प्रेरित 17 - पुर्वीय मगरठेसलोनीके सहराङ 1 पावल र सीलास अम्फीपोलीस र अपोल्लोनीयो सहरौ लाम छान्चै ठेसलोनीके सहराङ टाहा। होला यहूदीकुङ काट सभाङुच इम लेया। 2 अनी पावल सधैँ लेखा न होसे सभा ङुच इम भीत्री नुङा। सोम हप्तासम्म धर्मशास्त्रओ कुरा लकीङ होखुरीक खाटा बहस जाट्की ङुवा। 3 होचे अर्थ खोलीम प्रमाण याहार होखुरीककी इटजाट्न बुझडीम याहा, “मुक्ति याछ ख्रीष्टै डुख भोग्डीकी र सीच लकीङ जीवाम सोकी पर्च लेया र इसे न येशूओ सेछ समाचार ङा नाखुरीककी सेटाक्ङ न ले, होसको न मुक्ति याछ ख्रीष्ट हो।” 4 अनी होला लेचको मढ्याङ कुडीक जना यहूदी विश्वास जाट्चको पावल र सीलास खाटा लक्डीसा। इटजाट्न बाड्को सङ्ख्याङ परमेश्वरौ भक्टी जाट्च ग्रीकको र कुडीक जना म्यार्मीन क्योस्च मास्टोको र विश्वास जाटार होखुरीक पट्टी लग्डीसा। 5 टर अरु यहूदीकै चहीँ होखुरीककी मीरीस जाटार बजारुङ बडमासीकोलाक सोटार सहराङ खैला-बैला मचडीकी लैडीया। अनी यासोनौ इमाङ हमला जाटार पावल र सीलासकी भर्मीकुङ भीडौ म्याहासाङ राक्की पा। 6 टर पावल र सीलासकी होला माडुपा, होटै होखुरीकै यासोन र कुडीक जना विश्वास जाट्च डाजे-भाइकोलाक सहरुङ शासकको लेठाङ आर्ढुस्चै राका र च्याक्चै डेया, “संसार भरी उलट-पुलट जाट्च इसे भर्मीको इला र टार्हामने! 7 यासोनै होखुरीककी पाहुना खासार डामने। होखुरीक पट्टये येशू डेच काट अर्को न राजा ले डेयार रोमी महाराजौ हुकुम विरुद्ध काम जाट्ले।” 8 इसे कुरा सेयार भर्मीको र सहरुङ शासकको आटडीसा। 9 यासोन र होसे खाटा लेच भर्मीकै होखुरीककी ढरौटी लार होखुरीककी डास्न याहा। बेरीया सहराङ 10 होटै विश्वासी डाजे-भाइकै तुरुन्तै होसे नाबीक न पावल र सीलासकी बेरीया सहराङ बीर्न्हका। जब होखुरीक होला टाहा टब यहूदीकुङ सभा ङुच इमाङ पर्या। 11 होलुङ यहूदीको ठेसलोनीकेयुङ भर्मीकुङ डेनाङ होखुरीकुङ मीमन खुल्ला लेया। हीजैडेनाङ होखुरीकै साप्फी चासो जाटार बचन सेया र पावलै डेच कुराको खाट्ले की माखाट्ले डेयार डीन-डीनै धर्मशास्त्र परेसार जाच्डीमन्या। 12 होटबाटै होखुरीक मढ्याङ वास्टै जनै विश्वास जाटा र म्यार्मीन क्योस्च कुडीक जना ग्रीक मास्टोको र लेन्जा भर्मीकै समेट विश्वास जाटा। 13 बेरीयाङ र परमेश्वरौ बचन पावलै प्रचार जाट्न न ले डेच कुरा ठेसलोनीकेयुङ यहूदीकै थाहा डीन्हा। अनी होखुरीक होला र भर्मीकोलाक गाराङ्की र सुरडीकी टाराहा। 14 तुरुन्तै डाजे-भाइकै पावलकी समुद्र पट्टी बीर्न्हका। टर सीलास र तिमोथी चहीँ होला बेरीयाङ न ङुवा। 15 पावलकी साखी नुङ्च डाजे-भाइकै होसकी एथेन्स सहर सम्म टाहाका। होटै मेल्हाकी साखी नुङ्च कोलाक सीलास र तिमोथीकी य्होक्ठर मेल्हा लेठाङ छीटो राख्यौ डेम खबर याम्हका। एथेन्स सहराङ 16 पावलै सीलास र तिमोथीकी एथेन्स सहराङ लेन्न ङुच बेलाङ, होसे सहरकी मूर्ति न मूर्तिये न्हेप्च डाङार होच्यौ मीमन भीत्री सार्है न ब्याकुल छाना 17 होटबाटै पावल यहूदीको र परमेश्वर खाटा बीर्हीछ अन्यजातिको खाटा सभा ङुच इमाङ येशूओ बारेयाङ छलफल जाट्नन्या। होटजाट्न न बजाराङ डुप्चकोखाटा र डीनडीनै छलफल जाट्नन्या। 18 होटै इपीक्युरी र स्टोइकी डेच गुरुको मढ्याङ र कुडीक जनै पावल खाटा वाद-विवाद जाटा। होखुरीक कुडीकै डेया, “इसे बकबकेइ ही डेले?” अरुकै र डेया, “इचे च अरु न विदेशी देवताकुङ प्रचार जाट्नने।” होखुरीकै याङ्च डेया हीजैडेनाङ पावलै येशू र होसको सीच लकीङ जीवाम सोचओ बारेयाङ प्रचार जाट्नन्या। 19 होटबाटै होखुरीकै पावलकी अरीयोपागसुङ सभाङ आल्हार डेया, “नाकै प्रचार जाट्च इसे नयाँ शिक्षाओ बारेयाङ कानकी र वार्छ मीमन ले। 20 हीजैडेनाङ नाको कानुङ मेन्केपाङ नयाँ कुराको सेटाक्ङन ले। होटबाटै इसे कुरा ही हो, होसे कानकी वार्खी मीमन ले।” 21 एथेन्स सहरुङ पट्ट न भर्मीको र होला ङुच विदेशीको, होखुरीकै लहो पट्ट न समय नयाँ कुराको डेकी र सेकीयो लागी बीटडीमन्या। 22 पावलै अरीयोपागस डेच सभाङ खडा छानार डेया, “ए एथेन्स सहरुङ भर्मीको, नाखुरीक सार्है न धर्मकी माया जाट्चको लेसा डेम ङै थाहा डीन्हा। 23 हीजैडेनाङ सहराङ छेर्हाछै नुङ्नाङ ङै नाखुरीकुङ पुजा जाट्च ठाउँको डाङा। अनी ङै काट याङ्च बेडी र डुपा होला, ‘माव्हार्छ डेबटौ लागी’ डेयार खोप्डीमेसा। होटबाटै माचीन्डीम न नाखुरीकै पुजा जाट्च होसे न डेबटौ बारेयाङ ङा छीनी नाखुरीकुङ मीघ्याङ घोसना जाट्ले। 24 संसार र इला लेच पट्ट न ठोक खास्च परमेश्वर न स्वर्ग र पृथ्वीयुङ प्रभु हो, होटबाटै होसको भर्मीकुङ मीहुटै खास्च मन्दिरकोवाङ बास माङुले। 25 होसकै हीर खाँचो पर्च लेखा जाटार भर्मीको लकीङ सेवा मालाले, बरु होसकै न पट्टकी जीवन, सास र पट्ट ठोक याल्हे। 26 अनी होसकै काट जना भर्मी लकीङ पृथ्वी भरी न बास जाट्की डेम पट्ट जातिको खासा। होखुरीकुङ बास ङुच समयको, सीमानाको र टोग्डीम याहा। 27 होखुरीकै परमेश्वरकी पार, सुव्हार डुप्ले की डेम होसकै इट जाटा। टर पनी परमेश्वर काल्हाको लकीङ लोस चहीँ माले। 28 हीजैडेनाङ काल्हा होसको खाटा जीवाले, होसको खाटा न व्हाम-ङुम जाट्ले र होसको लकीङ जीवामने। कुडीक जना नाखुरीकुङ कबीकै र इट डेमने, ‘साँच्ची न काल्हा होसकुङ न सन्टान हो।’ 29 हीजैडेनाङ काल्हा परमेश्वरौ सन्टान छान्चबाटै, परमेश्वरकी भर्मीकुङ सीपलकीङ र कल्पना जाटार खास्च सुन, चाँडी र ल्हुङौ मूर्ति ल्याक्च न हो डेयार कानै आर्मीटकी माछान्ले। 30 पहीला माव्हार्न न जाट्च कामकी परमेश्वरै माङोस्ले। टर अब पट्ट न ठावाङ पट्ट भर्मीकोलाक पश्चात्ताप जाट्की आज्ञा याम्हने। 31 हीजैडेनाङ होसकै कायाक टोक्डीम याम्हने, होसनीक होसकै लहे भाक्च काट जना भर्मीलकीङ धार्मिकताङ संसारौ न्याय जाट्ले। होसे न भाक्च भर्मीकी सीच लकीङ जीवाटाकार होसकै पट्ट न भर्मीकोलाक इच्यौ प्रमाण याम्हने।” 32 जब होखुरीकै पावलै सीच लकीङ जीवाले डेच बारेयाङ सेया, टब कुडीक जनै होसकी गील्ला जाटा। टर अरु कुडीकै चहीँ डेया, “कान फेरी इसे बारेयाङ नाकुङ कुरा सेले।” 33 होटै पावल होखुरीकुङ मीघीङ ख्योहार नुङा। 34 टर कुडीक जना भर्मीको होसे खाटा लग्डीसार विश्वास जाटा। होखुरीक मढ्याङ अरीयोपागस सभुङ डीयनुसीयस डेच भर्मी, डामारीस डेच काट जना मास्टो र अरुकै र विश्वास जाटा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.