प्रेरित 20 - पुर्वीय मगरपावल माकेडोनीयाङ र ग्रीसाङ 1 जब होहल्ला सान्ट छाना, पावलै विश्वासीकोलाक आर्घाम भेला जाटा र होखुरीककी उत्साह याहा। अनी होखुरीक खाटा बिदा छानार पावल माकेडोनीयाङ नुङा। 2 होसे इलाकौ ठाउँ-ठावाङ नुङार विश्वासीकोलाक उत्साह खाटा बचनलकीङ वास्टै शिक्षा याहा, होटै पावल ग्रीसाङ नुङा। 3 होला पावल सोम महीना सम्म ङुवा। होटै होसे जहाजीङ सीरीयालाक नुङ्की पानाङ यहूदीकै होच्यौ विरुद्धाङ षड्यन्त्र जाट्च थाहा डीन्छबाटै होचे माकेडोनीया छान्चै सीरीया ल्हेस्च नीस्चय जाटा। 4 टब बेरीयाङ ङुच पुरसौ लेन्जा मीजा सोपाटोरोस, ठेसलोनीके लकीङ अरिस्तार्खस र सीकन्डस, डर्बीयुङ गायस अनी एसीयुङ टुखीकस र टोरोफीमस र तिमोथी पावल खाटा नुङा। 5 होखुरीक चहीँ कान डेनाङ अगाडी न टाहार त्रोआस सहराङ कानकी लेन्न ङुमन्या। 6 टर कान चहीँ अखमीरी रोटोओ चाड मन्डीम भ्यारखीङ फीलीप्पी सहर लकीङ जहाजाङ नुङा र बाङा याकाङ त्रोआसाङ टाहा। कान होला साट डीन सम्म ङुवा। पावल अन्टीम पल्ट त्रोआस सहराङ 7 हप्टौ पहीलो डीन जब कान र अरु विश्वासीको प्रभुभोज ज्याकी भेला छाना, टब पावलै चहीँ पीउर्हाक लेखो नुङ्च मीमन जाट्च बाटै, होखुरीक खाटा आढाराट सम्म गफ जाट्न ङुवा। 8 कान भेला छान्च ढेम्च टलौ कोठाङ वास्टै बट्टीको ढाक्ङ डाम्या। 9 युटीकस म्यार्मीनुङ काट रेन्जा जजा चहीँ झ्यालाङ ङुम ङुमन्या। पावलै धेरै बेर सम्म ङाक्ङ ङुनाङ होसकी साफ्फी मीमीक झुका र मीमीक झुक्चबाटै होसे सोम टला लकीङ म्हाका झाङ झाला। जब भर्मीको होसकी सोट्की टान्हाङ सीम भ्याच डुपाना। 10 टब पावल झाङ झाला र होसे मीटाक खुखुप छानार होसकी अङ्गालो का र वरीपरी लेच भर्मीकोलाक डेया, “चीन्टा माजाट्नी, हीजैडेनाङ चाहाँ इसे जीउँडै न ले!” 11 टब पावल ढेनाम कोठाङ काल्हा र रोटो ग्याकार प्रभुभोज ज्या अनी ज्याम भ्यारखीङ माट्याङ्ठर होसे गफ जाट्चै ङुवा। होटै होखुरीक लकीङ बिदा छानार व्हा। 12 अनी होखुरीकै होसे रेन्जा जजाकी जीउँडै इमाङ आल्हा र होखुरीकै वास्टै सान्त्वना डुपा हीजैडेनाङ होसे रेन्जा जजा जीवामन्या। त्रोआस लकीङ मीलेटससम्मौ यात्रा 13 त्रोआसलकीङ पावल बाहेक कान पट्ट न पानीजहाजाङ काल्हार अस्सोस सहराङ नुङा। अनी पावलै चहीँ अस्सोस सहरसम्म व्हार नुङ्च मीमन जाट्च बाटै होचे लाहाकी अस्सोससाङ मट्टै पानी जहाजाङ काल्छ बन्डोबस्ट जाट्नन्या। 14 जब पावलै कानकी अस्सोसाङ डुपा, अनी कानै होसकी जहाजाङ काल्हाकार मीटीलेनेयाङ नुङा। 15 होटै पीउर्हाक लेखो कान जाहाजाङ समुन्द्रओ लाम छान्चै खीयस टापुओ छेउवाङ टाहा र आपर्हीन लेखो सामोस टापुवाङ टाहा। होटै अर्को डीन चहीँ मीलेटस सहराङ टाराहा। 16 पावलै एसीयाङ समय माबीटडीच बीचार छान्चबाटै होचे एफीससाङ मापर्न न नुङ्च नीढो जाटा। हीजैडेनाङ य्होक्ठर यहूदीकुङ चाड पेन्टीकोसौ डीन यरूशलेमाङ न टाछ होचे आटुरी जाट्नन्या। एफीसस मण्डलीयुङ अगुवाको खाटा पावल बिदा छान्च 17 पावलै मीलेटसलकीङ एफीसस मण्डलीयुङ अगुवाकोलाक आर्घाकी डेम भर्मी बीर्न्हका। 18 जब होखुरीक होला टाराहा टब पावलै होखुरीककी डेया, “ङा एसीयाङ पाइला टेक्डीच नीक लकीङ न नाखुरीकुङ मीघ्याङ कुटजाट्न डीन बीटडीया होसे नाखुरीकै वार्न्हने। 19 पुरा नम्रता खाटा मीराप्डी जोकाक्चै, यहूदीकुङ सटावटाङ र ङै प्रभुओ सेवा जाटा। 20 नाखुरीककी भलाइ छान्च कुरा नाखुरीकुङ न म्याहासाङ सेटाक्की र इम-इमाङ नुङार नाखुरीककी र अरु भर्मीकी शिक्षा याखी ङा सेन्र न्हुङ्लाक माहटडीसा। 21 यहूदीकोलाक र ग्रीककोलाक पाप डासार परमेश्वर पट्टी ल्हेस्की र काल्हौ प्रभु येशू ख्रीष्ट मीटाक विश्वास जाट्की डेच कुरौ गबाही ङै याम्हने। 22 “अब ङोस्नी, ङा पवित्र आत्मै डेच अनुसार यरूशलेमाङ नुङ्ङ न ले, होला ङाकी ही कुट आइलक्डीस्ले होसे ङा हीर माव्हारले। 23 इडीक मट्टै वार्ल्हे, की सहर पीच्छी कैड र कष्ट ङामीटाक पर्न राल्हे डेच कुरा पवित्र आत्मै ङाकी डेमने। 24 टर ङा ङाल्हौ जीवनकी हीर मोलौ र लहो लागी प्रिय माठान्डीले। इडीक मट्टै ङा मीमन जाट्ले, की प्रभु येशूलकीङ डुप्च सेवकाइ ङा पुरा जाट्की य्होकीङ। होसे चहीँ परमेश्वरौ अनुग्रहौ सेछ समचार टाहाक्की हो। 25 अब ङोस्नी, नाखुरीक सु-सुओ मीघ्याङ ङै परमेश्वरौ राज्यौ प्रचार जाट्चै राम्हने, नाखुरीकै फेरी ङाकी सेन्र माडाङ्ले डेच कुरा ङाकी थाहा ले। 26 होटबाटै छीनीयुङ डीन ङा नाखुरीककी साक्षी याल्हे, की ङा सुओर य्हुओ दोषी माछान्ले। 27 हीजैडेनाङ परमेश्वरौ पट्ट न इच्छा नाखुरीककी डेकी ङा न्हुङ्लाक माहटडीसा। 28 नाखुरीक लहो लागी र लहो पट्ट न बगालौ लागी होसीयार छान्नी। पवित्र आत्मै नाखुरीककी बगालौ जीम्मेवारी खास्चबाटै परमेश्वरै लहो न मीजौ य्हुये लोच मण्डलीकी नाखुरीकै सेम्ह ङोस्की। 29 हीजैडेनाङ ङाकी थाहा ले, ङा नुङ्च न्हुइङ बीर्हीमसेच ब्वाँसाको नाखुरीकुङ मीघ्याङ पर्ले, होखुरीकै बगालकी डुख याखी माडास्ले। 30 नाखुरीकुङ न मीघीङ झुटो कुराको ङाक्च भर्मीको सोले, होखुरीकै विश्वासीकोलाक मेखुरीकुङ न्हुङ-न्हुङ आल्खी पाले। 31 इटबाटै होसीयार छान्नी र इसे कुरा आर्मीट्नी, सोम वर्षसम्म नाबीक नामसीन मीराप्डी जोकाक्चै पट्ट भर्मीकोलाक ङै चेटावनी याम्ह न ङुवा। 32 “अब ङा नाखुरीककी परमेश्वराङ र होसकुङ अनुग्रहौ बचनाङ जीम्मा याल्हे, होचे नाखुरीककी विश्वासाङ बलीयो खास्की य्होक्ले र पवित्र जाट्च पट्टकुङ मीघ्याङ हकडार खास्ले। 33 ङै कुसे भर्मीयो र सुन, चाँडी र बढीनौ लोभ माजाटा। 34 नाखुरीक लाहाकी र थाहा ले, ङौ इसे न मीहुटै काम जाटार ङाल्हौ लागी र ङाखाटा लेचकुङ खाँचोको ओल्होक्ङ याम्हने। 35 ङै पट्ट न कुराङ नाखुरीककी पाहाक्ङ ने, नाखुरीकै र इटजाट्न न मेहनट जाटार कमजोरी कोलाक सहायटा जाट्की पर्ले। प्रभु येशूओ बचन आर्मीट्नी, कुटजाट्न होसकै लहे न डेम ने, ‘लाकी डेनाङ याखी झन आसीस हो।’” 36 अनी इडीक डेम भ्यार पावलै घुँडा टुसार होखुरीक पट्ट खाटा प्रार्थना जाटा। 37 होखुरीक पट्ट न रापा र पावलकी अङ्गालो कार चुम्हा अनी बिदा जाटा। 38 होखुरीक साप्फी डुखी छाना हीजैडेनाङ पावलै डेमन्या, अब फेरी सेन्र होसकी डाङ्की माढीन्ले। होटै होखुरीकै पावलकी जाहाजाङ साखी नुङा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.