याकुब 1 - पुर्वीय मगर1 परमेश्वर र प्रभु येशू ख्रीष्टौ सेवक ङा याकुब लकीङ संसारुङ ठाउँ-ठावाँङ छरपस्ट छानार ङुच परमेश्वरकी विश्वास जाट्च पट्ट न विश्वासीकोलाक ङा इसे चीठी रीक्ङन ले। नाखुरीक पट्टकी ङा झोर्ले! विश्वास र बुद्धि 2 ङौ विश्वासी डाजेभाइको र डै बहीनीको, नाखुरीक मीटाक खाल-खालुङ कष्टको रान्हाङ होसकी पुरा आनन्दौ कुरा आर्मीट्नी। 3 हीजैडेनाङ नाखुरीककी ठाहा ले, जब नाखुरीकुङ विश्वासौ जाँच छान्ले, टब झन नाखुरीकुङ सहडीकी य्होक्च शक्ति बड्डीस्ले। 4 टर कुसे कुराङ र कमी माछान्न परीपक्व र सफल छान्की होसे जाँचको सहडीचै स्थिर छानार ङुनी। 5 इडीक नाखुरीक मढ्याङ सुकीर बुद्धियो खाँचो ले डेनाङ होचे प्रसस्त खाटा माङ्हेरेस्न मीमन खोलीयार याछ परमेश्वर खाटा ङेख्यौ, र होसकी होसे याल्हे। 6 टर होचे ङेन्हाङ हीर सङ्का माजाट्न विश्वास खाटा ङेख्यौ। सङ्का जाट्च भर्मी च नाम्सुये गाराङ्चै पछारीचै जाट्च समुन्द्रौ डीयो छाल ल्याक्च न हो। 7 होङ्च भर्मीये च प्रभुये याछ कुराको डुप्ले डेयार हीर माआर्मीट्नाङ र छान्ले। 8 हीजैडेनाङ याङ्च भर्मी डोढार्या मीमन लेच र पट्ट न कुराङ चन्चल्या छान्ले। गरीब र धनी 9 गरीब अवस्ठाङ लेच विश्वासी डाजेभाइको र डै बहीनीको, जब परमेश्वरै नाखुरीककी मान सम्मान याल्हे, होडीक बेला नाखुरीक मार्हाङ्नी। 10 टर धनी विश्वासी डाजेभाइको र डै बहीनीको चहीँ लाहा गरीब छान्च अवस्ठाङ मार्हाङ्नी, हीजैडेनाङ धनी भर्मी च जङ्गलाङ वाट्च सार ल्याक्च न हो होसे ओइलडीसार नुङ्ले। 11 हीजैडेनाङ नाखान फेरार खान्रखीङ होसे सारौ म्यार्टुङ ओइलडीस्ले। अनी सार झाल्ले र होच्यौ सोभा न नस्ट छान्ले। इटजाट्न न धनी भर्मी र लहो काम ढन्डाङ न नस्ट छानार नुङ्ले। 12 जाँच छान्च बेलाङ सहडीयार स्थिर ङुच भर्मी आसीस डुप्च हो। हीजैडेनाङ परमेश्वरै मेखोल्हाकी प्रेम जाट्चकोलाक याल्हे डेयार प्रतिज्ञा जाट्च जीवनौ मुकुट डुप्ले। 13 विश्वासौ परीक्षा छान्नाङ सुयेर माडेख्यौ, “परमेश्वरै ङाकी परीक्षा जाटा।” हीजैडेनाङ कुसेर मासेछ कुरालकीङ परमेश्वरौ परीक्षा छान्की माय्होक्ले, र होसकै कुसे भर्मीयो र मास्च कुरै परीक्षा माजाट्ले। 14 टर पट्ट भर्मीको लहौ न खराब इच्छै लोभडीसार परीक्षाङ पर्ले। 15 होटबाटै लहौ खराब इच्छै लोभडीसार पाप जन्मडीले। अनी होसे न पाप पुरा बड्डीस्च न्हुइङ होचे मृत्यु राक्ले। 16 ङौ विश्वासी डाजेभाइको र डै बहीनीको, नाखुरीक लहे लाहाकी माढाट्डीनी। 17 पट्ट न सेछ र सिद्ध वरदान ढेनाम स्वर्ग लकीङ राल्हे। इसे वरदान सर्घाङ ज्योटीको खास्च परमेश्वर बोइ लकीङ राल्हे। होसको फेरीस्न ङुच छायाँ लेखा सेन्र माफेरीस्ले। 18 कान सृष्टियो पहीला स्याच मीस्याको ल्याक्च छान्की य्होकीङ डेयार होसकै लहौ न इच्छै सत्य बचन लकीङ कानकी नयाँ जीवन याहा। सेकी र जाट्की 19 ङौ विश्वासी डाजेभाइको र डै बहीनीको, इसे कुरा नाखुरीकै वार्न्ह डानी। नाखुरीक पट्टको सेकीयाङ छीट्टो, ङाक्कीयाङ होसीयार र ठोरै मीरीस ख्योछ जाट्नी। 20 हीजैडेनाङ भर्मीकुङ मीरीसै परमेश्वरौ जाक्ङ सेच कामाङ बाँधा याल्हे। 21 होटबाटै पट्ट न मास्च स्वभाव र झीर्न सेच दुष्ट कुराकोलाक हटडीनी। नम्र छानार नाखुरीकुङ रीदयाङ परमेश्वरै डाम याछ बचनकी स्वीकार जाट्नी, हीजैडेनाङ होसे बचनै नाखुरीककी जीवाटाक्की य्होक्ले। 22 होटबाटै बचनै डेच लेखा न जाट्नी। हीजैडेनाङ बचन सेच काम मट्टै जाटा डेनाङ लहे लाहाकी न ढोका याल्हे। 23 इडीक सुयेर बचन च सेले टर बचनै डेच लेखा माजाट्ले डेनाङ, होसे चहीँ एेनाङ लहौ मीटाहा ङोस्च भर्मी ल्याक्च न हो। 24 हीजैडेनाङ होचे लहौ मीटाहा एेनाङ ङोसार व्हाकी क्योट्ले, र लाहा कुङ्च लेया डेच कुरा होचे तुरुन्तै म्य्हाक्की क्योट्ले। 25 टर इडीक सुये भर्मीकोलाक छुट्कारा याछ शुद्ध व्यवस्थाकी सेयार माम्य्हाक्ले, र सेम्हजा ङोसार ढ्यान याल्हे अनी पालना जाट्ले, परमेश्वरै होसे भर्मीयो कामाङ आसीस याल्हे। 26 इडीक सुर भर्मीये लाहाकी धर्मी आर्मीट्ले, टर होचे लहौ मेलेटकी चहीँ अधिनाङ डाकी माय्होक्ले डेनाङ होचे लाहाकी न ढोका याल्हे अनी होच्यौ धर्म व्यर्थै छान्ले। 27 परमेश्वर बोइकी जाक्ङ सेच शुद्ध र पवित्र धर्म चहीँ डुखाङ पर्च टुहुरा-टुहुरीकोलाक र बीढुवाकोलाक सहायता जाट्की, र लाहाकी संसारुङ मासेछ कुराकोलकीङ जोगडीयार शुद्ध डाकी हो। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.