याकुब 2 - पुर्वीय मगरपक्षपातौ विरुद्धाङ चेतावनी 1 ङौ विश्वासी डाजेभाइको र डै बहीनीको, नाखुरीक काल्हौ महीमीत प्रभु येशू ख्रीष्ट मीटाक विश्वास जाट्चको लेचबाटै सुओर पक्षपात माजाट्नी। 2 इडीक नाखुरीक भेला छान्च ठावाङ काट जना धनी भर्मी सुनौ गोठ्ली र सेछ-सेछ बढीन बील्हार राहा, अनी होला च्याछ बढीन बील्छ काट जना गरीब भर्मी र राहा डेनाङ, 3 होडीक बेला नाखुरीकै होसे धनी भर्मीकी चहीँ मान जाटार, “इला सेछ ठावाङ ङुनी” डेले टर होसे गरीबकी चहीँ “नाङ होला न टोङ्हो, अठबा इला ङौ मीकु छीनी झाङ ङुना” आडेइ। 4 होटजाटा डेनाङ ही नाखुरीककी लहौ न भर्मीकुङ मीघ्याङ भेदभाव जाट्च र मासेछ बीचार लेच न्यायकर्ता माछाना र? 5 ङौ विश्वासी डाजेभाइको र डै बहीनीको सेनी! ही परमेश्वरै संसाराङ लेच गरीब भर्मीकोलाक विश्वासाङ धनी खास्की र प्रतिज्ञा जाट्च राज्य होसकोकी प्रेम जाट्चकोलाक याखी डेयार चुन्डीच होइन र? 6 टर नाखुरीकै च गरीब भर्मीकोलाक अपमान जाट्ले। ही नाखुरीक मीटाक अत्याचार जाटार न्यायधिसकुङ अघी आल्छ होसे धनी भर्मीको न होइन र? 7 होखुरीक न होइन होसे असल म्यार्मीन येशू ख्रीष्टौ निन्दा जाट्च, ही होसे न म्यार्मीनलकीङ नाखुरीककी आर्घाच होइन र? 8 इडीक “लहौ छीमेकीकी लाहाकी लेखा न प्रेम जाट्नी” डेच धर्मशास्त्राङ रीक्च परमेश्वरौ राज्यौ नीयमकी साँची न मन्डीले डेनाङ नाखुरीकै ठीक काम जाट्ले। 9 टर नाखुरीकै भर्मीकोखाटा व्यवहार जाट्नाङ पक्षपात जाटा डेनाङ च पाप जाट्ले र नाखुरीककी व्यवस्था उलङ्घन जाट्च डोस लक्डीस्ले। 10 हीजैडेनाङ सुये व्यवस्थाङ रीक्च पट्ट न कुराको मन्डीले टर काट मट्टै कुराङ गल्टी जाटा डेनाङ, व्यवस्थौ पट्ट न कुराङ होसे डोस लक्डीस्ले। 11 हीजैडेनाङ सुये “व्यभिचार माजाट्नी” डेया, होसकै न “भर्मी मासाट्की” र डेया। होटबाटै इडीक नाखुरीकै व्यभिचार माजाट्ले टर भर्मी साट्ले डेनाङ, नाखुरीकै पुरै व्यवस्था उलङ्घन जाट्च छान्ले। 12 होटबाटै भर्मीकी स्वतन्त्र जाट्च व्यवस्था अनुसार न्याय डुप्च भर्मीये लेखा न नाखुरीकै र ङाक्च अनी काम जाट्च जाट्नी। 13 हीजैडेनाङ कुसे भर्मीये अरु भर्मीकी दया माजाट्न ने, होच्यौ न्याय र परमेश्वरै दया माडाम न जाट्ले। टर दया चहीँ न्याय मीटाक बीजयी छान्ले। विश्वास र काम 14 ङौ विश्वासी डाजेभाइको र डै बहीनीको, इडीक कुसेर भर्मीये “ङा विश्वास जाट्ले” च डेले, टर कुसे कामै र लहौ विश्वास टान्हाक्की माय्होक्ले डेनाङ ही फाइडा छानार? ही याङ्च विश्वासै होसकी जीवाक्की य्होक्ले र? 15 इडीक सुर काट जना भाइ वा बहीनीयो बील्छ बढीन र माले, ज्याच ठोक र माले, 16 टर नाखुरीक मढ्याङ सुयेर होसकी “शान्तिखाटा नुङ्नी, जाल्न्हजा ङुनी, र्हास्ठर ज्यानी” मट्टै डेले टर होच्यौ शरीरकी खाँचो पर्च कुराको चहीँ हीर माय्हाले डेनाङ, ही होसे सेम्ह छानार? 17 विश्वास र होङ्च न हो। काम लकीङ माडाङा डेनाङ होसे सीच विश्वास हो। 18 टर सुयेर आडेइ, “नाङ विश्वास जाट्ले, ङा च काम जाट्ले।” काम बीनुङ नुओ विश्वास ङाकी टान्हाको, र ङै जाट्च काम लकीङ ङा लहौ विश्वास नाङ्की टान्हाक्ले। 19 काट मट्टै परमेश्वर ले डेयार नाङ विश्वास जाट्ले। होसे च सेछ कुरा हो! टर याङ्च विश्वास च भूतआत्माकै र जाट्ले र बीर्हीयार ठेर-ठेर बुरुक्ले। 20 ए मुर्खको, नाखुरीकुङ काम बीनुङ विश्वास व्यर्थ छान्ले डेच कुरौ प्रमाण पाले? 21 काल्हौ पुर्खा अब्राहामौ न बारेयाङ बीचार जाट्नी ट। ही होचे लहौ मीजा इसहाककी बली याखी डेयार वेदी मीटाक काल्हाक्च काम जाटार परमेश्वरौ म्याहासाङ होसे धर्मी ठहरीस्च होइन र? 22 होचे विश्वास र काम खाट-खाट न खाटाकार जाटा, होटबाटै कामको लकीङ न होच्यौ विश्वास पुरा छान्च नाखुरीकै डाङ्ङने। 23 “अब्राहामै परमेश्वर मीटाक विश्वास जाटा, र होसे न विश्वासै जाट्नाङ होसे परमेश्वरौ म्याहासाङ धर्मी ठहरीसा” डेयार धर्मशास्त्राङ रीक्च बचन पुरा छाना। इटजाट्न अब्राहाम परमेश्वरौ लाफा हो डेम चीन्डीया। 24 अब नाखुरीकै डाङ्ङने भर्मी होचे जाट्च काम लकीङ परमेश्वरौ म्याहासाङ धर्मी ठहरीस्ले टर विश्वासै मट्टै होइन। 25 राहाब डेच काट जना मास्टो होसे बेस्या लेया, होसे र कुटजाट्न लहौ कामलकीङ परमेश्वरौ म्याहासाङ धर्मी ठहरीसा। सुराकी लाकी नुङ्च इस्राएलीकोलाक आर्च्युका अनी अर्को न लामीङ बीर्न्हकार होचे होखुरीककी जोगडीच काम जाटा। 26 कुटजाट्न शरीर प्राण लकीङ भानाङ सीच छान्ले, होटजाट्न न काम बीनुङ विश्वास र सीच छान्ले। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.