प्रेरित 23 - पुर्वीय मगर1 पावलै महासभा पट्टी मीमीक चीम माजाट्न ङोसार डेया, “ए डाजे-भाइको, छीनी सम्म परमेश्वरौ मीमीकाङ ङै शुद्ध बीबेकै जीवन बीटडीमने।” 2 इसे कुरा सेयार प्रधान पुजाहारी हननीये मेन छेवाङ टोङ्छकोलाक पावलौ मेङेराङ हीर्कडीकी डेम आज्ञा याहा। 3 टब पावलै होसकी डेया, “ए चुनै लाक्च बोच भीट्टा! नाङ्की र परमेश्वरै हीर्कडीले। नाङ मोशौ व्यवस्था अनुसार ङौ न्याय जाट्की ङुवार ही मोशौ व्यवस्था बीपरीट ङाकी हीर्कडीकी आज्ञा याल्हे?” 4 अनी होच्यौ छेवाङ टोङ्छकै डेया, “ही नाङ परमेश्वरौ प्रधान पुजाहारीयो अपमान जाट्ले?” 5 टब पावलै डेया, “ए डाजे-भाइको, होसे प्रधान पुजाहारी हो डेच ङाकी थाहा मालेया। हीजैडेनाङ रीक्ङने, ‘नीये लहो जनटौ शासकौ विरोधाङ मासेछ कुरा माङाक्की।’” 6 टर होसे महासभाङ काट दल सदुकी र अर्को डल फरीसीको लेसा डेच थाहा छानार पावलै बाड्को सोराङ डेया, “ए भाइको, ङा फरीसी हो र फरीसीकुङ न मीजा हो। सीच लकीङ जीवाले डेच आशा डाचबाटै ङौ मुड्डा क्योस्न ने।” 7 अनी पावलै इसे कुरा डेच कारनै सदुकी र फरीसीकुङ मीघ्याङ माखाटा र भीडाङ फाटो छाना। 8 हीजैडेनाङ सदुकीकै इट डेले सीचको फेरी जीवाम सोले, स्वर्गदूत, आत्मा डेच हीर माले। टर फरीसीको होसे पट्ट न मन्डीले। 9 होचे जाट्न महासभाङ बाड्को हल्ला छाना। फरीसी समुहुङ कोइ-कोइ धर्मगुरु खडा छानार इट डेचै विरोध जाटा, “इसे भर्मीयाङ कानै हीर खराबी माडुप्ने। इडीक आत्मा वा स्वर्गदूतै इसकोकी इट डेच हो डेनाङ ही ट?” 10 होला बाड्को मतभेद छान्रखीङ होखुरीकुङ मीहुट लकीङ पावलकी च्याट्चुट पार्यार साट्ले औँला डेम बीर्हीयार सेनापटीये पावलकी होखुरीकुङ मीघीङ जबर जस्टी डोनार ब्यारेक भीत्री आल्खी डेम सेपाहीकोलाक आज्ञा याहा। 11 छीनी नाबीक प्रभुये पावलौ खेरेप टोङ्हार डेया, “पावल, साहास जाटो! कुटजाट्न नीये यरूशलेमाङ ङौ विषयाङ गबाही याहा, होटजाट्न न नीये रोमाङ र गबाही याखी पर्ले।” पावलकी साट्की षड्यन्त्र जाट्च 12 गोराक ट्याङ्रखीङ यहूदीको भेला छानार पावलकी साट्च सल्लाह जाटा र होखुरीकै इट डेम शपथ ज्या, “पावलकी मासाट्ठर कान हीर माज्याले र डी र मागाले।” 13 इटजाट्न साट्ले डेम शपथ ज्याच भर्मीको चालीस जना डेनाङ वास्टै लेया। 14 होस न्हुइङ होखुरीकै मुख्य पुजाहारीको र धर्मगुरुको लेठाङ नुङार डेया, “पावलकी मासाट्ठर कान हीर माज्याले डेम कानै बलीयो शपथ ज्यामने। 15 होटबाटै नाखुरीक र महासभा खाटार सेनापटीकी अपील जाट्नी र पावलौ मुड्डौ निर्णय अझै ठीक टरीकै जाट्की पर्ले डेच बहाना खासार होसकी डोनाक्ङ यान्ही। अनी होसे इला राछै जाट्नाङ न कान होसकी साट्की टयार छानार ङुले।” 16 टर पावलौ भान्जै इसे कुरा थाहा डीन्हा। होटै होचे ब्यारेक भीत्री नुङार पावलकी सेटाका। 17 पावलै कप्तानको मढ्याङ काट जनाकी आर्घार डेया, “इसे रेन्जा जजाकी सेनापटी लेठाङ टाहाक्ङ यान्ही, हीजैडेनाङ इच्यौ आसको खाटा हीर डेच कुरा ले।” 18 कप्टानै पावलौ भान्जकी सेनापटी लेठाङ टाहाक्ङ याहार डेया, “बन्दी पावलै ङाकी आर्घार इसे रेन्जा जजाकी नाको लेठाङ आल्खी डेमने, नाकोकी डेकी पर्च हीर कुरा ले, टा।” 19 सेनापटीये होच्यौ मीहुट घोवार सुर मालेठाङ आल्हार गीना, “नीये ङाकी डेकी पाच कुरा ही हो?” 20 होचे डेया, “यहूदीकै पावलौ विषयाङ अझै सेम्ह गीन्च नीउ जाटार पीउर्हाक होसकी महासभाङ राक्ङ यान्ही डेम नाकोखाटा अनुरोध जाट्च छान्न ने। 21 टर नाकै होखुरीकुङ कुरा मासेनी हीजैडेनाङ चालीस जना डेनाङ वास्टै यहूदीकै ‘पावलकी मासाट्न हीर माज्याले र डी र मागाले’ डेम शपथ ज्यार होसकी साट्की रुङार ङुमने। अब होखुरीक होसकी साट्की डेम टयार छान्न ने र नाकुङ बचनौ आशा जाट्नने।” 22 होटबाटै सेनापटीये होसे रेन्जा जजाकी इट डेम आज्ञा याम्ह बीर्न्हका, “नीये ङाकी इसे खबर याछ कुरा सुकीर माडेकी।” पावलकी बडा-हाकीम फेलीक्स लेठाङ बीर्न्हकाच 23 होटै न्हुइङ सेनापटीये कप्तानको मढ्याङ नीस जनाकी आर्घार डेया, “छीनी नाबीक नौ बजे पट्टी नीस सय सीपाहीको, सट्टरी जना घोडा काल्छको र नीस सय भाला लाचकोलाक कैसरीया सम्म नुङ्की टयार खास्न डानी। 24 अनी पावलौ लागी र घोडा ठीक पार्की आसकोकी सुरक्षाखाटा बडा-हाकीम फेलीक्स लेठाङ टाहाक्की।” 25 इडीक डेम भ्यारखीङ होसे सेनापटीये बडा-हाकीमकी इट डेयार चीठी रीका: 26 “माननीय हाकीम फेलीक्सकी, क्लौडीयस लुसीयसौ अभिवादान! 27 इसे भर्मीकी यहूदीकै घोवार साट्की पामन्या टर इसे रोमी नागरीक लेसा डेम ङै थाहा डुपा र ङा फौजखाटा होला टाम्ह इसकी भाकार राक्च। 28 कुसे अभीयोगाङ होखुरीकै इसकी दोष लैडीमेसा डेम वार्छ मीमनै ङै इसकी होखुरीकुङ महासभाङ राका। 29 होखुरीकै मोशौ व्यवस्थौ परस्नओ बारेयाङ इसकी दोष लैडीमनेसा। टर साट्की अठबा ठुन्की पर्च हीर दोष ङै माडुपा। 30 यहूदीकै इसे भर्मीकी साट्की पामने डेच कुरा ङै थाहा डीन्छ बाटै इसकी तुरुन्तै नाको लेठाङ बीर्न्हकाम ने। इसकी दोष लैडीच यहूदीकोलाक र नाको लेठाङ न उजुर जाट्की डेम आज्ञा याम्हने।” 31 होटै आज्ञा डुप्म भ्यारखीङ सीपाहीकै पावलकी नाबीक न एन्टीपार्टीसाङ टाहाका। 32 पीउर्हाक लेखो पैडल नुङ्च सीपाहीकै चहीँ पावलकी घोडाङ काल्हार नुङ्ङ न लेच सीपाहीकोलाक जीम्मा याहार यरूशलेमाङ ल्हेसा। 33 कैसरीयाङ टाछ न्हुइङ होखुरीकै हाकीमकी चीठी याहार पावलकी र होच्यौ म्याहासाङ हाजीर जाटाका। 34 होचे चीठी परेस्रखीङ होसे कुसे जील्लुङ हो डेम गीना। होसे कीलकीयुङ हो डेम थाहा डीनरखीङ होचे डेया, 35 “नाङकी अभीयोग लैडीचको राछ न्हुइङ नुओ मुड्डा सेले।” अनी होचे होसकी हेरोदै खास्च दरबाराङ कैडी खासार डाकी डेम हुकुम जाटा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.