युहन्ना 10 - पुर्वीय मगरगोठ्ला र भेडा 1 येशूये डेया, “साँच्चीन ङा नाखुरीककी डेले, भेडौ गोठाङ गालामीङ मापर्न अर्को पट्टीङ भीत्री पर्ले डेनाङ होसे चहीँ खुस र डाका हो। 2 टर गालामीङ गोठ भीत्री पर्च चहीँ भेडौ गोठ्ला हो। 3 जब गोठ्ला राल्हे टब गोठ रुङ्की ङुचये होच्यौ लागी गोठौ गालाम फोम याल्हे। गोठ्लै लोहो भेडाकुङ म्यार्मीन लार आर्घानाङ भेडाकै लोहो गोठ्लौ सोर चीन्डीले र होचे होखुरीककी डोरीचै बाहीर छ्युक्ले। 4 जब गोठ्लै पट्ट न लहो भेडाकोलाक बाहीर छ्युक्ङ भ्याच पछी मेल्हा चहीँ होखुरीकुङ अघी-अघी व्हाले र भेडाकै होसकी डुट्ले, हीजैडेनाङ भेडाकै लहो गोठ्लौ सोर चीन्डीले। 5 टर माचीन्डीच भर्मीकी भेडाकै माडुट्ले, बरु होसे लकीङ भोग्डीस्ले। हीजैडेनाङ माचीन्डीच गोठ्लौ सोर होखुरीकै माचीन्डीले।” 6 येशूये होखुरीककी इसे उदाहरण याहा, टर सेचकै होसकै डेच कुरौ अर्थ माबुझडीसा। येशू न साँचो गालाम 7 येशूये फेरी होखुरीककी डेया, “साँच्ची न ङा नाखुरीककी डेले, भेडाकुङ गालाम ङा न हो। 8 ङा डेनाङ अघी राछ पट्ट न चोर र डाकाको लेया, टर भेडाकै होखुरीकुङ कुरा मासेया। 9 गालाम ङा न हो। इडीक सुर भर्मी ङा लकीङ भीत्री पर्या डेनाङ होसे जीवाले, अनी होसे भीत्री बाहीर राछ नुङ्च जाट्ले र खर्काङ स्यास्की डीन्ल्हे। 10 खुस च खुसकी, साट्की र नास जाट्की मट्टै राल्हे। टर ङा चहीँ नाखुरीकै जीवन डुप्ख्यौ, होसे परसस्ट जाट्न डुप्ख्यौ डेयार राछ हो। येशू असल गोठ्ला 11 “ङा असल गोठ्ला हो। असल गोठ्लै लहो भेडाकुङ लागी लहो प्राण न याल्हे। 12 टर पैसा याहार डाच गोठ्ला चहीँ भेडाकुङ लहो न गोठ्ला होइन। होटबाटै ब्वाँसो डाङ्नाङ भेडाकी डासार होसे गोठ्ला भोग्डीस्ले हीजैडेनाङ होच्यो लहो भेडा होइन। अनी ब्वाँसोये भेडाकोलाक झम्टडीसार जीक्ले र टीटरबीटर पार्न याल्हे। 13 हीजैडेनाङ होसे पैसा याहार डाच भर्मी हो, होसकी भेडाकुङ हीर वास्टा माछान्ने, होटबाटै होसे भोग्डीस्ले। 14 “ङा असल गोठ्ला हो। ङा ङाल्हौ भेडाकोलाक सेम्हजा चीन्डीले र ङौ भेडाकै ङाकी र सेम्हजा चीन्डीले। 15 कुटजाट्न बोये ङाकी सेम्हजा चीन्डीले ङा र बोइकी सेम्हजा चीन्डीले। अनी ङा भेडाकुङ लागी ङाल्हौ प्राण र याल्हे। 16 ङा खाटा अरु भेडाको र ले, होखुरीक इसे गोठुङ होइन, होखुरीककी र ङै राक्की पर्ने। होखुरीकै ङौ सोर सेले र होखुरीक पट्ट न काट न बगाल छान्ने, अनी होखुरीकुङ गोठ्ला काट न छान्ले। 17 “ङौ बोये ङाकी माया जाट्ले, हीजैडेनाङ ङा ङाल्हौ प्राण याल्हे होटबाटै फेरी ङा इसे फीर्टा लाले। 18 सुयेर ङौ प्राण ङा लकीङ लाकी माय्होक्ले, टर ङाल्हौ न खुसीये इसे याल्हे। ङाकी लहो प्राण याछ अधिकार ले, अनी फेरी होसे प्राण ल्हेट्च अधिकार र ङा खाटा ले। इसे आज्ञा ङै ङौ बोइ लकीङ डुप्मने।” 19 येशूये इसे कुरा डेच न्हुइङ, फेरी यहूदी अगुवाकुङ मीघ्याङ माखाटा। 20 अनी कुडीक जनै डेया, “होसकी भूत लक्डीस्ने! होसे च बौलाहा हो। नाखुरीक होच्यौ कुरा हीजै सेले?” 21 टर अरु भर्मीकै डेया, “भूत लक्डीस्च भर्मीयो कुरा याङ्च माछान्ने! ही भूतै अन्ढौ मीमीक डाङ्च खास्की य्होक्ले र?” यहूदीकुङ अविश्वास 22 यरूशलेमाङ परमेश्वरौ मन्दिर अर्पनौ चाड राम्हन्या। होडीक बेला हीउडौ बेला लेया। 23 येशू परमेश्वरौ मन्दिरुङ सोलोमन डेच दलानाङ व्हाम ङुम्या। 24 यहूदी अगुवाकै होसकुङ वरीपरी जम्मा छानार गीना, “नाकै कानकी सेनसम्म अल्लमल्ल पार्यार डाले? इडीक नाको न मुक्ति याछ ख्रीष्ट हो डेनाङ कानकी डेम यान्ही।” 25 येशूये होखुरीककी डेया, “ङै नाखुरीककी अघी न डेम भ्यामने, टर नाखुरीकै ङाकी विश्वास माजाट्ले। ङै बोयो अधिकार डुपार जाट्च कामकै न ङा सु हो डेच कुरा टान्हाक्ले। 26 टर नाखुरीक ङौ भेडाको होइन, होटबाटै नाखुरीकै ङाकी विश्वास माजाट्ले। 27 ङौ भेडाकै चहीँ ङौ सोर सेले, र होखुरीककी ङा चीन्डीले, अनी होखुरीकै ङाकी डुट्ले। 28 ङा होखुरीककी सेन्र मासीच जीवन याल्हे, अनी होखुरीक सेन्र नास माछान्ने। सुयेर होखुरीककी ङा लकीङ स्याटार आल्खी माय्होक्ले। 29 ङौ बोये होखुरीककी ङौ जीम्माङ याम्होने, र होसको पट्ट डेनाङ महान ले। अनी ङौ बोयो मीहुटीङ होखुरीककी सुयेर स्याटार आल्खी माय्होक्ले। 30 बोइ र ङा काट न हो।” 31 येशूओ कुरा सेयार यहूदी अगुवाकै फेरी होसकोकी ङाप्की डेम ल्हुङको ढुमा। 32 टर येशूये होखुरीककी डेया, “बोये ङाकी जाट्की डेच वास्टै सेछ कामको ङै नाखुरीकुङ म्याहासाङ जाट्नने। होसे कामको मढ्याङ कुसे चहीँ कामौ लागी नाखुरीकै ङाकी ल्हुङै ङाप्की पाच हो?” 33 यहूदी अगुवाकै येशूकी डेया, “कानै नाङ्की सेछ कामौ लागी ल्हुङै ङाप्की पाच होइन, टर नीये परमेश्वरौ निन्दा जाटा र होच्यो लागी कानै ल्हुङै ङाप्की मीमन जाट्च हो। नाङ भर्मी छानार लाहाकी न परमेश्वर खास्ले।” 34 येशूये होखुरीककी डेया, “ही नाखुरीकुङ व्यवस्थाङ इट माडेमे र परमेश्वर डेले, ‘नाखुरीक देवताको हो’? 35 होटबाटै परमेश्वरौ बचन सु लेठाङ राहा, होखुरीककी होसकै देवताको डेया, अनी धर्मशास्त्र सेन्र झुटो माछान्ले। 36 ङाकी परमेश्वर बोये लहो काम पुरा जाट्की डेम ङाकी चुन्डीयार संसाराङ बीर्न्हकाच हो। होटडेनाङ ङा परमेश्वरौ मीजा हो डेनाङ नाखुरीकै कुटजाट्न ङै परमेश्वरौ निन्दा जाटा डेकी य्होक्ले? 37 इडीक ङै जाट्च कामको ङौ बोयो होइन डेनाङ नाखुरीकै ङा मीटाक विश्वास माजाट्नी। 38 टर इडीक ङै जाट्च कामको ङौ बोयो हो डेनाङ, नाखुरीकै ङा मीटाक विश्वास माजाट्नाङ र ङै जाट्च कामको मीटाक चहीँ विश्वास जाट्नी, र बोइ ङा खाटा ले, अनी ङा बोइ खाटा ले डेयार नाखुरीकै बुझडीस्की य्होक्ले।” 39 इसे कुरा सेयार होखुरीकै फेरी येशूकी घोकी पा, टर होसको होखुरीकुङ मीहुटीङ भीसा। 40 होस न्हुइङ येशू फेरी यर्दन नदि पारी युहन्नै सुरुवाङ बप्तिस्मा याछ ठावाङ नुङा र होसको होला न ङुवा। 41 अनी होसको लेठाङ वास्टै भर्मीको राहा, र मेखुरीक-मेखुरीक डेया, “युहन्नै च कुसेर शक्तिशाली काम माजाटा, टर युहन्नै इसे भर्मीयो बारेयाङ डेच पट्ट न कुराको चहीँ सत्य लेसा।” 42 इटजाट्न होसे ठाउँङ वास्टै भर्मीकै येशूमीटाक विश्वास जाटा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.