प्रेरित 24 - पुर्वीय मगरपावल फेलीक्सौ म्याहासाङ 1 बाङायाक न्हुइङ प्रधान पुजाहारी हननीये कुडीक जना यहूदी अगुवाकोलाक र तर्तुल्लस डेच काट जना वकीलकी लार कैसरीयाङ राहा। होखुरीकै पावलौ विरुद्धाङ बडा-हाकीमौ अगाडी उजुर जाटा। 2 पावलकी होला राक्च पछी तर्तुल्लसै होसकी इट डेम दोष लैडीकी ठाला, “माननीय फेलीक्स ज्यु, वास्टै वर्ष लकीङ नाको लकीङ कानै बाड्को शान्ति डुप्न ने। कानुङ जातियो लागी नाकै सुधारको र सुरु जाट्नने। 3 अनी इसे कुरा कान धन्यवाद साथ सधैँ स्वीकार जाट्ले। 4 टर ङा नाकुङ वास्टै समय मालाले, दया जाट्न कानै डेच कुराको सेम यान्ही। 5 कानै इसे भर्मीकी पट्ट पट्टी डुख याम्ह व्हाच र संसार भरीयुङ यहूदीकुङ मीघ्याङ हुलडुङ्गा मच्चडीच, र नासरीकुङ डलौ मुख्य अगुवा छानार व्हाच डुप्मन ने। 6 इचे परमेश्वरौ मन्दिर र अपवित्र खास्च कोसीस जाट्नन्या, होटबाटै इसकी कानै घोवा। [र कानुङ व्यवस्था अनुसार कानै होसकी कारबाही जाट्च नीढो जाटा। 7 टर सेनापटी लुसीयसै कानलेठाङ राहार जबरजस्टी खाटा होसकी कानुङ मीहुटीङ स्याटार आल्हा। 8 अनी नाकै पावलौ विरुद्धाङ दोष लैडीच भर्मीकोलाक नाकोलेठाङ राछ आज्ञा याहा।] अब नाको लहे न इसकी गीना डेनाङ कानै इसकी लैडीच दोषौ बारेयाङ पट्ट न इसे लकीङ न थाहा डीन्ल्हे।” 9 अरु यहूदीकै र तर्तुल्लसै डेच कुरा पट्ट न साँचो हो डेया। पावलै लहे हीर गल्टी माजाट्नने डेम ङाक्च 10 बडा-हाकीमै पावलकी ङाक्की इसारा जाट्छ पछी पावलै जवाफ याहा, “वास्टै वर्ष अघीलकीङ नाको यहूदी जातिकुङ न्यायाधीश छान्च कुरा ङाकी थाहा लेचबाटै ङा ङाल्हौ बारेयाङ खुसी खाटा ङाक्ले। 11 ङा यरूशलेमाङ आराधना जाट्की नुङ्च बार्ह डीन डेनाङ वास्टै माछान्न ने। इसे कुरा नाकै सजीलो खाटा पट्टा लैडीकी य्होक्ले। 12 यहूदीकै ङाकी कुसे भर्मी खाटा र झगडा जाट्न ङुच माडाङ्ने र मन्दिर, सभाङुच इमकोवाङ न ट सहराङ न भर्मीकोलाक सुरडीच डुप्मन ने। 13 न ट इखुरीकै ङाकी चाँहा दोष लैडीच कुराकुङ प्रमाण न याखी य्होक्ले। 14 टर ङा इसे कुरा नाकुङ न म्याहासाङ मन्डीले। प्रभुओ लाम अनुसार मोशौ व्यवस्थाङ लेच कुरा अनी अगमवक्ताकुङ कीताबाङ रीक्च पट्ट न कुरा विश्वास जाटार ङौ बोइ-बाजुकुङ परमेश्वरौ ङा आराधना जाट्ले, कानुङ इसे दलकी होखुरीकै काट झुटो डल हो डेले। 15 धर्मी र अधर्मी नीस न सीच लकीङ जीवाम सोले डेच कुराङ इखुरीक लहे न मन्डीच लेखा न ङै र परमेश्वराङ आशा डामने। 16 होटबाटै परमेश्वर र भर्मी पट्टी ङा सधैँ शुद्ध बीबेक डाच कोसीस जाट्ले। 17 “वास्टै वर्ष न्हुइङ लहो जातिकुङ लागी डान र परमेश्वरकी भेटी याखी डेम ङा यरूशलेमाङ ल्हेस्न राछ हो। 18 जब ङा इसे काम जाट्न न लेया होखुरीकै ङाकी मन्दिराङ डुपा। होडीक बेला ङै अगाडी न शुद्ध छान्च बीढी पुरा जाट्न भ्यामन्या। होला कुसेर भीड मालेया, होहल्ला र मालेया। टर होला एसीयुङ कुडीक यहूदीको चहीँ लेया। 19 इडीक ङौ विरोधाङ हीर कुरा ले डेनाङ होखुरीक लाहा न इला नाकुङ म्याहासाङ राहार उजुर याखी य्होक्च लेया। 20 की ट इसे भर्मीकै लहे न इला डेख्यौ-ङा महासभौ म्याहासाङ टोङ्न्हाङ इखुरीकै ङौ बारेयाङ ही दोष डुप्मन्या? 21 इसे काट जा कुरा मट्टै हो, होखुरीकुङ मीघ्याङ टोङ्हार ङै बाड्को सोरै डेमन्या, ‘सीचको फेरी जीवाम सोले डेच विषयाङ छीनी नाखुरीकुङ म्याहासाङ इसे ङौ मुड्डा क्योस्न ने।’” 22 हीजैडेनाङ प्रभुओ लामौ बारेयाङ फेलीक्सकी सेम्हजा ज्ञान लेचबाटै होचे इसे कुराको सेरखीङ होखुरीककी इट डेयार टारीम का, “सेनापटी लुसीयस इला रार्हखीङ ङा नाखुरीकुङ मुड्डौ फैसला जाट्न याल्हे।” 23 होटै फेलीक्सै पावलकी सेम्ह पहरा याहार डाकी, टर होसकी सार्है कडा माजाट्की, अनी होसकी खाँचो पर्च कुराङ साहायटा जाट्च होच्यौ लाफाकोलाक मारोक्डीकी डेयार कप्तानकी आज्ञा याहा। फेलीक्स र द्रुसिल्लौ म्याहासाङ पावल 24 हीर डीन न्हुइङ फेलीक्स लहो यहूदी मास्टो द्रुसिल्लाकी लार राहा। अनी होचे पावलकी आर्घार ख्रीष्ट येशूकी विश्वास जाट्च बारेयाङ पावल लकीङ सेया। 25 जब पावलै सेछ कामको जाट्की, लहो मीमनकी बसाङ डाकी र होसे राछ न्यायौ बारेयाङ कुरा जाटा, टब फेलीक्स बीर्हीयार इट डेया, “चहुँङ लागी नाको नुङ्नी, मौका डुप्च बेलाङ ङा नाकोकी आर्घाले।” 26 फेलीक्सै पावल लकीङ हीर पैसा डुप्ले की डेम आशा जाट्नन्या। होटबाटै होचे पावलकी घरीघरी आर्घार कुरा जाट्च जाट्नन्या। 27 टर नीस वर्ष न्हुइङ फेलीक्सौ बडलाङ पर्कीअस फेस्तस बडा-हाकीम छानार राहा। अनी फेलीक्सै यहूदीकोलाक खुसी पार्की डेम पावलकी झ्यालखानाङ न डार नुङा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.