प्रेरित 27 - पुर्वीय मगरपावलौ रोम यात्रा 1 जब बडा-हाकीमै समुन्द्रओ लाम छान्चै कान इटालीया नुङ्की पर्ले डेच निर्णय जाटा, टब होचे पावल र कुडीक जना कैडीकोलाक सम्राट् अगस्टसौ काट जना युलीयस डेच रोमी कप्तानौ जीम्माङ याहा। 2 एडारामीटेनोस लकीङ एसीयुङ वास्टै बन्दरगाहको छान्चै नुङ्च जहाजाङ काल्हार कान लाम लक्डीसा। माकेडोनीया इलाकाङ पर्च ठेसलोनीके लकीङ राछ अरिस्तार्खस डेच र कान खाटा न लेया। 3 पीउर्हाक लेखो कान सीदोन सहराङ जहाजीङ झाला। कप्तान युलीयसै पावलकी दया जाटार लहो लाफाको लेठाङ नुङार चहडीस्ठर सहायटा लाकी डेम अनुमटी याहा। 4 होटै कानुङ जहाज फेरी लाम लक्डीसा। जहाजौ अगाडी लकीङ नाम्सु क्योस्चबाटै कानै साइप्रस टापुओ आड लार नाम्सु छेलीचै नुङ्की पर्या। 5 कीलीकीया र पामफीलीया पारीपट्टीयुङ समुन्द्र टरीसार कान लुकीयुङ काट सहर माइराङ टाराहा। 6 होला इटालीया नुङ्च अलेक्जेन्ड्रियुङ काट जहाज डुपा र कप्तानै कानकी होला काल्हाक्ङ याहा। 7 वास्टै डीन सम्म बीस्टारै-बीस्टारै खाटा नुङार बल्ल क्नीडसाङ टाहा। नाम्सुये अगाडी नुङ्की माय्हाछबाटै केरेटौ टापुओ आड लाचै नाम्सु छेलीस्चै-छेलीस्चै कान सालमोने डेच ठाउँ छान्चै नुङा। 8 कान मुस्कीलखाटा होच्यौ कीनारै-कीनार सुन्डर बन्दरगाह डेच ठावाङ टाराहा। होटै लासीया सहर खेरेप लेया। 9 वास्टै समय र नुङ्ङभ्यामन्या, जहाज अगाडी व्हास्की र खटरा लेया हीजैडेनाङ यहूदीकुङ उपवासौ डीन र बीटडीस्न भ्यामन्या। होटबाटै पावलै होखुरीककी इट डेम सम्झडीया, 10 “ए लाफाको, ङाकी नीस्चय न इट सेमने, कान इटै जहाजाङ नुङा डेनाङ जहाज र मालसामानौ मट्टै हैन, टर कानुङ ज्यान समेट नुङ्की य्होक्च खटरा ले।” 11 टर कप्तानै पावलौ कुरा डेनाङ जहाज क्योट्च र जहाजौ मालीकै डेच कुराङ साप्फी विश्वास जाटा। 12 होखुरीक लेच ठावाङ हीउँड चेकी सुबिधा मालेचबाटै कुसे हालटाङ र फोनीक्स सहराङ न टाहार जुङ्छ बीटडीकी पर्ले डेयार होखुरीक मढ्याङ वास्टै लेखोये जहाज क्योट्की सल्लाह याहा। फोनीक्स चहीँ केरेटौ काट बन्दरगाह हो, इसे दक्षिण-पस्चीम र उट्टर-पस्चीम पट्टी ल्हेस्च ले। समुद्राङ आँढी बेहेरी राछ 13 जब दक्षिण लकीङ नाम्सु बीस्टारै क्योस्की ठाला, होखुरीकुङ योजना पुरा छाना डेम बीचार जाटार, लङ्गर डोनार होखुरीक केरेटौ कीनारै-कीनार छान्चै जहाज व्हास्की ठाला। 14 टर काटछीन न्हुइङ टापुलकीङ बाड्को आँढीबेहेरी उर्लडीसार कान पट्टी राहा, होसे उट्टर-पूर्वी डेच टुफान लेया। 15 अनी होसे आँढीये जहाजकी हुपा र होच्यौ अगाडी कानुङ हीर मालक्डीस्चबाटै जहाजकी कुलाक आल्हे आल्ख्यौ डेम कानै डास्न याहा। 16 होटै क्लौडा डेच काट माजा टापुओ आडाङ टार्हखीङ होचे आँढी चेक छेलीम याहा। अनी कानै मुस्कील खाटा जहाजौ न्हुङ्लाक छ्याक्च डुङ्गाकी जोगडीकी य्होका। 17 होसकी टान्डीयार जहाज भीत्री काल्हाक्रखीङ जहाज क्योट्चकै जहाजौ म्हाका लकीङ डोरीये बलीयो जाट्न छ्याक्चै राका। र सीरटीस डेच बालुवा लेच ढापाङ जहाज ठाल्हे डेम बीर्हीयार होखुरीकै पाल र झालाक्ङ याहा होटै जहाजकी नाम्सुओ भराङ डास्न याहा। 18 इटजाट्न आँढीये कानकी जोडखाटा गाराङ्चै पछारीचै जाट्न न लेया। होटै पीउर्हाक लेखो होखुरीकै जहाजाङ लेच कुडीक मालसामानको लोम्ह याहा। 19 आपर्हीन लेखो फेरी होखुरीकै लहो न मीहुटै जहाज क्योट्कीयो लागी चहडीस्च सामानको लोम्ह याहा। 20 वास्टै डीन सम्म नाखान, टुगा हीर डाङ्की माडीन्हा। आँढीबेहेरी जोड खाटा क्योस्न ङुचबाटै अन्टीमाङ कानै जीवाच आशा समेट डास्न याहा। 21 होखुरीकै हीर माज्याम ङुच वास्टै डीन छानन्या। होटबाटै पावलै होखुरीक लेठाङ राहार डेया, “लाफाको, नाखुरीकै ङौ सल्लाह मन्डीम केरेट लकीङ जहाज माक्योट्की पर्च लेया। होटै याङ्च बाड्को कष्ट र हानी काल्है भोग्डीकी मापर्च लेया। 22 टर ङा नाखुरीककी डेले, अब साहस जाट्नी। नाखुरीक मढ्य सुओर ज्यान मानुङ्ले। टर जहाज चहीँ नस्ट छान्ले। 23 हीजैडेनाङ ङा परमेश्वरौ भर्मी हो, र होसकुङ न ङा आराधना जाट्ले, छीनीङ नाबीक होसकुङ काट स्वर्गदूत ङा छीनी टोङ्हार 24 ङाकी डेया, ‘ए पावल माबीर्हीनी! नाको कैसरौ म्याहासाङ खडा छान्की न पर्ले। नाकुङ न कारनै परमेश्वरै नाकोखाटा जहाजाङ काल्छ जटी पट्टकुङ रक्छा जाट्ले।’ 25 होटबाटै लाफाको, साहस जाट्नी। हीजैडेनाङ ङा परमेश्वराङ विश्वास जाट्ले, की ङाकी कुङ्च डेम ने, ठीक होङ्च न छान्ने। 26 टर अब कान चहीँ कुसेर काट टापुवाङ ठोक्ले।” जहाज टुक्रा-टुक्रा छान्च 27 जब चौढ डीन छानन्या, एडीरीयास डेच समुन्द्राङ कानुङ जहाज हुट्टडीस्चै व्हामन लेया। टब आढा राटाङ जहाज क्योट्चकै कान कुसेर काट जमीनौ खेरेप टाम्ह न ले डेच अटकल जाटा। 28 अनी डी कुडीक्म लुप्च ले डेयार जाप्म ङोस्नाङ होखुरीकै सट्टीस मीटर पट्टा लैडीया। फेरी चेक पारी नुङार जाप्नाङ छब्बीस मीटर पट्टा लैडीया। 29 होटै कुसेर चट्टान मीटाक ठोक्की टाल्हे की डेम बीर्हीया। होखुरीकै जहाजौ न्हुङलाक पट्टीङ बुली लङ्गर झालाका। अनी गोराक छान्ख्यौ डेयार प्रार्थना जाट्की ठाला। 30 टर जहाज क्योट्चको चहीँ भोग्डीस्की डेयार जहाजौ अगाडी लकीङ लङ्गर झालाक्च बाहानै डुङ्गा समुन्द्राङ झालाक्ङ भ्यामनन्या। 31 अनी पावलै कप्तान र सीपाहीकोलाक डेया, “इसे जहाज क्योट्चको जहाजाङ माङुवा डेनाङ नाखुरीक जीवाकी माय्होक्ले।” 32 टब सीपाहीकै डुङ्गौ डोरीको चेम याहा, र डुङ्गाकी जोकाक्ङका। 33 भुक-भुक ट्याङ्खी पानाङ, पावलै होखुरीक पट्टकी ज्याच ठोक ज्यानी डेम बिन्ती जाट्चै डेया, “छीनी चौढ डीन छान्न भ्यामने, नाखुरीक अलमल्लाङ पर्यार हीर माज्याम मुलीन न ङुमने। 34 अब नाखुरीक हीर ज्याच ठोक ज्यानी डेम ङा बिन्ती जाट्ले। हीर ज्याच ठोक ज्या डेनाङ नाखुरीकै बल डुप्ले। माबीर्हीनी नाखुरीकुङ सुओर मीटालुङ काट मीछाम र नास माछान्ले।” 35 इसे कुरा डेम भ्यारखीङ पावलै रोटो ला, र पट्टकुङ म्याहासाङ परमेश्वरकी धन्यवाद याहार होसे रोटो ग्याकार ज्या। 36 टब होखुरीकै र हौसला डुपार ज्याच ठोक ज्या। 37 जहाजाङ लेचको कान जम्मा नीस सय छयहट्टर जना लेया। 38 होखुरीकै र्हास्ठर ज्या, होटै जहाजकी ख्याङ्छ पार्की डेयार होखुरीकै जहाजाङ लेच गहुँ पट्ट न लोम्ह याहा। 39 ट्याङ्र्हखीङ होखुरीकै काट कीनारा डाङा टर होखुरीकै होसे ठाउँ चीन्डीकी माय्होका। अनी होखुरीकै खाडीयाङ बालुवा लेच ठाउँ डाङा। य्होका डेनाङ होखुरीकै जहाजकी होला छेउ लैडीच योजना जाटा। 40 होटै होखुरीकै लङ्गरको चेयार समुन्द्राङ न डास्न याहा। होडीक न बेला पटवारकोलाक छ्याक्ङ डाच डोरीको फोसाक्ङ याहा। अनी अगाडी पट्टीयुङ पाल सोटार नाम्सु राछ पट्टी ल्हेट्न याहा र जहाजकी कीनार लाक बड्डीम आल्हा। 41 टर डी म्होकी लेच माडाङ्च बालुओ रासाङ जहाज ठोकार होला थाहा। जहाजौ अगाडीयुङ भाग हाका र क्योस्की माय्होका। अनी न्हुङ्लाकुङ भाग चहीँ डीयो जोड खाटा राछ छालकै ग्याक्की ठाला। 42 कैडीको पौडडीसार भोग्डीस्ले की डेयार सीपाहीकै होखुरीक पट्टकी साट्च सल्लाहा जाटा। 43 टर कप्तानै पावलकी जोगडीच मीमन जाट्च बाटै, होखुरीक सुकीर हीर जाट्की माय्हा। अनी पौडडीस्की य्होक्च जटी चहीँ जहाजीङ पहीला फाल ङापार पाखा ख्योखी डेच हुकुम होचे याहा, 44 होटै अरु बाँकी लेचको जटीकी चहीँ फल्याककोवाङ र जहाजौ टुक्राकोवाङ पारी पट्टी नुङ्की डेया। इटजाट्न कान पट्ट न सुरक्षा खाटा कीनाराङ टाहा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.