प्रेरित 14 - पुर्वीय मगरआइकोनीयन सहराङ 1 पावल र बारनाबास आइकोनीयन सहराङ यहूदीकुङ सभाङुच इमाङ नुङार इट डेयार ङाका, यहूदीकै र अन्यजातिकुङ बाड्को हुड्डै प्रभु येशू ख्रीष्टकी विश्वास जाटा। 2 टर विश्वास माजाट्च यहूदीकै चहीँ अन्यजातिकोलाक भड्कडीयार विश्वास जाट्च डाजे-भाइकुङ विरुद्धाङ होखुरीकुङ मीमन बीर्छ खास्न याहा। 3 टर पनी प्रभुओ भरोसाङ साहास जाटार ङाक्चै वास्टै याक सम्म पावल र बारनाबास होला ङुवा। अनी प्रभुये होखुरीकुङ मीहुटीङ चीन्हको र अचम्मौ कामको जाटाकार लहो अनुग्रहौ बचनौ गबाही याहा। 4 टर होसे सहरुङ भर्मीकोवाङ फाटो छानार कुडीक जना यहूदीको पट्टी र कुडीक जना चहीँ प्रेरितको पट्टी छाना। 5 होटै अन्यजाति र यहूदीको मेखुरीकुङ शासककोखाटा खाटार पावल र बारनाबासकी मासेछ ब्यावहार जाट्की र ल्हुङै ङापार साट्की डेम सल्ल्हा जाटा। 6 टर पावल र बारनाबासै इसे कुरा थाहा डीन्हा र भोक्डीसार लुकोनीयुङ सहर लुस्त्रा, डर्बी र छेउ-छाउङ जील्लाकोवाङ नुङा। 7 होटै होला र होखुरीकै सेछ-समाचार सेटाक्ङ न ङुवा। लुस्त्रा र दर्बी सहराङ 8 लुस्त्रा सहराङ मीखुट्या माक्योस्च काट जना भर्मी ङुमन्या। होसे डीनन्हाङ लकीङ न कुज्या लेया र सेन्र व्हाकी माय्होकन्या। 9 पावलै ङाक्च होचे ढ्यान याहार सेम ङुमन्या। होटै पावलै होच्यौ मीटाहाङ सेम्हजा ङोसा र होसे भर्मीये होसे गेप्ले डेच विश्वास ले डेच कुरा डाङा। 10 होटै पावलै होसकी बाड्को सोरै च्याकार डेया, “नुओ मीखुट्यौ भराङ टोङ्हो!” अनी होसे जुरुक्क सोवार व्हाकी ठाला। 11 जब पावलै याङ्च काम जाट्च डाङा र होखुरीकै लहो लुकोनीयुङ भासाङ बाड्को सोरै च्याकार डेया, “देवताको च भर्मीयो रुपाङ कानलेठाङ टी राम्हनेसा!” 12 होखुरीकै बारनाबासकी चहीँ जीउस डेच देवता डेयार पावलकी चहीँ हर्मेस डेच देवता डेया हीजैडेनाङ होसे मुख्य बक्टा लेया। 13 जीउस डेबटौ मन्दिर चहीँ होसे सहरौ अगाडी न लेया। अनी होलुङ पुजाहारीकै मुल गालामकोवाङ बाछाको र सारौ मालाको राका। र होलुङ भर्मीकोखाटा खाटार पावल र बारनाबासौ म्याहासाङ बली याखी डेम टयार छाना। 14 टर प्रेरितको, पावल र बारनाबासै इसे कुरा सेया अनी नीरास छान्चै होखुरीकै लाहा-लहो बढीन च्याटा र इट डेम च्याक्चै भर्मीकुङ मीघ्याङ खेर्न नुङार डेया, 15 “ए डाजे-भाइको, नाखुरीकै हीजै याङ्च काम जाट्च? कान र नाखुरीक लेखा न भर्मी मट्टै हो। कान नाखुरीककी याङ्च व्यर्थौ कुराकोलकीङ जीवीत परमेश्वर पट्टी ल्हेसाक्की डेम सेछ-समाचार सेटाक्ले, कुसे परमेश्वरै स्वर्ग, पृथ्वी, समुद्र र होला लेच पट्ट ठोक खासा। 16 र होसकै अगाडीयुङ पुस्ताङ पट्ट न जातिकोलाक लाहा-लहो न लामाङ व्हाकी याहा। 17 टर पनी होसकै सेन्र भलाइ जाट्च कामको जाट्की माडासा। होसकै सर्घालकीङ नामास राहाकार ठीक समयाङ उब्जनी जाटाक्ले। होसकै नाकोकी परसस्ट ज्याच ठोक जुटडीम याहार नाकुङ मीमनकी आनन्द ये न्हेपाक्ङ याल्हे। इटजाट्न परमेश्वरौ कामकै न होसकुङ साक्षी याल्हे।” 18 इसे कुरा डेयार होखुरीकै बल्ल-बल्ल होखुरीककी बली याखी लकीङ होसे भर्मीकोलाक रोकडीया। 19 होटै न्हुइङ एन्टीओखीया र आइकोनीयन सहरीङ कुडीक जना यहूदीको होला राहा। होखुरीकै भर्मीकुङ हुलकी सोटार पावलकी ल्हुङ ङापार हीर्कडीकी लैडीयार होसे सीया डेयार होखुरीकै आर्ढुस्चै सहरलकीङ बाहीर आल्हार लोम्हका। 20 टर जब विश्वासीको पावलौ वरीपरी टोङ्हा होसे सोवा होटै फेरी सहर भीत्री पर्या। र पीउर्हाक लेखो बारनाबास खाटा ख्योव्हार डर्बीयाङ नुङा। सीरीयुङ एन्टीओखीयाङ ल्हेस्च 21 पावल र बारनाबासै डर्बी सहराङ सेछ समाचार सेटाकार वास्टै चेलाको खासा। होटै होखुरीक लुस्त्रा, आइकोनीयन र एन्टीओखीयुङ पीसीडीया ल्हेसा। 22 विश्वासीकुङ आत्माकी बलीयो खास्चै होखुरीककी विश्वासाङ ङुमङुकी डेम अर्ती याहा र “वास्टै कष्ट सहडीयार कान परमेश्वरौ राज्याङ पर्की पर्ले” डेयार होखुरीककी पाहाका। 23 जब पावल र बारनाबासै होखुरीकुङ पट्ट न मण्डलीयाङ अगुवाको नीयुक्टी जाटा टब प्रार्थना र उपवास सहीट होखुरीकै लहे विश्वास जाट्च प्रभुओ चरनाङ होखुरीककी याहा। 24 होटै न्हुइङ होखुरीक पीसीडीया क्षेत्र छान्चै पाम्फीलीयाङ राहा। 25 पर्गा डेच ठावाङ प्रचार जाटार होखुरीक अटालीयाङ झाला। 26 होटै होखुरीक जहाजाङ काल्हार एन्टीओखीयुङ सीरीयाङ नुङा, होला होखुरीकै चाहाँ पुरा जाट्च कामौ लागी परमेश्वरौ अनुग्रहाङ होखुरीककी अर्पन जाट्नन्या। 27 जब होखुरीक एन्टीओखीयाङ टाराहा, टब मण्डलीयुङ विश्वासीकोलाक भेला जाटा, होटै न्हुइङ पावल र बारनाबासै परमेश्वरै होखुरीकुङ साठाङ जाट्च पट्ट न कामौ बयान जाटा र कुटजाट्न अन्यजातिकुङ लागी विश्वासौ लाम खोलीम याहा डेम सेटाका। 28 होखुरीक होला विश्वासीको खाटा नीकै याक ङुवा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.