याकुब 5 - पुर्वीय मगरधनीकोलाक चेतावनी 1 नाखुरीक धनी भर्मीको, सेनी! नाखुरीक मीटाक आइपर्न राछ कष्टकुङ लागी बाड्को सोरै राप्चै बीलाप जाट्नी। 2 नाखुरीकुङ धन सम्पत्ति घेरेल्नने, अनी नाखुरीकुङ बढीनको डुये ज्यामने। 3 इसे अन्टीम डीनकोवाङ नाखुरीकै धन सम्पत्ति ठुपारीमने। नाखुरीकुङ सुन चाँडीयाङ कस बाम्हने। होसे न कस नाखुरीकुङ विरुद्धाङ साक्षी छान्ले र म्हे लेखा न होचे नाखुरीकुङ शरीरकी सीकाकार नास जाट्ले। 4 नाखुरीकुङ य्हाङ काम जाट्च य्हामीकोलाक याखी पर्च ज्याला नाखुरीकै माय्हामने। होखुरीकुङ बीलौना सेनी। नाखुरीकुङ बाली सोट्च य्हामीकुङ पुकारा सर्वशक्तिमान परमप्रभुये सेमने। 5 नाखुरीक इसे पृथ्वीयुङ सुख-बीलास र मोजमज्जाङ मस्ट छानार ङुमने। बली याछ डीनौ लागी नाखुरीकै लाहाकी न पोसडीयार डामने। 6 नाखुरीकुङ विरोध माजाट्च निर्दोष भर्मीकोलाक नाखुरीकै डोसी ठहरीयार साट्नने। डुख कष्टकोवाङ धैर्य जाट्की 7 होटबाटै ङौ विश्वासी डाजेभाइको र डै बहीनीको, प्रभु मार्हाठर धैर्य जाटार लेन्नी। ङोस्नी, य्हाङ काम जाट्च कीसानै अन्न स्याटाक्कीयो लागी बाड्को आसा डार होचे वर्षा र हीउँडौ नामास मार्हाठर कुडीक धैर्य जाटार लेन्ले। 8 नाखुरीक र होट्जाट्न न लेनार ङुनी। लहौ मीमनकी स्थिर खास्नी, हीजैडेनाङ प्रभु राछ डीन खेरेप न ले। 9 ङौ विश्वासी डाजेभाइको र डै बहीनीको, काटै-काटौ विरुधाङ गन-गन माजाट्नी, नभा च नाखुरीककी परमेश्वरै डोसी ठहरीले। ङोस्नी, न्याय जाट्च गालामटुङाङ न ले। 10 ङौ विश्वासी डाजेभाइको र डै बहीनीको, कष्टौ बेलाङ धैर्य जाट्च उडाहरन कुङ्च छान्की पर्च हो, होसे कुरा प्रभुओ म्यार्मीनाङ ङाक्च अगमवक्ताकोलाक ङोस्नी। 11 डुख कष्टकोवाङ धैर्य जाट्च भर्मीको आसीस डुप्चको छान्ले। अयुबै धैर्य जाट्च बारेयाङ च नाखुरीकै सेमने। अनी अन्टीमाङ प्रभुये कुटजाट्न होसकी सेछ कुराकै न्हेपाक्ङ याहा, होसे र नाखुरीकै वार्न्हने। भर्मीकुङ लागी प्रभु दया र कृपै न्हेप्च ले। 12 ङौ विश्वासी डाजेभाइको र डै बहीनीको, पट्ट डेनाङ मुख्य कुरा च स्वर्ग, पृथ्वीयो म्यार्मीनाङ अठबा अरु कुसे कुराङ र नाखुरीकै कसम माज्याकी। टर नाखुरीकुङ कुरा इडीक हो डेनाङ हो, इडीक होइन डेनाङ होइन मट्टै छान्ख्यौ। नभा च नाखुरीक डोसी ठहरीस्ले। 13 ही नाखुरीक मढ्याङ सुर डुख कष्टाङ ले? होचे प्रार्थना जाट्ख्यौ। ही नाखुरीक मढ्याङ सुर आनन्दाङ ले? होचे परमेश्वरकी प्रंशसा जाट्ख्यौ। 14 ही नाखुरीक मढ्याङ सुर छामने? होचे मण्डलीयुङ अगुवाकोलाक आर्घाख्यौ, अनी होखुरीकै प्रभुओ म्यार्मीनाङ होसकी सीडी मोल्हार होच्यो लागी प्रार्थना जाट्न याख्यौ। 15 अनी विश्वास खाटा जाट्च प्रार्थनै छाचकी गेपाक्ले, र प्रभुये होसकी चङ्गाइ याल्हे। इडीक होचे पाप जाट्नेसा डेनाङ र होच्यौ पाप क्षमा छान्ले। 16 होटबाटै काल्है पाप जाट्न ने डेयार काटै-काटौ म्याहासाङ नाखुरीकै लहौ पापको स्वीकार जाट्नी। अनी नाखुरीक गेप्की डेयार काटै काटौ लागी प्रार्थना जाट्नी, परमेश्वरौ म्याहासाङ ठीक ठहरीस्च भर्मीकै जाट्च प्रार्थना शक्तिशाली छान्ले र इचे बाड्को काम जाट्ले। 17 एलीया र काल्हा ल्याक्च न साधरण भर्मी लेया। होचे नामास मार्हाख्यौ डेयार विश्वास खाटा प्रार्थना जाटा, अनी होसे देशाङ सोम वर्ष छ महीना सम्म नामास माराहा। 18 फेरी होचे प्रार्थना जाटा, अनी सर्घै म्हाका पृथ्वीयाङ नामास बीर्न्हका र बालीनालीये मीस्या स्याटाका। 19 ङौ विश्वासी डाजेभाइको र डै बहीनीको, इडीक नाखुरीक मढ्याङ सुर सत्यलकीङ बरालीसार नुङ्ने डेनाङ होसकी ल्हेटार राक्नी। 20 इसे कुरा नाखुरीककी ठाहा छान्ख्यौ, काट जना पापीकी होच्यौ मासेछ लामलकीङ ल्हेटार राक्चये होसे भर्मीयो आत्माकी सीचलकीङ जीवाटाक्ले, अनी होसे पापीयो हील्की माय्होक्च पापको क्षमा छान्ले। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.