प्रेरित 6 - पुर्वीय मगरसाट जना सेवककोलाक भाक्च 1 अनी होसे डीनाङ विश्वासीकुङ सङ्ख्या बट्डीस्चै राम्हन्या। होटै हिब्रु ङाक्च विश्वासीकुङ विरोधाङ ग्रीक ङाक्च विश्वासीकै गन-गन जाट्की ठाला। हीजैडेनाङ डीन-डीनै ज्याच-गाच ठोकको पुङ्ङ यान्हाङ होखुरीकुङ बीढुवाकै सेम्ह माडुप्मन्या। 2 होटबाटै बार्हजाना प्रेरितकै पट्ट न विश्वासी कोलाक आर्घार डेया, “परमेश्वरौ बचन प्रचार जाट्की डासार ज्याच-गाच कास्च सेवा जाट्की कानकी सेम्ह माछान्ले। 3 होटबाटै भाइको, नाखुरीक लकीङ पवित्र आत्मा र बुद्धिये न्हेप्च र पट्ट लकीङ आदर डुप्च साट जना लेन्जा भर्मी भाक्नी अनी होखुरीककी न कानै इसे कामौ जीम्मा येहीङ। 4 टर काल्हाको चहीँ प्रार्थना र बचन प्रचार जाट्च कामाङ पुरा समय लग्डीसीङ।” 5 होटै प्रेरितकुङ इसे कुरा समुहुङ पट्ट कोलाक जाक्ङ सेया। होखुरीकै पवित्र आत्मै र विश्वासै न्हेप्च स्तिफनसकी भाका। होटै होखुरीकै फीलीप, प्रखरस, नीकनोर, तीमोन, पर्मिनास र एन्टीओखीयुङ पहीला अन्यजाति लेच चाहाँ यहूदी धर्म मन्डीच नीकोलाउसकी र भाका। 6 अनी होखुरीकै होसे भाक्च भर्मीकोलाक प्रेरितकुङ अगाडी राका र प्रेरितकै प्रार्थना जाटार होखुरीक मीटाक लहो मीहुट डा। 7 होटै परमेश्वरौ बचन फैलडीस्चै नुङा र विश्वासीकुङ सङ्ख्या यरूशलेमाङ साफ्फी बट्डीसा। अनी वास्टै पुजाहारीकै र येशूकी विश्वास जाटा। स्तिफनसकी घोच 8 स्तिफनसै परमेश्वरौ अनुग्रह र शक्तिये न्हेपार भर्मीकुङ मीघ्याङ चीन्हको र बा-बाड्सो अचम्मौ कामको जाटा। 9 टर कुडीक जना भर्मीकै चहीँ होच्यौ विरोध जाट्की ठाला। होखुरीक “सभाङुच इमुङ स्वतन्त्र” डेच डलुङ यहूदी भर्मीको लेया। र होखुरीक अलेक्जेन्ड्रिया सहर र कुरेनी, कीलीकीया र एसीया इलाकालकीङ राम्हन्या। होखुरीक पट्ट न खाटार स्तिफनसखाटा वाद-विवाद जाट्की ठाला। 10 टर पवित्र आत्मै स्तिफनसकी बुद्धियो आत्मा याहा, होसे ङाक्नाङ सुयेर होसकी जुकी माय्होका। 11 होटै होखुरीकै खुसुक्क भर्मीकोलाक सोटार इट डेकी लैडीया, “मोशा र परमेश्वरौ विरुद्धाङ निन्दा जाटार होचे ङाक्च कानै सेया।” 12 होटजाट्न होखुरीकै जनताकोलाक, अगुवा र धर्मगुरु कोलाक भड्कडीया र होखुरीकै स्तिफनसकी घोवार महासभाङ राका। 13 होटै होखुरीकै स्तिफनसौ बारेयाङ ङाक्की डेम झुटो साक्षीकोलाक लैडीया, “इसे भर्मीये सधैँ परमेश्वरौ पवित्र मन्दिर र व्यवस्थौ विरुद्धाङ ङाक्ले। 14 हीजैडेनाङ इचे इट डेच कानै सेया, ‘नासरतौ येशूये इसे ठाउँकी नास जाट्ले र मोशै कानकी याछ रीतिथितिकी र बदलीम याल्हे।’” 15 होला महासभाङ ङुच पट्टकै स्तिफनसकी सेम्हजा ङोसा र होच्यौ मीटाहा स्वरगडुटौ मीटाहा लेखा न चम्कडीस्च डाङा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.