प्रेरित 22 - पुर्वीय मगर1 “डाजे भाइ टठा बोइको, नाखुरीकुङ म्याहासाङ ङै ङाल्हौ पक्छ्याङ डेकी पर्च कुरा अब सेनी।” 2 इटजाट्न पावल हिब्रू भासाङ ङाक्च सेयार होखुरीक झन माच्याक्ङ ङुवा। होटै पावलै डेया, 3 “ङा कीलीकीयुङ टार्सस सहराङ डीन्छ काट यहूदी हो। टर ङा इसे यरूशलेम सहराङ गमलीएलौ शिक्षाङ होर्च हो। कानुङ बोइ बाज्युकै मन्डीम राछ मोशौ व्यवस्था धर्मशास्त्रओ शिक्षा अनुसार ङै सेम्ह खाटा पाम्हने। छीनी नाखुरीक परमेश्वराङ कुडीक जोसीलो ले, होडीक न जोसीलो ङा र लेया। 4 ङै प्रभुओ लामाङ व्हाच भर्मीकोलाक साप्फी डुख याहार साट्की र पा। लेन्जा, मास्टो पट्टकी घोवार ठुन्की लैडीया। 5 र इसे बारेयाङ प्रधान पुजाहारी र पट्ट न महासभै र ङौ पक्षाङ गबाही याल्हे। होखुरीकै न ङाकी दमस्कसाङ लेच यहूदी डाजे-भाइकुङ म्यार्मीनाङ पुर्जीको याहा, र होला लेच विश्वासीकोलाक छ्याकार यरूशलेमाङ राक्ङ सजाय याखी डेम ङा दमस्कसाङ नुङ्ङन लेया। लहो परिवर्तनौ बारेयाङ पावलौ बयान ( प्रेरित ९:१-१९ ; २६:१२-१८ ) 6 “ङा दमस्कसाङ टाखी पानाङ मढ्य डीन छान्नन्या। होडीक न बेला मोसोमायाङ स्वर्ग लकीङ काट बाड्को ज्योति ङौ वरीपरी चम्कडीसा, 7 ङा झाङ कुरुव्हा। अनी ङाकी इट डेचै जाट्च काट आवाज ङै सेया, ‘ए साउल, ए साउल नीये ङाकी हीजै सटडीच?’ 8 अनी ङै गीना, ‘ए प्रभु, नाको सु हो?’ होसकै ङाकी डेया, ‘नासरतुङ येशू ङा न हो, होसकी न नीये सटडीमन ले।’ 9 ङा खाटा लेचकै जोटी च डाङा, टर ङा खाटा ङाक्च आवाज चहीँ माबुझडीसा। 10 अनी ङै डेया, ‘ए प्रभु, अब ङा ही जाटीङ?’ प्रभुये ङाकी डेया, ‘सोना, दमस्कसाङ नुङ्ना र नीये जाट्की पर्च कामौ बारेयाङ नाङ्की पट्ट न डेम याल्हे।’ 11 होसे ज्योतियो टेजै जाट्न ङै हीर डाङ्की माय्होका होटबाटै ङाखाटा लेचकै ङौ मीहुट घोवार डोरीम ङाकी दमस्कसाङ राका। 12 “होसे सहराङ हननीया डेच काट जना भर्मी ङुमन्या। होसे परमेश्वरौ भक्ट र मोशौ व्यवस्था सेम्ह मन्डीच भर्मी लेया र दमस्कसाङ लेच पट्ट यहूदीकै होसेकी मान जाट्नन्या। 13 होसे भर्मी ङा छीनी राहार ङाकी डेया, ‘ए साउल भाइ, मीमीक डाङ्नी।’ अनी होडीक न बेला ङै मीमीक डाङा, र होसकी डाङ्की य्होका। 14 अनी होचे डेया, ‘कानुङ बोइ-बाज्युकुङ परमेश्वरै होसकुङ इच्छा नाकै वार्खी, र होसे धार्मिक भर्मी येशूकी डाङ्की, र होसकुङ मेङेरीङ ख्योछ बचन सेकी नाकोकी चुन्डीमनेसा। 15 हीजैडेनाङ पट्ट न भर्मीकुङ म्याहासाङ होसकुङ लागी नाकै ही डाङ्ङ ने र सेम ने, होच्यौ साक्षी नाको छान्ले। 16 होटबाटै अब हीजै लेन्की? सोनी र बप्तिस्मा लानी, अनी होसकुङ म्यार्मीन लार लहो पाप हुर्नी।’ 17 “होटै ङा यरूशलेमाङ ल्हेसार राहा अनी मन्दिराङ नुङार प्रार्थना जाट्चै जाट्नाङ ङै दर्शन डाङा। 18 होडीक बेला ङै प्रभुकी डाङा र होसकै ङाकी डेया, ‘छीटो जाटार यरूशलेमलकीङ नुङ्की क्योटो, हीजैडेनाङ ङौ बारेयाङ नीये याछ गबाही इलुङ भर्मीकै ग्रहण माजाट्ले।’ 19 ङै डेया, ‘ए प्रभु, ङै पट्ट न सभाङुच इमाङ नुङार नाको मीटाक विश्वास जाट्चकोलाक झ्यालखानाङ काच र डुङ्च इखुरीक पट्टकी थाहा ले। 20 र नाकुङ साक्षी याछ स्तिफनसकी य्हु झ्याङ्री खासार साट्च बेलाङ ङा र होला लेया र होसकी साट्चको खाटा खाटार होखुरीकुङ बढीन रुङार ङुमन्या।’ 21 अनी प्रभुये ङाकी डेया, ‘नुङ्ना, हीजैडेनाङ ङा नाङ्की अन्यजातिको लेठाङ लोस-लोससम्म बीर्न्हकाले।’” 22 इट डेठरसम्म मट्टै होखुरीकै पावलौ कुरा सेया। टर होटै न्हुइङ होखुरीकै अन्यजाति डेच शब्द सेच बीट्टीकै बाड्को सोरै च्याक्चै डेकी ठाला, “याङ्च भर्मीकी पृथ्वी लकीङ हटडीनी! हीजैडेनाङ होसे जीवाकी योग्यौ माले!” 23 अनी होखुरीकै च्याक्चै लहो बढीन लोछै ढुलो भुरुक्की ठाला। 24 होटै सेनापटीये आज्ञा जाटा, “होसकी ब्यारेक भीत्री राकार कोर्रा ङापार जाच्डीनी, ही कारनै होच्यौ विरोधाङ होखुरीक इटजाट्न च्याक्ङने ङा र वार्खी य्होकीङ।” 25 जब सीपाहीकै पावलकी डुङ्की डेम छालौ डोरीये छ्याका, टब पावलै लाहा छीनी टोङ्छ कप्तानकी गीना, “ही काट रोमी नागरीककी, हीर दोषी माठहरीस्च भर्मीकी कोर्रा ङाप्की कानुनै याल्हे?” 26 अनी कप्तानै इसे कुरा सेरखीङ सेनापटी लेठाङ नुङार इट डेया, “नाकै ही जाट्की पामने? हीजैडेनाङ इसे भर्मी च रोमी नागरीक टी लेसा!” 27 टब सेनापटीये राहार पावलकी गीना, “ङाकी डेउ, ही नाङ रोमी नागरीक हो?” पावलै डेया, “हो।” 28 होटै होसे सेनापटीये डेया, “ङै च इसे रोमी नागरीकटौ हक वास्टै पैसा टेरीयार लोच हो।” पावलै डेया, “टर ङा च डीन्छ न रोमी हो।” 29 टब इसे कुरा सेच बीटीक्कै पावलकी केरकार जाट्की टयार छान्चको पट्ट न हटडीसा। अनी पावल रोमी नागरीक लेसा डेम थाहा छान्रखीङ सेनापटी बीर्हीया, हीजैडेनाङ होचे पावलकी छ्याक्ङन्या। पावल माहासभौ म्याहासाङ 30 अनी पीउर्हाक लेखो यहूदीकै पावलकी खास कुसे कारनै दोष लैडीमेसा डेच कुरा बुझडीस्की, सेनापटीये पट्ट न मुख्य पुजाहारीको र महासभुङ भर्मीकोलाक जम्मा छान्की आज्ञा जाटा। अनी होसे सेनापटीये पावलकी झ्यालखाना लकीङ डोनार होसकी म्हाका राका र होखुरीकुङ म्याहासाङ टोङ्हाका। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.