प्रेरित 26 - पुर्वीय मगर1 होटै न्हुइङ अग्रिपासै पावलकी डेया, “अब नाङ्की लहो पक्षलकीङ ङाक्की अनुमटी ले।” पावलै मीहुट फैलडीयार लाहाकी जोगडीकीयो लागी इटजाट्न ङाक्की ठाला, 2 “हे राजा अग्रिपास ज्यु, यहूदीकै ङाकी लैडीच पट्ट न दोषौ विषयाङ छीनी नाकुङ म्याहासाङ ङै लाहाकी जोगडीकीयो लागी ङाक्की डुप्नाङ ङा लाहाकी आसीस डुप्च आर्मीटले, 3 खास जाट्न हीजैडेनाङ यहूदीकुङ पट्ट न चालचलन र वाद-विवादौ कुराङ नाकोकी सेम्हजा थाहा लेचबाटै ङौ बयान धैर्य जाटार सेम यान्ही डेम ङा बिन्ती जाट्ले। 4 “ङा लहो देश र यरूशलेम सहराङ यहूदी जातिको मीघ्याङ होरा। होटबाटै पट्ट न यहूदीकोलाक ङौ जजालकीयुङ बानी बेहोरा थाहा ले। 5 होखुरीककी थाहा लेच न कुरा हो ङा लोच्च समयलकीङ कानुङ धर्मओ पट्ट डेनाङ कट्टर पन्ठी डल भीत्री काट फरीसी छानार ङौ जीवन बीटडीच जाट्नने। इडीक होखुरीकै मीमन जाटा डेनाङ इसे कुरौ गबाही होखुरीकै याखी य्होक्ले। 6 परमेश्वरै कानुङ बोइ-बाज्युकोलाक जाट्च प्रतिज्ञाङ भरोसा डाचबाटै ङै छीनी इटजाट्न नाखुरीकुङ म्याहासाङ ङा टोङ्हने। 7 कानुङ बार्ह कुलकै न इसे आशा डुप्कीयो लागी नाबीक नाम्सीन काट चीट्टये परमेश्वरकी आराधना जाट्ले। ए राजा अग्रिपास ज्यु! हीजैडेनाङ ङै र इसे न आशा डाचबाटै यहूदीकै ङाकी दोष लैडीमने। 8 परमेश्वरै सीच कोलाक जीवाक्ले डेच कुराङ नाखुरीकै हीजै विश्वास जाट्की माय्होक्ले? 9 “ले की च ङै र य्होक्ठर नासरतुङ येशूकी विरोध जाट्की पर्ले डेम आर्मीट्नन्या। 10 होटबाटै ङै यरूशलेमाङ विरोध जाटा र मुख्य पुजाहारीको लकीङ अधिकार डुपार प्रभु येशूकी विश्वास जाट्च वास्टै पवित्र भर्मीकोलाक ठुनाका र होखुरीककी साट्च बेला ङा र खाटा। 11 वास्टै खेप सभा ङुच इमकोवाङ होखुरीककी बारम्बार सजाय याम्ह होखुरीककी विश्वास जाट्की डासाक्च कोसीस जाटा। होखुरीकुङ विरोधाङ ख्योछ झोकै जाट्न अरु सहराङ र ङै नुङार होखुरीककी सटडीया। पावल परिवर्तन छान्च बारेयाङ बयान ( प्रेरित ९:१-१९ ; २२:६-१६ ) 12 “इटजाट्न मुख्य पुजाहारीको लकीङ अधिकार र आज्ञा डुपार ङा दमस्कस सहर पट्टी नुङ्ङ न लेया। 13 ए राजा, मढ्यडीनाङ लामाङ व्हामन लेनाङ ङै स्वर्ग लकीङ नाखान डेनाङ र चम्कडीस्च ज्योति डाङा। होसे चहीँ ङा र ङाखाटा व्हाच पट्टकुङ वरीपरी चम्कडीसा। 14 जब कान पट्ट न झाङ कुरुव्हा, होडीक न बेला हिब्रु भासाङ ङाकी इट डेच आवाज सेया, ‘साउल, ए साउल, नीये ङाकी हीजै सटडीच? गेम्ठाङ लाट्टीये यान्हाङ लहाकी न बीक्ले।’ 15 ङै डेया, ‘ए प्रभु, नाको सु आले?’ प्रभुये ङाकी डेया, ‘ङा येशू हो, सुकी नीये सटडीमन ले। 16 अब सोना, ङा नाङ्की ङौ सेवक र ङौ गबाही याछ भर्मी खास्ले। इटबाटै ङा नाङ लेठाङ डाङ्च हो। नीये ङौ बारेयाङ डाङ्च कुरा र ङै नाङ्की टान्हाक्च कुराको पट्ट न भर्मीकोलाक सेटाक्की पर्ले। 17 ङा नाङ्की नुओ लहो जाति र अन्यजातिको लकीङ छुटकरा याल्हे। ङा नाङ्की होखुरीक लेठाङ बीर्न्हकाले, 18 होखुरीकुङ मीमीक खोलीम याहार होखुरीककी छुम्छलकीङ ट्याङ्ठाङ र शैतानौ शक्तिलकीङ परमेश्वर पट्टी ल्हेसाक्की पर्ले। होखुरीकै ङा मीटाक विश्वास जाट्ले। होखुरीकुङ पाप मेटडीसार नुङ्ले र होखुरीकै परमेश्वरकी चीन्डीच भर्मीकुङ सङ्गटीयाङ ङुकी डुप्ले।’ 19 “ए राजा अग्रिपास, स्वर्ग लकीङ डाङ्च इसे दर्शनाङ ङा अनाज्ञाकारी माछाना। 20 टर पहीले दमस्कसाङ, टब यरूशलेमाङ र सारा यहूदिया देशभरी लेचकोलाक र अन्यजातिकोलाक र पापको डासार परमेश्वर पट्टी ल्हेसो र लाहा पापको डासार परमेश्वर पट्टी ल्हेस्च योग्यौ काम जाटो डेयार ङै प्रचार जाटा। 21 होटबाटै यहूदीकै ङाकी मन्दिराङ घोवार साट्की पा। 22 टर छीनीयुङ डीन सम्म ङै परमेश्वर लकीङ न सहायटा डुप्म ङुमने। होटबाटै ङा इला लेच बाड्को र मार्जा पट्ट कोलाक गबाही याछै टोङ्हने। ङै अगमवक्ताकै र मोशै डेच न्हुइङ छान्च कुराको मट्टै ङाक्ने। 23 होखुरीकै इट डेले, मुक्ति याछ ख्रीष्टै डुख भोग्डीयार सीकी पर्ले, होसको सीच लकीङ जीवाच मढ्याङ पट्ट डेनाङ पहीलो छान्चबाटै होसकै लहो जाति र अन्यजाति कोलाक ज्योतियो घोसना जाट्ले।” 24 पावलै डेच इसे कुरा सेयार फेस्तसै च्याकार डेया, “पावल नाङ बौलडीस्न ने, नुओ वास्टै ज्ञानै नाङ्की बौलाहा खासा!” 25 टर पावलै डेया, “माननीय फेस्तस, ङा बौलडीस्च होइन, ङा सड्ढे र सत्य कुराको जाट्न न ले। 26 हीजैडेनाङ अग्रिपास राजा मेखोलै र इसे कुरा वार्ल्हे, होसकोकी ङा इसे कुराको साहास खाटा डेकी य्होक्ले। होसकै अवस्य इसे कुराकोवाङ सेम्ह ढ्यान याम्हने, हीजैडेनाङ इसे कुराको सुयेर थाहा माढीन्न जाट्च होइन। 27 ए राजा अग्रिपास, ही नाकै अगमवक्ताको मीटाक विश्वास जाट्ले? ङाकी थाहा ले, नाकै विश्वास जाट्ले।” 28 अग्रिपासै पावलकी डेया, “इडीक ठोरै समयाङ नाङ ङाकी ख्रीष्टीयन खास्च मीमन जाट्ले?” 29 पावलै जवाफ याहा, “ठोरै समय लेख्यो की वास्टै, ङा परमेश्वर खाटा प्रार्थना जाट्ले, नाको मट्टै होइन टर छीनी ङौ कुरा सेच जटी पट्ट न इसे साङ्लीको बाहेक ङा ल्याक्च न छान्ख्यो।” 30 टब राजा अग्रिपास, बडा-हाकीम फेस्तस, बरनीकी र होला ङुचको जटी पट्ट न सोवा। 31 होटै होखुरीक ख्योछ न्हुइङ लाहा लाहाङ इट डेचै कुरा जाटा, “इसे भर्मीये मृत्यु दण्ड डुप्च अठबा कैडी छान्की पर्च हीर काम माजाट्नने।” 32 अग्रिपासै फेस्तसकी डेया, “इचे कैसरलेठाङ अपील माजाट्च लेनाङ च इसे भर्मीकी डास्न यान्हाङ र छान्च लेया।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.