प्रेरित 25 - पुर्वीय मगरफेस्तसौ म्याहासाङ पावलौ मुड्डा 1 फेस्तस लाहा बडा-हाकीम छान्च बाटै लहे डुप्च नयाँ जीम्मेवारीको लाकी कैसरीयाङ राहा। होटै सोम याक न्हुइङ यरूशलेमाङ नुङा। 2 जब होसे होला टाहा र होलुङ मुख्य पुजाहारीको र यहूदीकुङ मुख्य-मुख्य भर्मीकै पावलौ विरुद्धाङ दोष लैडीया, 3 अनी होसकी लामाङ न साट्च योजना खासार होखुरीकै पावलकी यरूशलेमाङ बीर्न्हकाम यान्ही डेयार बिन्ती जाटा। 4 टर फेस्तसै होखुरीककी डेया, “पावल कैसरीयाङ न ठुन्न ने, ङा र छीटो न होला नुङ्ङ न ले। 5 होटबाटै नाखुरीक मढ्युङ शासकको होला ङाखाटा नुङ्ख्यो, र पावलौ हीर गल्टी ले डेनाङ होखुरीकै उजुर याख्यौ।” 6 फेस्तस आठ-डस डीन सम्म यरूशलेमाङ ङुवार कैसरीयाङ ल्हेस्की क्योटा। होटै पीउर्हाक लेखो न न्याय जाट्च ठावाङ ङुवार होचे पावलकी राक्की डेम हुकुम याहा। 7 पावल टाराहा, अनी यरूशलेमीङ राछ यहूदीकै होसकी वरीपरी घेरीयार होच्यौ विरोधाङ बाड्को खाल-खाल्या दोषको लैडीया। टर होसे दोषकुङ कुसेर प्रमाण होखुरीकै याखी माय्होका। 8 पावल लहो पक्छ्याङ ङाक्चै डेया, “ङै यहूदीकुङ व्यवस्थौ विरुद्धाङ, मन्दिरौ विरुद्धाङ र कैसरौ विरुद्धाङ हीर अपराध माजाट्नने।” 9 टर यहूदीकोलाक खुसी पार्कीयो लागी फेस्तसै पावलकी डेया, “ही नाङ यरूशलेमाङ नुङार होला ङौ म्याहासाङ इसे कुराकुङ विषयाङ न्याय जाट्ख्यौ डेच मीमन ले?” 10 पावलै डेया, “ङा कैसरौ न्याय जाट्च ठाओ म्याहासाङ खडा ले, इला न ङौ न्याय छान्की पर्ले। ङै यहूदीकुङ विरोधाङ हीर मासेछ काम माजाट्नने, इसे बारेयाङ नाकोकी सेम्हजा थाहा ले। 11 इडीक ङा अपराधी हो, र ङै सीकी पर्च सजाय डुप्च कुसेर काम जाट्नने डेनाङ ङा सीकी र टयार ले। टर इखुरीकै ङाकी लैडीच दोष साँचो हैन डेनाङ ङाकी इखुरीकुङ मीहुटाङ सुयेर याखी माय्होक्ले। ङा कैसरकी अपील जाट्ले।” 12 होटै फेस्तस मेल्हाकी सल्लाहा याछको खाटा सल्लाहा जाटार होचे पावलकी डेया, “नीये कैसर लेठाङ अपील जाटा, होटबाटै ङा नाङ्की कैसर लेठाङ न बीर्न्हकाले।” फेस्टसै अग्रिपास राजा खाटा सल्लाहा लाच 13 हीर डीन न्हुइङ फेस्तसकी स्वागट जाट्की अग्रिपास राजा र बरनीकी कैसरीयाङ राहा। 14 होखुरीक होला कालाप ङुरखीङ फेस्तसै पावलौ कुरा राजौ म्याहासाङ इट डेम डा, “फेलीक्सै ठुनार नुङ्च काट जना भर्मी इला ले। 15 होच्यौ बारेयाङ, ङा यरूशलेमाङ लेनाङ, मुख्य पुजाहारीको र यहूदीकुङ धर्मगुरुकै होच्यौ विरुद्धाङ दोष लैडीयार होसकी दण्ड याखी पर्ले डेम ङाखाटा बिन्ती जाटा। 16 टर ङै होखुरीककी डेया, ‘रोमीकुङ चलनाङ भर्मीकी दोषी माठहरीस्ठर दण्ड याछ चलन माले। दोष लैडीच भर्मीकुङ म्याहासाङ दोषी भर्मीये लहो बारेयाङ ङाक्की डीन्खी पर्ले।’ 17 होटबाटै जब होखुरीक इला भेला छाना, टब ढीलो माजाट्न न पीउर्हाक लेखो ङा न्याय जाट्च ठावाङ ङुवा र पावलकी राक्की डेम ङै आज्ञा जाटा। 18 जब पावलकी दोष लैडीच विरोधीको खडा छाना, टर ङै सोच्डीच लेखा होचे अपराध जाट्च कुसेर कुराकुङ दोष होखुरीकै होसकी लैडीकी माय्होका। 19 टर होखुरीकुङ झगडा चहीँ मेखुरीकुङ न धर्मओ र सीम भ्याच येशू म्यार्मीनुङ भर्मीयो बारेयाङ लेसा। पावलै चहीँ येशू जीउडै ले डेयार पक्का जाट्न डेमन्या। 20 इसे कुरौ बारेयाङ ङा अलमल्ल पर्चबाटै छानबीन जाट्की यरूशलेमाङ नुङ्च होच्यौ मीमन ले की डेयार ङै होसकी गीना। 21 टर पावलै रोमी सम्राट् लकीङ फैसला माछान्ठर ङाकी हीरासटाङ न डाकी डेयार बिन्ती जाटा। होसकी कैसर लेठाङ बीर्न्हमाकाठर हीरासटाङ न डाकी डेम ङै आज्ञा याहा।” 22 अग्रिपासै फेस्तसकी डेया, “इसे भर्मीयो कुरा ङा लहे न सेकी मीमन ले।” अनी होचे डेया, “नाकै पीउर्हाक न सेनी।” पावल अग्रीपासौ म्याहासाङ 23 पीउर्हाक लेखो अग्रिपास र बरनीकी बाड्को सम्मान खाटा सेनापटीको र सहरुङ पट्टये मन्डीच भर्मीको खाटा सभाइम भीत्री पर्या। होटै फेस्तसौ आज्ञा डुपार पावलकी होला हाजीर जाटाका। 24 फेस्तसै डेया, “राजा अग्रिपास र इला राछ पट्ट न मान्यजनको, नाखुरीकै इसे भर्मीकी डाङने। इच्यौ न बारेयाङ पट्ट यहूदीकै बाड्को सोरै डेया, ‘अब इसे भर्मी जीवाकी माढीन्ले’ डेयार यरूशलेमाङ अनी इला र ङाखाटा बिन्ती जाट्नन्या। 25 टर इचे सीकी पर्च सजाय डुप्च दोष हीर ङै माडुपा। इसे मेल्है र रोमी सम्राट् लेठाङ अपील जाट्च बाटै इसकी ङै बीर्न्हकाच निर्णय जाटा। 26 टर इच्यौ बारेयाङ ङै रोमी सम्राट्की ही रीक्की पर्च हो होसे ङाकी थाहा माछाना। होटबाटै ङै होसकी नाखुरीकुङ म्याहासाङ अनी खास जाट्न राजा अग्रिपास, नाकुङ म्याहासाङ राक्की मीमन जाट्च हो। नाखुरीकै इसकी जाँचबुज जाट्रखीङ ङै हीर कुरा रीक्की डुप्ले डेच आशा डामने। 27 हीजैडेनाङ कैडीयो विरुद्धाङ हीर दोष माडुप्म होसकी बीर्न्हकाकी ङाकी सेम्ह मासेले।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.