युहन्ना 16 - पुर्वीय मगर1 “होटबाटै नाखुरीकै लहो विश्वासकी माडास्ख्यौ डेयार ङै इसे पट्ट न कुराको नाखुरीककी डेच हो। 2 होखुरीकै नाखुरीककी यहूदी सभाङुच इमलकीङ छ्युक्ङ याल्हे। अनी याङ्च समय र राल्हे, जब नाखुरीककी साट्चकै परमेश्वरौ सेवा जाट्न न ले डेम आर्मीट्ले। 3 परमेश्वर बोइकी र ङाकी माचीन्डीच बाटै न भर्मीकै नाखुरीककी इट जाट्च हो। 4 टर इसे कुराको ङै नाखुरीककी डेमने, जब होसे समय राल्हे, टब नाखुरीककी ङै ही डेमन्या होसे नाखुरीकै आर्मीट्ले। पहीला ङै नाखुरीककी इसे कुराको माडेया, हीजैडेनाङ ङा नाखुरीक खाटा न लेया। पवित्र आट्मौ काम 5 “अब चहीँ ङाकी बीर्न्हकाच लेठाङ ङा नुङ्ले, टर ‘नाको कुला नुङ्ङन ले?’ डेयार नाखुरीक सुयेर ङाकी मागीन्ने। 6 ङै इसे पट्ट न कुरा डेच बाटै नाखुरीकुङ मीमन डुखै न्हेप्मने। 7 टर ङा नाखुरीककी सत्य कुरा डेले, ङा नुङ्की न नाखुरीकुङ लागी सेम्ह छान्ले, हीजैडेनाङ ङा मानुङा डेनाङ सल्लाहकार पवित्र आत्मा नाखुरीक लेठाङ मार्हाले। टर ङा नुङा डेनाङ होसकोकी नाखुरीक लेठाङ बीर्न्हकाले। 8 अनी जब होसको राल्हे, टब संसारुङ भर्मीकोलाक पाप, धार्मिकता र परमेश्वरौ न्यायौ बारेयाङ होखुरीक गलट हो डेयार टान्हाक्ङ याल्हे। 9 ङाकी विश्वास माजाट्की न पाप हो, डेच कुरा पवित्र आत्मै होखुरीककी टान्हाक्ङ याल्हे। 10 अनी होसकै परमेश्वरौ अगाडी ही ठीक ले, होसे कुरा टान्हाक्ङ याल्हे, हीजैडेनाङ ङा बोइलेठाङ नुङ्ले, र फेरी नाखुरीकै ङाकी माडाङ्ले। 11 अनी होसकै परमेश्वरौ न्याय ही हो डेच बारेयाङ टान्हाक्ङ याल्हे, हीजैडेनाङ इसे संसारुङ सासक शैतानकी दण्ड आज्ञा छान्न भ्यामने। 12 “ङाखाटा नाखुरीककी डेकी पर्च कुराको च अझै वास्टै ले, टर चाहाँ नाखुरीकै होसे बुझडीस्की माय्होक्ले। 13 जब सत्यौ आत्मा राल्हे टब होसकै न सत्य ही हो होसे कुरा नाखुरीककी बुझडीम याल्हे। होसकै लहो टर्फलकीङ माङाक्ले। होसकै ही सेले, होसे न नाखुरीककी डेले, अनी पीहीन छान्न राछ कुराको र डेम याल्हे। 14 होसकै ङौ महीमा जाट्ले, हीजैडेनाङ होसकै ङा लकीङ ही सेले होसे नाखुरीककी डेम याल्हे। 15 परमेश्वर बोइखाटा लेच पट्ट ठोक ङौ न हो। होटबाटै ङै, ‘आत्मै ङा लकीङ ही सेले होसे नाखुरीककी डेम याल्हे’ डेच हो। चेलाकुङ सोक आनन्दाङ बडलीस्च 16 “कालप बेर न्हुइङ ङाकी फेरी नाखुरीकै माडाङ्ले, अनी कालप बेर न्हुइङ फेरी ङाकी डाङ्ले।” 17 होसकुङ चेलाकै लाहा-लाहाङ डेया, “होसकै ‘कालप बेर न्हुइङ नाखुरीकै ङाकी माडाङ्ले, अनी फेरी कालप बेर न्हुइङ ङाकी डाङ्ले, हीजैडेनाङ ङा बोइ लेठाङ नुङ्ङन ले’ इसे डेच चहीँ ही हो ट?” 18 अनी चेलाकै डेया, “होसकै ‘कालाप बेर’ डेच ही हो? होसकै हीयो बारेयाङ डेमनले, कानै च माबुझडीसा।” 19 होखुरीकै इसे कुरौ बारेयाङ येशूकी गीन्च मीमन जाट्न न ले डेम होसकै वार्हा र होखुरीककी डेया, “‘कालाप बेर न्हुइङ नाखुरीकै ङाकी माडाङ्ले, अनी कालाप बेर न्हुइङ फेरी ङाकी डाङ्ले’ डेच ही औँला डेयार नाखुरीक लाहा लहाङ गीन्न न ले होइन ट? 20 साँच्ची न ङा नाखुरीककी डेले, नाखुरीक राप्ले र सोक जाट्ले, टर संसारुङ भर्मीको चहीँ मार्हाङ्ले। नाखुरीक सोक जाट्ले, टर नाखुरीकुङ सोक आनन्दाङ फेरीस्ले। 21 बालख जन्मडीस्च बेलाङ मोइकी कष्ट छान्ले, टर जब बालख जन्मडीस्ले, टब होचे होसे बीक्च कष्ट म्य्हाक्ले, हीजैडेनाङ संसाराङ काट बालखौ जन्म छाना डेच कुराङ होसे मार्हाङ्ले। 22 होटजाट्न न चाहाँ नाखुरीकै सोक जाट्ले, टर ङा फेरी नाखुरीककी डुप्की रान्हाङ ङाकी डाङार नाखुरीकुङ मीमन आनन्द ये न्हेप्ले। अनी इसे आनन्द चहीँ नाखुरीक लकीङ सुयेर स्याटार आल्खी माय्होक्ले। 23 होसनीक नाखुरीकै ङाकी हीर मागीन्ले। साँच्ची न ङा नाखुरीककी डेले, नाखुरीकै ङौ म्यार्मीनाङ बोइखाटा ही ङेल्हे, होसकै होसे नाखुरीककी याल्हे। 24 चाहाँसम्म नाखुरीकै ङौ म्यार्मीनाङ हीर माङेम्हने। ङेन्ही र नाखुरीकै डुप्ले। अनी नाखुरीकुङ आनन्द पुरा छान्ले। संसार मीटाक बीजय 25 “इसे कुरा ङै नाखुरीककी उदाहरणाङ डेमने। टर समय राम्हन ले, होडीक बेला चहीँ ङा नाखुरीकखाटा फेरी उदाहरणाङ माङाक्ले, टर ङौ बोयो बारेयाङ नाखुरीककी छर्लङ्ग खाटा डेम याल्हे। 26 होडीक बेला नाखुरीक लहे न ङौ म्यार्मीनाङ ङेल्हे। अनी ङै नाखुरीकुङ लागी बोइखाटा ङेम्ह याखी मापर्ले, 27 हीजैडेनाङ बोइ मेखोलै न नाखुरीककी माया जाट्ले, हीजैडेनाङ नाखुरीकै ङाकी माया जाट्नने, अनी ङा परमेश्वर लकीङ राछ हो डेम नाखुरीकै विश्वास जाट्नने। 28 ङा परमेश्वर बोइलकीङ न संसाराङ राछ हो, अब ङा संसारकी डासार परमेश्वर बोइ लेठाङ न ल्हेस्न नुङ्ङन ले।” 29 टब चेलाकै येशूकी डेया, “अब नाको उदाहरणाङ होइन, कानै बुझडीस्च जाट्न डेमनले। 30 अब कानै बुझडीसा, नाकै पट्ट न कुरा वार्ल्हे। अब नाकोकी सुयेर गीन्की मापर्ले। होटबाटै नाको परमेश्वरलकीङ न राछ हो डेयार कान नाकोकी विश्वास जाट्ले।” 31 येशूये होखुरीककी डेया, “ही नाखुरीक साँच्ची न अब विश्वास जाट्ले? 32 टर सेनी, याङ्च समय राम्हन ले र खेरेप राम्हभ्यामने, होडीक बेला नाखुरीक पट्ट न टीटरबीटर छान्ले। नाखुरीक लाहा-लहो इमाङ नुङ्ले र ङाकी लाहा काट्न डास्ले। टर ङा ङाल्हाकाट न माले, हीजैडेनाङ बोइ ङा खाटा ले। 33 “नाखुरीक ङाखाटा लेचबाटै शान्ति डुप्की य्होक्नी डेम न ङै नाखुरीककी इसे पट्ट न कुरा डेच हो। संसाराङ नाखुरीककी सङ्कष्ट छान्ले, टर साहस जाट्नी हीजैडेनाङ ङै संसारकी जुमने।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.