याकुब 4 - पुर्वीय मगरसंसारखाटा लाफा 1 नाखुरीकुङ मीघ्याङ लडाइँ र झगडाको कुटै राल्हे? ही मोज मज्जा जाट्च खराब इच्छै होइन र? होसे च नाखुरीकुङ मीमन भीत्री लडाइँ जाट्न ङुच छान्ले। 2 नाखुरीक लहे इच्छा जाट्च कुरा माडुप्नाङ लोभ जाटार भर्मी साट्ले। इट जाट्नाङ र नाखुरीक लहे इच्छा जाट्च कुराको डुप्की माय्होक्ले अनी लडाइँ र झगडा जाट्ले। हीजैडेनाङ परमेश्वर खाटा माङेछ बाटै नाखुरीकै इच्छा जाट्च कुरा माडुप्ले। 3 नाखुरीकै ङेल्हे टर माडुप्ले, हीजैडेनाङ नाखुरीक लहौ मोज-मज्जा पुरा जाट्कीयो लागी दुष्ट इच्छालकीङ ङेल्हे। 4 ए व्यभिचारी भर्मीको! संसारकी लाफा खास्चको परमेश्वरौ शत्रु छान्ले डेच कुरा नाखुरीककी ठाहा माले? संसारकी लाफा खास्की पाचये लाहाकी न परमेश्वरौ शत्रु खास्ले। 5 “परमेश्वरै कानुङ मीमन भीत्री डाम याछ आट्मै सार्है डाह जाट्ले” डेयार धर्मशास्त्राङ रीक्च कुरा व्यर्थौ हो डेयार नाखुरीक माआर्मीट्नी। 6 टर कानकी परमेश्वरै अझै वास्टै अनुग्रह याल्हे। होटबाटै धर्मशास्त्राङ इट डेयार रीक्ङने, “परमेश्वरै घमन्डीकुङ विरोध जाट्ले टर नम्रकोमीटाक प्रसस्त खाटा अनुग्रह जाट्ले।” 7 होटबाटै लाहाकी परमेश्वरौ अधिनाङ डानी। शैतानकी विरोध जाट्नी र होसे नाखुरीकलकीङ लोस भोग्डीस्ले। 8 नाखुरीक परमेश्वरौ खेरेप रान्ही, अनी होसको र नाखुरीक खेरेप राल्हे। नाखुरीक पापीको, पाप जाट्की डास्नी! डोढार्या मीमन लेच भर्मीको, नाखुरीक लहौ मीमनकी चोखो खास्नी। 9 नाखुरीक डुखी छान्नी, बीलाप जाट्नी र राप्नी। नाखुरीकुङ रेट्च सोकाङ, र नाखुरीकुङ आनन्द डुखाङ बडलीस्ख्यौ। 10 प्रभुओ म्याहासाङ लाहाकी नम्र खास्नी, र होसकै नाखुरीककी ढेनाम गाराङ्ले। काटै काटौ निन्दा जाट्च बीरुद्धाङ चेतावनी 11 ङौ विश्वासी डाजेभाइको र डै बहीनीको, सुओर विरुधाङ मासेम्ह माडेकी। लहो विश्वासी डाजेभाइकुङ विरुधाङ मासेम्ह डेच र डोस लैडीच भर्मी व्यवस्थौ विरुधाङ ङाक्ले र होचे व्यवस्थाकी डोस याल्हे। टर इडीक नीये व्यवस्थाकी डोस याल्हे डेनाङ च नाङ व्यवस्थाकी मन्डीच होइन, टर होच्यौ न्याय जाट्च टी छाना। 12 व्यवस्था याछ र न्याय जाट्च च परमेश्वर मट्टै ले। जीवाटाक्च र नास जाट्की य्होक्च होसको काट मट्टै ले। लहो छीमेकीकी डोस लैडीच नाखुरीक सु हो? घमण्डौ विरुद्धाङ चेतावनी 13 “छीनीङ वा पीउर्हाक काल्हा कुसेर काट सहराङ आनुङै र होला काट वर्ष ङुवार ब्यापार आजाटै अनी धन आकमडीये” डेच नाखुरीकै ङौ कुरा सेनी। 14 पीउर्हाक ही छान्च हो, नाखुरीक सुयेर माव्हार्ले। नाखुरीकुङ जीवन च काटछीन डाङ्च अनी म्हाटार नुङ्च डेबु ल्याक्च मट्टै हो। 15 नाखुरीकै इच्यौ सट्ठाङ च इट डेकी पर्च हो, “इडीक प्रभुओ इच्छा छाना डेनाङ काल्हाको जीवार इट जाटीङ होट जाटीङ।” 16 टर चाहाँ नाखुरीक लाहा लहौ सेखीयाङ घमन्ड जाट्ले। इटजाट्न सेखी जाट्की सेछ होइन। 17 होटबाटै इडीक सुयेर भलाइ जाट्की वार्न्ह र माजाट्ले डेनाङ होच्यौ लागी होसे न पाप हो। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.