प्रेरित 28 - पुर्वीय मगरपावल माल्टा टापुवाङ 1 कान सेम्हजा कीनाराङ रार्हखीङ होसे टापुओ म्यार्मीन माल्टा लेसा डेच कुरा थाहा छाना। 2 होलुङ भर्मीकै कानकी सेन्र माटान्हाक्च दया टान्हाका। नामास राहार जुङ्छबाटै होखुरीकै म्हे ढाक्ङ याहा र कान पट्टकी स्वागट जाटा। 3 पावलै काट बीटा सीङ जम्मा जाट्नन्या र होसे राकार म्हेयाङ का। म्हेये खान्छये जाट्नाङ काट बुल ख्योहार राहा र होच्यौ मीहुटाङ डोकाकार च्योल्होहा। 4 होलुङ भर्मीकै होच्यौ मीहुटाङ बुल च्योल्होछ डाङार मेखुरीक-मेखुरीक इट डेकी ठाला, “इसे भर्मीये पक्का र भर्मी साट्च छान्की पर्ले। इसे समुद्र लकीङ जीवार च राहा टर इन्साफ जाट्च डैव लकीङ इसे भीस्की माय्होका।” 5 टर पावलै चहीँ होसे बुलकी म्हेयाङ न झट्कारीम याहा र पावलकी हीर माछाना। 6 होला लेच भर्मीकै पावल अब कालापाङ बीसै जाट्नाङ सोकार सीले डेम ङोस्न ङुवा। टर वास्टै बेर सम्म र होसकी हीर माछाना। इसे डाङार होखुरीकुङ बीचार फेरीसा र छक्क पर्चै होखुरीकै डेकी ठाला, “इसे च देवता टी लेसा।” 7 होसे ठाँउलकीङ होसे टापुङ मुखीया पब्लीयसौ इम बारीको खेरेप न लेया। पब्लीयसै कानकी लहो इमाङ आल्हार स्वागट जाटा। कान सोम डीन सम्म आसकुङ न इमाङ पाहुना छानार ङुवा। 8 पब्लीयसौ बोइकी जरो राम्हन्या अनी मासी र पर्नन्या। होटबाटै पावल पब्लीयसौ बोयौ कोठाङ नुङ्ङ प्रार्थना जाट्चै लहो मीहुट बीरामी मीटाक डाच न्हुइङ आसको गेपा। 9 इसे घटना छान्रखीङ होसे टापुङ अरु रोगी भर्मीको र राहा अनी पावलै होखुरीककी गेपाका। 10 होखुरीकै कानकी वास्टै पर्कारै आदर जाटा। जब कान जहाजाङ काल्हा होखुरीकै कानकी लामाङ चहडीस्च जटी सामानको जहाजाङ काल्हाक्ङ याहा। पावल रोमाङ 11 सोम महीना न्हुइङ कान अलेक्जेन्ड्रियुङ जहाजाङ काल्हा। इसे जहाज हीउँडाङ इसे टापुवाङ न लेया। जहाजौ अगाडीयुङ भागाङ जुम्ल्याहा डेवटौ मूर्ति खोप्डीमन्या। 12 सुराकुसाइयाङ टाहार कान होला सोम डीन ङुवा। 13 होटै कान जहाजाङ काल्हार रेगीयनाङ टाराहा। पीउर्हाक लेखो दक्षिण लकीङ नाम्सु क्योसा र आपर्हीन लेखो कान पटीओलीयाङ टाराहा। 14 होला कानै विश्वासी डाजे-भाइकोलाक डुपा र होखुरीकै कानकी साट डीन सम्म होखुरीक खाटा न ङुकी बिन्ती जाटा। इटजाट्न कान रोमाङ टाराहा। 15 होटै कान रोमाङ राछ थाहा डीन्हार डाजे-भाइको कानकी डुप्की अप्पीयसौ बजार र सोम पाटी डेच ठावाङ राम्हन्या। इखुरीककी डाङार पावलै परमेश्वरकी धन्यवाद याहा र साहस डुपा। पावल रोम सहराङ 16 जब कान रोमाङ राहा टब पावलै काट जना सीपाहीयो रेखडेखाङ लाहा काट न ङुच अनुमटी डुपा। 17 सोम याक न्हुइङ पावलै यहूदीकुङ नेटाकोलाक आर्घा। होखुरीक भेला छान्रखीङ पावलै डेया, “डाजेभाइको, ङै काल्हौ जाति र काल्हौ बोइ-बाज्युको लकीङ क्योस्चै राछ रीटीरीवाजकुङ विरोधाङ हीर माजाट्नाङ र यहूदी डाजेभाइकै ङाकी यरूशलेमाङ घोवार रोमीकोलाक जीम्मा याहा। 18 रोमीकै केरकार जाट्रखीङ ङाकी डास्न याखी पा हीजैडेनाङ ङाकी ज्यान सजाय याखी पर्च हीर दोष माडुपा। 19 टर यहूदीकै विरोध जाट्च बाटै कैसर लेठाङ अपील जाट्की ङाकी कर लक्डीसा। ङा खाटा ङौ जातियो विरोधाङ दोष लैडीकी पर्च हीर कुरा माले। 20 होटबाटै ङै नाखुरीक खाटा डुपार गफ जाट्की डेम नाखुरीककी आर्घाच हो। ङा इसे साङ्लीयाङ छ्याम्हने हीजैडेनाङ ङा विश्वास जाट्ले इस्राएलौ आशा, मुक्ति याछ ख्रीष्ट राम्ह भ्यामने।” 21 होखुरीकै होसकी डेया, “कानै च नाकुङ विषयाङ यहूदियालकीङ कुसेर चीठी माडुप्ने। कुसेर कानुङ भाइकै राहार नाकुङ विरोधाङ हीर मास्च कुरा मासेटाक्ने, अनी माङाक्ङने र। 22 टर नाकुङ बीचार ही हो, होसे नाकोलकीङ सेकी मीमन ले। हीजैडेनाङ इसे डलौ बारेयाङ कानकी इडीक मट्टै थाहा ले की जटा-टटै भर्मीको नाकुङ समुहौ विरोधाङ ङाक्ङने।” 23 होखुरीकै पावलौ कुरा सेकी डीन टोक्डीया। टोक्डीच डीनाङ पहीला डेनाङ वास्टै यहूदीको भेला छानार पावल लेठाङ राहा। होसनीक पावलै गोराक लकीङ नाबीलाङसम्म परमेश्वरौ राज्यौ बारेयाङ शिक्षा याहा। मोशौ व्यवस्थाङ र अगमवक्ताकै रीक्च कुरा लार होचे येशूओ बारेयाङ पाहाक्चै होखुरीककी विश्वासाङ राक्की पा। 24 पावलै डेच कुरा कुडीकै विश्वास जाटा कुडीकै माजाटा। 25 होखुरीक लाहा लहाङ न माखाटार भाकी पाच बेलाङ पावलै डेया, “नाखुरीकुङ बोइ बाज्युकोलाक यशैया अगमवक्तालकीङ पवित्र आत्मै डेच बचन ठीक न लेया। आसकै डेया, 26 ‘इसे भर्मीको लेठाङ नुङार डेउ, सेकी च नाखुरीक सेले टर सेन्र माबुझडीस्ले, ङोस्की च ङोस्ले टर सेन्र माडाङ्ले। 27 हीजैडेनाङ इसे भर्मीकुङ मीमन बोढो छान्नने र होखुरीकुङ मेन्केप मासेच छान्न ने, र होखुरीकै लहो मीमीक बन्ड जाट्ले। नभा च होखुरीकै मीमीक डाङ्च लेया, मेन्केपै सेच लेया मीमनै बुझडीस्च लेया र ङा पटी ल्हेस्च लेया, र ङा नाखुरीककी गेपाक्च लेया।’” 28 अनी पावलै डेया, “होटबाटै नाखुरीककी थाहा छान्ख्यो की परमेश्वरौ मुक्तियो सेछ समाचार अन्यजातिकुङ लागी र बीर्न्हकाच हो र होखुरीकै सेले।” 29 [अनी होचे इसे बचन डेम भ्यारखीङ यहूदीको मेखुरीक-मेखुरीक न माखाटार वाद-विवाद जाट्चै भा।] 30 होटै पावल लहे न भाडाङ लार ङुच इमाङ पुरा नीस वर्षसम्म रोमाङ ङुवा र होसे लेठाङ राछको पट्टकी स्वागट जाटा। 31 होचे खुल्लम खुल्ला परमेश्वरौ राज्यौ प्रचार जाटा र प्रभु येशू ख्रीष्टौ बारेयाङ शिक्षा यान्हाङ सुयेर रोकडीकी मापा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.