प्रेरित 18 - पुर्वीय मगरकोरिन्थी सहराङ 1 होटै न्हुइङ पावल एथेन्स सहरीङ बिदा छानार कोरिन्थी सहराङ नुङा। 2 अनी होचे होला पोन्टसुङ अकीलास म्यार्मीनुङ काट जना यहूदीकी डुपा। होसे मेन मास्टो प्रिस्किला खाटा इटालीया लकीङ चाम-चाम राम्हन्या, हीजैडेनाङ सम्राट् क्लौडीयसै पट्ट न यहूदीकोलाक रोमलकीङ ख्योव्हार नुङ्की डेम आज्ञा जाट्नन्या। अनी पावल होखुरीककी डुप्की डेम नुङा। 3 होखुरीक काट न काम जाट्च बाटै पावल र होखुरीक खाटा न ङुवार काम जाटा, हीजैडेनाङ होच्यौ काम र पाल खास्च लेया। 4 पावल म्हुङ बाट्च पट्ट डीनाङ सभा ङुच इमाङ नुङार बहस जाट्नन्या र यहूदी र ग्रीककोलाक बुझडीच कोसीस जाट्नन्या। 5 जब सीलास र तिमोथी माकेडोनीया लकीङ राहा टब पावल बचन प्रचारौ कामाङ पुरा लग्डीसा। होचे यहूदीकोलाक येशू न मुक्ति याछ ख्रीष्ट हो डेम साक्षी याहा। 6 टर होखुरीकै पावलौ विरोध जाटार मासेम्हखाटा च्याका। टब पावलै लहो बढीन खाराहार होखुरीककी चेटावनी छान्ख्यो डेम डेया, “नाखुरीकुङ य्हु नाखुरीक मीटाक न पर्ख्यौ, ङा निर्दोष ले। अब इटौ आलाक ङा अन्यजातिको लेठाङ सेछ समाचार सेटाक्की नुङ्ले।” 7 होटै पावलै यहूदीकुङ सभा ङुच इम डासार परमेश्वरौ भक्टी जाट्च काट अन्यजाति टीटस युस्टस डेच भर्मीयो इमाङ नुङा। होच्यौ इम होसे सभा ङुच इमौ खेरेप लेया। 8 सभा ङुच इमुङ शासक कीरीस्पस र होच्यौ पट्ट न परीवारै प्रभुकी विश्वास जाटा। अनी कोरिन्थीयुङ अरु वास्टै जनै र पावलौ शिक्षा सेयार विश्वास जाटार बप्तिस्मा ला। 9 कायाक नाबीक दर्शनाङ प्रभुये पावलकी डेया, “माबीर्हीयो, टर ङाक्चै नुङ्ना र माच्याक्ङ माङुना। 10 हीजैडेनाङ ङा नाङखाटा न ले, सुयेर नाङ्की हानी जाट्की माय्होक्ले, हीजैडेनाङ इसे सहराङ ङौ भर्मीको वास्टै ले।” 11 होटै पावल परमेश्वरौ शिक्षा पाहाक्चै काट वर्ष छ महीनासम्म होखुरीकखाटा न ङुवा। 12 जब गलीयोन डेच अखैयुङ शासक छाना, टब यहूदीको काट छानार पावलकी घोवार अदालताङ आल्हार 13 इट डेया, “इसे भर्मीये कानुङ व्यवस्थौ विरुद्धाङ परमेश्वरौ आराधना जाट्की डेम भर्मीकोलाक पाहाक्ङन ले।” 14 जब पावल ङाक्की ठाला, टब गलीयोनै होसे यहूदीकोलाक डेया, “ए यहूदीको, इडीक साँच्ची न इसे मासेछ बाड्को अपराधौ कुरा हो लेसा डेनाङ च ङै नाखुरीकुङ कुरा सेकी ठीक छान्च लेया। 15 टर इसे शब्दको, म्यार्मीनको र नाखुरीकुङ लहो व्यवस्थौ बारेयाङ लेचबाटै नाखुरीक न बीचार जाट्नी। ङा चहीँ याङ्च कुराकुङ न्याय माजाट्ले।” 16 होटै गालीयोनै होखुरीककी अदालत लकीङ खेट्डीम याहा। 17 टब होखुरीक पट्टकै सभा ङुच इमुङ शासक सोस्ठेनेसकी घोवार अदालतौ अगाडी न डुङा। टर गलीयोनै होसे कुरौ हीर वास्टा माजाटा। पावल एन्टीओखीया सहराङ ल्हेस्च 18 पावल वास्टै डीन सम्म विश्वासी डाजे-भाइकोखाटा कोरिन्थी सहराङ ङुवा। होस न्हुइङ डाजे-भाइकोखाटा बिदा छानार होसे प्रिस्किला र अकीलासखाटा कीङ्कीरीया डेच सहराङ नुङा। हीर समय अगाडी जाट्च भाकल पुरा जाट्कीयो लागी सीरीया नुङ्की जहाजाङ काल्खी डेनाङ अगाडी पावलै लहो मीछाम हुला। 19 होखुरीक एफीससाङ टाहा। अनी प्रिस्किला र अकीलासकी चहीँ होला न डास्न डा र पावल चहीँ होलुङ सभा ङुच इमाङ पर्यार यहूदीकोखाटा बहस जाट्की ठाला। 20 होखुरीकै पावलकी अझै कालाप डीन मेखुरीकखाटा ङुकी डेयार बिन्ती जाटा, टर होसे मामन्डीया। 21 होटै होखुरीक खाटा बिदा छान्नाङ पावलै डेया, “परमेश्वरौ इच्छा छाना डेनाङ ङा नाखुरीक लेठाङ फेरी ल्हेसार राल्हे।” अनी होसे जहाजाङ काल्हार एफीससीङ व्हा। 22 जब पावल कैसरीयाङ टाहा टब यरूशलेमुङ मण्डलीयुङ विश्वासीकोखाटा डुप्की डेम ढेम्लाक काल्हा र डुपार होसे एन्टीओखीया पट्टी झाला। 23 होसे होला कालाप डीन ङुवा र होटै ख्योव्हार गलाटीया र फीरीगीयुङ इलाकाको छान्चै नुङार पट्ट न विश्वासीकोलाक विश्वासाङ बलीयो खासा। अपोल्लोस एफीसस सहराङ 24 अलेक्जेन्ड्रिया सहरुङ अपोल्लोस डेच काट जना यहूदी एफीससाङ राहा। होसे सेम्ह ङाक्की वार्छ र धर्मशास्त्रौ कुरा वार्छ लेया। 25 होचे मुक्ति याछ प्रभुओ बारेयाङ शिक्षा डुप्मन्या र आत्माङ जोसीलो छानार येशूओ बारेयाङ ठीकखाटा ङाक्च र पाहाक्च जाट्न्या। टर पनी होसकी युहन्नौ बप्तिस्मा मट्टै थाहा लेया। 26 होटै होचे सभा ङुच इमाङ साहास खाटा ङाक्की ठाला। टर होचे ङाक्च कुरा सेयार प्रिस्किला र अकीलासै होसकी लहो इमाङ आल्हार परमेश्वरौ लामौ अर्थ होसकी अझै सेम्ह बुझडीम याहा। 27 अपोल्लसै अखैया इलाकाङ नुङ्की मीमन जाटा र डाजे-भाइकै होसकी नुङ्की उत्साह याहा। अपोल्लोसकी सेम्ह स्वागट जाट्की डेम होलुङ विश्वासीकोलाक उत्साह याहार चीठी रीका। अनी होचे अखैयाङ टार्हखीङ परमेश्वरौ अनुग्रह लकीङ विश्वास जाट्च विश्वासीकोलाक साप्फी सहायटा जाटा। 28 हीजैडेनाङ होचे बहस जाटा र धर्मशास्त्रओ बचन लकीङ येशू न मुक्ति याछ ख्रीष्ट हो डेच कुरा टान्हाकार पट्ट यहूदीकुङ म्याहासाङ प्रमाण याहा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.