर्वीय मगरमर्ल्याङ चीहान ( मत्ती २८:१-८ ; मर्कूस १६:१-८ ; लुका २४:१-१२ ) 1 हप्टौ पहीलो डीन आइतबार गोराक न झीसमीसाङ मरीयम मग्डलीनी येशूओ लास डाच चीहानाङ नुङा। होला टान्हाङ चीहानौ मेङेर हुप्च ल्हुङ चीहानीङ सारीम डाच डाङा। 2 याङ्च डाङार मरीयम ल्हेसार खेर्चै सीमोन पत्रुस र येशूये माया जाट्च चेला लेठाङ नुङार डेया, “होखुरीकै प्रभुओ लासकी चीहान लकीङ डोनार आल्ल्हेसा! र होसकोकी कुला डामने, होसे कानकी थाहा माले।” 3 टब पत्रुस र होसे अर्को चेला चीहान पट्टी नुङा। 4 होखुरीक नीस जना काठोवाङ न खेरा, टर अर्को चेला चहीँ पत्रुसकी रीटार चीहानाङ अगाडी टाहा। 5 अनी चीहान भीत्री घुकुरुक छानार ङोस्नाङ होचे लासकी बेर्हडीच लाइलनौ बढीनको मट्टै डाङा, टर होसे भीत्री चहीँ मापर्या। 6 होटै न्हुइङ राछ सीमोन पत्रुस चहीँ सरासर चीहानाङ नुङार भीत्री पर्या। होचे र लासकी बेर्हडीच लाइलनौ बढीनको मट्टै डाङा। 7 येशूओ मीटाहा छ्याक्च बढीन चहीँ लाइलनौ बढीनको खाटा मालेया, होसे अलगै पीपार डामन्या। 8 टब चीहानाङ अगाडी टार्हाछ चेलै र चीहान भीत्री पर्यार ङोसा। होटै इसे पट्ट न कुराको डाङार होचे येशू साँच्ची न जीवाम सोलेसा डेयार विश्वास जाटा। 9 (होखुरीकै येशू सीचलकीङ जीवाम सोकी न पर्ले डेम धर्मशास्त्राङ रीक्च बचन चाँहासम्म माबुझडीस्नन्या।) 10 होटै होसे नीस जना चेलाको लहो इमाङ ल्हेसा। येशू मरीयम मग्डलीनीखाटा भेट छान्च ( मत्ती २८:९-१० ; मर्कूस १६:९-११ ) 11 टर मरीयम चहीँ चीहान बाहीर राप्चै टोङ्ह ङुमन्या। अनी होसे राप्चै घुकुरुक छानार चीहान भीत्री ङोसा। 12 होला बोच बढीन बील्छ नीस जना स्वर्गदूतकोलाक येशूओ लास डाच ठावाङ काट मीटालु लेच पट्टी र अर्को मीकु लेच पट्टी ङुमङुच डाङा। 13 होसे स्वर्गदूतकै मरीयमकी गीना, “ए मास्टो भर्मी नाको हीजै राप्च?” होचे होखुरीककी डेया, “होखुरीकै ङौ प्रभुकी आल्ल्हेसा, अनी होसकोकी कुला डामने, ङाकी थाहा माले।” 14 इडीक कुरा सेयार मरीयम न्हुङ्लाक ल्हेस्नाङ होला येशूकी टोङ्ह ङुच डाङा। टर होचे येशू न हो डेयार चहीँ माचीन्डीया। 15 येशूये मरीयमकी गीना, “ए मास्टो भर्मी, नाको हीजै राप्म ङुच? नाकै सुकी पामनले?” होचे होसकोकी बगैँचाङ काम जाट्च भर्मी औँला डेम आर्मीटार डेया, “हजुर, नाकै येशूकी इटै आल्न्हने डेनाङ ङाकी डेम यान्ही, नाकै कुला डामने, ङा नुङार होसकुङ लासकी आल्ल्हे।” 16 येशूये होसकी डेया, “मरीयम!” होचे येशूओ सोर सेम खार्लाप्प ल्हेसार होसकोकी हिब्रु भासाङ डेया, “रब्बोनी!” होच्यौ अर्थ “हे गुरुज्यु” हो। 17 येशूये होसकी डेया, “ङाकी घोम माडानी, हीजैडेनाङ ङा चाहाँसम्म बोइ लेठाङ मानुङ्ङने। टर ङौ चेलाको लेठाङ नुङार होखुरीककी डेम यान्ही, ‘ङौ बोइ र नाखुरीकुङ बोइ, ङौ परमेश्वर र नाखुरीकुङ परमेश्वर लेठाङ ङा नुङ्ङन ले।’” 18 टब मरीयम मग्डलीनी चेलाकोलेठाङ खेर्चै नुङा र लहे प्रभुकी डाङ्च र होसकै डेच कुरा पट्ट न सेटाका। येशू चेलाकुङ मीघ्याङ ( मत्ती २८:१६-२० ; मर्कूस १६:१४-१८ ; लुका २४:३६-४९ ) 19 होसनीक हप्तौ पहीलो डीन आइतबार लेया। चेलाको होसे नाबीलाङ काठोव्हाङ जम्मा छानन्या। होखुरीक यहूदी अगुवाकोखाटा बीर्हीयार इम भीत्री गालामाङ आग्ला कार ङुमङुम्या। होडीक न बेला येशू मोसोमायाङ राहार होखुरीकुङ मीघ्याङ टोङ्हार डेया, “नाखुरीककी शान्ति!” 20 येशूये इडीक डेम भ्याच न्हुइङ होसकै लहो मीहुट र कोखा टान्हाका। प्रभुकी डाङार होसे चेलाको साप्फी मार्हाङा। 21 येशूये फेरी होखुरीककी डेया, “नाखुरीककी शान्ति! कुटजाट्न ङाकी ङौ बोये बीर्न्हका, होटजाट्न न अब ङा र नाखुरीककी बीर्न्हकामन ले।” 22 होटै होसकै होखुरीक मीटाक सास म्हुटार डेया, “पवित्र आत्मा लानी। 23 इडीक नाखुरीकै भर्मीकुङ पापको क्षमा जाट्न याहा डेनाङ होखुरीकै पाप लकीङ क्षमा डुप्ले। टर इडीक नाखुरीकै होखुरीकुङ पापको क्षमा जाट्न माय्हा डेनाङ होखुरीकै क्षमा माडुप्ले।” येशू थोमा लेठाङ डाङ्च 24 पहीलो खेप येशू बार्ह जना चेलाको लेठाङ रान्हाङ होखुरीक मढ्युङ काट जना डीडुमस डेच थोमा चहीँ होडीक बेला होखुरीक खाटा मालेया। 25 होटबाटै अरु चेलाकै होसकी, “कानै प्रभुकी डाङा” डेयार सेटाका। टर होचे होखुरीककी डेया, “जब सम्म ङा होसकुङ मीहुटाङ ख्वाछ काँटीकुङ डोब माडाङ्ले, काँटीकुङ डोबाङ ङौ औँला माकाले र ङाल्हौ न मीहुटै होसकुङ कोखाङ माछुले टब सम्म ङा विश्वास माजाट्ले।” 26 काट हप्ता न्हुइङ चेलाको फेरी काट इमाङ जम्मा छाना। इडीक बेला चहीँ थोमा र होखुरीक खाटा न लेया। पट्ट न गालामाङ आग्ला कामन्या टर येशू होखुरीकुङ मीघ्याङ राहार डेया, “नाखुरीककी शान्ति!” 27 टब होसकै थोमाकी लहो मीहुट टान्हाकार डेया, “इला ङोसो, नुओ औँलै ङौ मीहुटकी छुओ र ङौ कोखाङ सुहो! सङ्का माजाटो, टर विश्वास जाटो।” 28 ठोमै येशूकी डेया, “ए ङौ प्रभु, र ङौ परमेश्वर!” 29 टब येशूये थोमाकी डेया, “नीये च ङाकी डाङ्च बाटै विश्वास जाट्च हो, टर होखुरीक कुडीक आसीस डुप्चकोले, ङाकी माडाङ्नाङ र होखुरीकै विश्वास जाट्ले।” इसे कीताबौ उदेश्य 30 इसे कीताबाङ मारीक्च अरु वास्टै अचम्मौ चीन्हको र कामको येशूये चेलाकुङ म्याहासाङ जाटा। 31 टर इला इट डेयार रीक्ङने, होटबाटै येशू न मुक्ति याछ ख्रीष्ट, परमेश्वरौ मीजा हो डेम विश्वास जाट्ख्यौ। र होसकुङ म्यार्मीनाङ विश्वास जाटार सेन्र मासीच जीवन डुप्ख्यौ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.