युहन्ना 17 - पुर्वीय मगरयेशूओ प्रार्थना 1 इसे कुरा डेम भ्याच पछी येशूये स्वर्गपट्टी ङोसार डेया, “ए बोइ, अब समय राम्ह भ्यामने। नाकुङ मीजै नाकुङ महीमा टान्हाक्की य्होक्ख्यौ डेयार होसकी महीमा यान्ही। 2 हीजैडेनाङ नाकै होसकी पट्ट न भर्मीकोमीटाक अधिकार याम्हने, होटबाटै नाकै याछ पट्टकी होचे सेन्र मासीच जीवन याख्यौ। 3 अब सेन्र मासीच जीवन डेच इसे न हो, नाको काट मट्टै सत्य परमेश्वर हो डेम चीन्डीकी, र नाकै बीर्न्हकाच येशू ख्रीष्टकी र चीन्डीकी हो। 4 कुसे काम नाकै ङाकी जीम्मा याहा, होसे काम पुरा जाटार नाकोकी पृथ्वीयाङ ङै महीमीत खास्नने। 5 ए बोइ, संसार सृष्टि छान्की डेनाङ अघी नाकोखाटा लेनाङ ङौ कुसे महीमा लेया, अब होसे न महीमा नाकुङ म्याहासाङ डार ङाकी यान्ही। 6 “संसारलकीङ नाकै ङाकी याछ भर्मीकोलाक ङै नाकोकी चीन्डीयाक्ङ याम्हने। होखुरीक नाकुङ न लेया, अनी नाकै होखुरीक ङाकी याहा, र होखुरीकै नाकुङ बचन मन्डीमने। 7 अनी नाकै ङाकी याछ पट्ट न ठोक नाकोलकीङ न राछ हो डेम अब होखुरीकै बुझडीस्नने। 8 हीजैडेनाङ कुसे बचन नाकै ङाकी याहा, होसे ङै होखुरीककी याम्हने, र होखुरीकै होसे ग्रहण जाट्नने। ङा नाकोलकीङ राछ हो डेच कुरा होखुरीकै साँच्ची न बुझडीस्नने। अनी नाकै ङाकी बीर्न्हकाच हो डेयार होखुरीकै विश्वास जाट्नने। 9 “ङा होखुरीकुङ लागी प्रार्थना जाट्ले। संसाराङ लेचकुङ लागी होइन, टर नाकै ङाकी याछ भर्मीकुङ लागी न ङा प्रार्थना जाट्ले, हीजैडेनाङ होखुरीक नाकुङ न हो। 10 ङाखाटा लेच पट्ट न भर्मीको नाकुङ हो, र नाकोखाटा लेच पट्ट न भर्मीको ङौ हो। अनी होखुरीकलकीङ ङौ महीमा डाङ्ङने। 11 अब ङा नाकोलेठाङ राम्हन ले। ङा इसे संसाराङ माङुले, टर इखुरीक च इसे संसाराङ ङुले। ए पवित्र बोइ, होटबाटै नाको र ङा काट छान्नाङ लेखा न नाकै ङाकी याछको र काट छान्की य्होक्ख्यौ डेम कुसे म्यार्मीन नाकै ङाकी याम्हने, होसे म्यार्मीनौ शक्तिये होखुरीककी जोगडीम डानी। 12 कुसे म्यार्मीन नाकै ङाकी याम्हन्या, ङा होखुरीक खाटा लेनाङ ङै होखुरीककी होसे न म्यार्मीनौ शक्तिये जोगडीयार डा। अनी नास छान्की पर्च भर्मी बाहेक ङै सुकीर नास छान्की माय्हा टर सुरक्छीट डा, होटबाटै धर्मशास्त्राङ रीक्च बचन पुरा छान्की न पर्च लेया। 13 “अब ङा नाकोलेठाङ राम्हन ले। होखुरीक ङौ आनन्दै न्हेप्ख्यौ डेयार ङै इसे कुराको ङा संसाराङ लेनाङ न होखुरीककी डेम याम्हने। 14 ङै होखुरीककी नाकुङ बचन याहा, टर संसारुङ भर्मीकै होखुरीककी घृणा जाटा, हीजैडेनाङ होखुरीक संसारुङ होइन, होटजाट्न न ङा र इसे संसारुङ होइन। 15 नाकै होखुरीककी इसे संसारीङ आल्न्ही डेयार ङा प्रार्थना माजाट्ले, टर नाकै होखुरीककी शैतानलकीङ जोगडीनी डेयार ङा प्रार्थना जाट्ले। 16 कुटजाट्न ङा इसे संसारुङ होइन, होटजाट्न न इखुरीक र इसे संसारुङ होइन। 17 होखुरीककी सत्यताङ पवित्र खास्न यान्ही, हीजैडेनाङ नाकुङ बचन सत्य ले। 18 नाकै ङाकी संसाराङ बीर्न्हकानाङ लेखा न, ङै र होखुरीककी संसाराङ बीर्न्हकामने। 19 होटबाटै होखुरीक र सत्यताङ पवित्र छान्ख्यौ डेयार ङा ङाल्हाकी होखुरीकुङ लागी पवित्र खास्ले। 20 “ङा इखुरीकुङ लागी मट्टै प्रार्थना माजाट्ले, टर इखुरीकै सेटाक्च बचन लकीङ ङामीटाक विश्वास जाट्चकुङ लागी र ङा प्रार्थना जाट्न याल्हे। 21 होखुरीक पट्ट न काट छान्ख्यौ। ए बोइ, कुटजाट्न नाको ङाखाटा ले, र ङा नाकोखाटा ले, होटजाट्न न होखुरीक र कानखाटा काट न छान्ख्यौ, होटबाटै नाकै ङाकी बीर्न्हकाच हो डेयार संसारुङ भर्मीकै विश्वास जाट्ले। 22 कुसे महीमा नाकै ङाकी याम्हने, होसे महीमा ङै होखुरीककी र याम्हने, होटबाटै नाको र ङा काट न हो, होटजाट्न न होखुरीक र काट छान्ख्यौ। 23 ङा होखुरीक खाटा र नाको ङाखाटा ले। होटजाट्न न होखुरीक र काट न छान्की य्होक्ख्यौ। टब नाकै ङाकी संसाराङ बीर्न्हकाच हो, र नाकै ङाकी माया जाट्नाङ लेखा न होखुरीककी र माया जाट्ले डेच कुरा संसारुङ भर्मीकै वार्ल्हे। 24 “ए बोइ, ङा मीमन जाट्ले, नाकै ङाकी याछ भर्मीको जटी ङा कुला छान्ले होला ङाखाटा न छान्ख्यौ, र ङौ महीमा होखुरीकै डाङ्ख्यौ, कुसे महीमा संसारौ सृष्टि छान्की डेनाङ अगाडी लकीङ न नाकै ङाकी माया जाट्च बाटै याम्हन्या। 25 “ए धार्मिक बोइ, संसारुङ भर्मीकै नाकोकी माचीन्डीले, टर ङा नाकोकी चीन्डीले, अनी नाकै ङाकी बीर्न्हकाच हो डेयार ङाकी डुट्चकै वार्ल्हे। 26 नाकै ङाकी जाट्च माया होखुरीक खाटा र ङुख्यौ, अनी ङा होखुरीक खाटा ङुकी य्होकीङ डेयार होखुरीकुङ मीघ्याङ ङै नाकोकी चीन्डीयाका र चीन्डीयाक्ङ न ङुले।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.