प्रेरित 21 - पुर्वीय मगरपावल यरूशलेमाङ नुङ्च 1 कान एफीसस मन्डीलीयुङ अगुवाको खाटा बिदा छानार जाहाजाङ काल्हार सीढै कोस डेच टापुवाङ टाराहा। पीउर्हाक गोराक लेखो रोडोस डेच टापुवाङ टाहा र होटै पटारा सहराङ टाराहा। 2 होला कानै फोनीकेयाङ नुङ्च जहाज डुपा र कान होसे जाहाजाङ काल्हार नुङा। 3 जब साइप्रस खेरेप टाहा, टब कान होसकी डेबेर्या पट्टी पार्यार सीरीयुङ क्षेत्र नुङा। र टुरोस सहराङ झाला हीजैडेनाङ होला जहाजुङ सामानको झालाक्की पर्च लेया। 4 होटै कान होला ङुच विश्वासीकोलाक डुप्की नुङा र होखुरीक खाटा होला काट हप्ता सम्म ङुवा। अनी पवित्र आत्मा लकीङ अगुवाइ छानार होखुरीकै पावलकी यरूशलेमाङ मानुङ्की डेया। 5 होटै कानुङ नुङ्च बेला छान्रखीङ होखुरीक खाटा बिदा छानार कान खेव्हा। होलुङ विश्वासीको लहो पट्ट न जाको समेट जहान-जहान न होखुरीक कानकी सहर बाहीर सम्म साखी राहा, र कानै समुन्द्रओ छेवाङ घुँडा टुसार प्रार्थना जाटा। 6 होटै न्हुइङ होखुरीक पट्टको खाटा कान भा। अनी कान जहाजाङ काल्हा र होखुरीक चहीँ लहो इमाङ ल्हेसा। 7 टुरोसलकीङ जहाजाङ काल्हार कान टोलेमाइसाङ टाराहा। होटै होलुङ विश्वासी डाजे-भाइकोखाटा भेटघाट जाटार होखुरीक खाटा होला कायाक ङुवा। 8 होटै पीउर्हाक लेखो कान बिदा छानार कैसरीयाङ टाहा, र प्रचार जाट्च फीलीपौ इमाङ ङुवा। फीलीप चहीँ यरूशलेमाङ बीढुवाकोलाक सेवा जाट्च साट जना मढ्याङ काट जना लेया। 9 होच्यौ बुली जना अगमवाणी ङाक्च मास्टो मीजाको लेया र होखुरीक बीहा माजाट्न न ङुमन्या। 10 कान हीर याक होला न ङुवा र होडीक बेला यहूदियालकीङ अगाबस डेच काट जना अगमवक्ता राहा। 11 अनी होचे कानलेठाङ राहार पावलौ पटुका लार मेन मीहुट-मीखुट्या छ्याकार डेया, “पवित्र आत्मा इट डेले, ‘इसे पटुका कुसे भर्मीयो हो, होसकी यरूशलेमाङ यहूदीकै इटजाट्न न छ्याक्ले र अन्यजातिकुङ मीहुटाङ जीम्मा याल्हे।’” 12 इसे कुरा सेरखीङ, कान र होला ङुच भर्मीको पट्टकै पावलकी ढेनाम यरूशलेमाङ मानुङ्नी डेयार बिन्ती जाटा। 13 टर पावलै डेया, “नाखुरीक इटजाट्न रापार ङौ मीमनकी हीजै खीन्न पार्च? ङा च यरूशलेमाङ छ्याखी मट्टै होइन, टर प्रभु येशूओ लागी सीकी र टयार ले।” 14 अनी पावलकी रोकडीकी माय्होक्नाङ “प्रभुओ इच्छा पुरा छान्ख्यौ” डेयार कान माच्याक्ङ ङुवा। 15 होस न्हुइङ कान सामानको टयार जाटार ढेम्लाक यरूशलेम पट्टी व्हा। 16 कान खाटा कैसरीयुङ कुडीक जना विश्वासीको र नुङा। होखुरीकै कानकी साइप्रसुङ काट जना पुरानो विश्वासी मनासोन डेचओ इमाङ आल्हा। होसे खाटा न कान बास ङुकी पर्च लेया। पावल यरूशलेमाङ टाछ 17 जब कान यरूशलेमाङ टाराहा, टब होलुङ डाजे-भाइकै कानकी मार्हाङ्ङ-मार्हाङ्ङ स्वागट जाटा। 18 होटै पीउर्हाक लेखो पावल कान खाटा याकुबकी डुप्की नुङा। होला यरूशलेमुङ पट्ट न अगुवाको भेला छानन्या। 19 अनी पावलै होखुरीककी झोरा, र मेन सेवकाइ अन्यजातिकुङ मीघ्याङ परमेश्वरै कुङ्च-कुङ्च काम जाटा डेम होखुरीककी पट्ट न डेम याहा। 20 इसे कुरा सेयार होखुरीकै परमेश्वरौ महीमा जाटा। टब होखुरीकै पावलकी डेया, “ङोस्नी भाइ, यहूदीकुङ मीघ्याङ विश्वास जाट्चको हजारौ ले, र मोशौ व्यवस्थुङ कुराङ र होखुरीक पट्टकै कडा खाटा मन्डीमने। 21 होखुरीकै नाकुङ बारेयाङ र कुडीक कुरा सेमने, होसे ही डेनाङ, अन्यजातिकुङ मीघ्याङ ङुच यहूदीकोलाक नाकै ‘मोशौ व्यवस्थाकी मामन्डीकी र होखुरीकुङ मीजाकोलाक खतना माजाट्की अनी रीटीठीटी र मामन्डीकी’ डेयार पाहाक्ङने टा। 22 अब ही जाटीङ? नाको इला राम्हने डेयार होखुरीकै पक्कै र सेले। 23 होटबाटै कान ही डेले, होसे नाकै जाट्नी। परमेश्वर खाटा भाकल जाट्चको इला कानखाटा बुली जना ले। 24 इखुरीककी लार नाको र खाटा न नुङ्नी र होखुरीक खाटा न शुद्ध छान्नी। इखुरीककी चहडीस्च खर्च र नाकै टेरीम यान्ही र इखुरीकै मीछाम हुल्की य्होक्ख्यौ। इटजाट्न नाकै मोशौ व्यवस्था मन्डीच डाङार नाकुङ बारेयाङ सेच कुराको सत्य माहालेसा डेम पट्टकै थाहा डीन्ल्हे। 25 टर अन्यजातिकै सुयेर विश्वास जाट्नने डेनाङ चहीँ, होखुरीकै मूर्तिकी चढडीच ठोक, य्हु, मीघाटी युकार साट्च पसुकुङ स्या माज्याकी र व्यभिचार लकीङ लोस ङुकी पर्ले डेच नीढो जाटार कानै चीठी रीक्ने।” 26 पावलै होसे बुली जना भर्मीकोलाक आल्हा, र पीउर्हाक लेखो होखुरीक खाटा न लाहाकी र शुद्ध जाटा। होटै न्हुइङ शुद्ध जाट्च डीन सेन पुरा छान्ले डेम, र पट्ट कोलाक याछ भेटीयो सुचना पुजाहारी कोलाक डेकी डेयार होसे मन्दिर भीत्री पर्या। पावलकी घोच 27 जब भाकल जाट्च साट डीन ओल्खी पामन्या, टब एसीया लकीङ राछ यहूदीकै पावलकी मन्दिराङ डाङा। अनी होखुरीकै भर्मीकुङ भीड्की सुरडीयार पावलकी घोवा। 28 होटै होखुरीकै इट डेचै च्याक्की ठाला, “ए इस्राएलुङ भर्मीको, सहायटा जाट्नी! भर्मीकोलाक पट्ट लाक कानुङ जाति, मोशौ व्यवस्था र इसे परमेश्वरौ मन्दिरौ विरुद्धाङ शिक्षा याम्ह व्हाच भर्मी इसे न हो। इडीक मट्टै होइन, ग्रीककोलाक र मन्दिर भीत्री राकार इसे पवित्र ठाउँकी र अशुद्ध पार्नने।” 29 होखुरीकै इट डेया हीजैडेनाङ अघी न होखुरीकै एफीससुङ टोरोफीमस डेच काट जना भर्मीकी पावल खाटा सहराङ डाङ्चबाटै होसकी न पावलै मन्दिरभीत्री राक्च हो डेम होखुरीकै आर्मीटन्या। 30 पट्ट न सहराङ होहल्ला छाना, र भर्मीको खेर्न राहा। होखुरीकै पावलकी घोवार मन्दिरलकीङ आर्ढुसार बाहीर आल्हा र तुरुन्तै गालाम ठुना। 31 जब होखुरीकै पावलकी साट्की पामन लेया, टब पट्ट न यरूशलेम सहराङ हुल्डुङ्गा छान्नन ले डेच खबर रोमी सेनापटी लेठाङ टाहा। 32 होटै तुरुन्तै मुख्य कप्तानै सीपाहीको र कप्तानकोलाक लार होखुरीक लेठाङ खेर्न राहा। होखुरीकै सीपाहीको र कप्तानकोलाक डाङा, अनी पावलकी डुङ्की डासा। 33 अनी होसे सेनापटी खेरेप राहार पावलकी घोवा र नीस साङ्लै होसकी छ्याक्की डेम हुकुम याहा। “इसे सु हो? र इचे ही जाटा?” डेयार होचे गीना। 34 टर होसे भीडुङ भर्मीकै काटै काट कुरा र अर्कोये काट कुरा डेयार च्याका। होटबाटै होसे होहल्लै जाट्नाङ झगडौ खास कुरा थाहा डीन्खी माय्होक्चबाटै पावलकी ब्यारेकाङ आल्खी डेम सेनापटीये आज्ञा याहा। 35 जब पावल भर्याङाङ टाराहा सीपाहीकै होसकी गाराङार आल्हा, हीजैडेनाङ वास्टै भर्मीको ढुइरो लक्डीसार होसकी साट्की पामन्या। 36 हीजैडेनाङ भर्मीकुङ भीड “होसकी साट्की पर्ले!” डेयार च्याक्चै न्हुङ-न्हुङ राम्हन्या। पावल भर्मीकुङ म्याहासाङ ङाक्च 37 ब्यारेक भीत्री टाखी पानाङ पावलै सेनापटीकी डेया, “ए हजुर, छान्ले डेनाङ, ङा नाखुरीककी हीर कुरा डेकी मीमन ले।” होचे डेया, “नीये ग्रीक भासा ङाक्की वार्ल्हे? 38 नाङ होसे न मिश्री हैन, पहीला विद्रोह मचडीयार बुली हजार विद्रोहीकोलाक जङ्गलाङ आल्छ?” 39 टर पावलै होसे सेनापटीकी डेया, “ङा च कीलीकीयुङ टार्सस सहरुङ येहूदी भर्मी हो, चान चुन्या सहरुङ नागरीक हैन। बिन्ती ले, इसे भर्मीकोलाक हीर डेकी ङाकी आज्ञा यान्ही।” 40 अनी होचे अनुमटी याहा, भर्याङाङ टोङ्हार पावलै भर्मीकोलाक मीहुटै माच्याक्ङ ङुच इसारा जाटा। भर्मीको माच्याक्ङ ङुच पछी, होचे होखुरीककी हिब्रू भासाङ इट डेया: |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.