प्रेरित 13 - पुर्वीय मगरबारनाबास र साउलकी भाक्च 1 एन्टीओखीया सहरुङ मण्डलीयाङ अगमवक्ताको र शिक्षा याछ भर्मीको लेया। होखुरीक बारनाबास, काला डेच सीमीयोन, कुरेनीयुङ लुकीयस, राजा हेरोद खाटा होर्च मनेन र साउल लेया। 2 होखुरीक प्रभुओ आराधना जाट्चै उपवास ङुच बेलाङ पवित्र आत्मै डेया, “ङौ लागी बारनाबास र साउलकी भाक्नी हीजैडेनाङ जुन कामौ लागी ङै होखुरीककी आर्घामने।” 3 होटै होखुरीकै उपवास ङुम होखुरीक मीटाक मीहुट डार प्रार्थना जाटा र होखुरीककी बिदा याहा। साइप्रस टापुवाङ 4 इटजाट्न पवित्र आत्मै बीर्न्हकाचबाटै बारनाबास र साउल सीलुकीयाङ नुङा। होटै जहाजाङ काल्हार साइप्रस नुङा। 5 सलामीसाङ टार्हारखीङ होखुरीकै यहूदीकुङ सभा ङुच इमकोवाङ नुङार परमेश्वरौ बचन सेटाका। होखुरीककी सहायटा जाट्की युहन्ना डेच मर्कूस र होखुरीक खाटा न लेया। 6 होटै होखुरीक पट्ट न टापु व्हाम चेसार पाफोस डेच सहराङ टाहा। होला होखुरीकै काट जना यहूदी झुटो अगमवक्ता बार-येशू डेच जादूगरकी डुपा। 7 होसे जादूगर साइप्रस टापुवाङ बडा-हाकीम सर्गीयस पौलुसौ खेरेपुङ भर्मी हो। सर्गीयस पौलुस चहीँ बुद्धि लेच भर्मी लेया। हीजैडेनाङ होचे परमेश्वरौ बचन सेकी मीमन जाट्न्या होटबाटै होचे साउल र बारनाबासकी आर्घा। 8 टर बार-येशू होच्यौ अर्को म्यार्मीन एलुमासै (ग्रीक भासाङ होसे एलुमास म्यार्मीनौ अर्थ जादूगर हो) सर्गीयस पौलसकी विश्वासलकीङ ल्हेटाक्की पा र होखुरीककी बाढा जाटा। 9 टर साउलै (होसकी पावल र डेले) पवित्र आत्मै न्हेपार एलुमासकी एकोहोरो ङोसार डेया, 10 “ए शैतानौ मीजा, पट्ट धार्मिकतौ शत्रु, दुष्ट र झुटो कुरै न्हेप्च! ही नाङ प्रभुओ सोझो लाम बाङ्गडीकी माडास्ले? 11 ङोसो, प्रभुओ दण्ड नाङ मीटाक पर्नने र अब नाङ हीर समयसम्म अन्धा छानार नाखानौ ट्याङ्छ र माडाङ्ले।” होटै होडीक न बेला होच्यौ मीमीककी छुम्छ डेबुये हुपा र सुयेर होसकी घोवार डोरीम याल्हेकी डेम मीहुटै इलाक-आलाक पाकी ठाला। 12 होसे बडा-हाकीमै इसे घटना छान्च डाङार विश्वास जाटा हीजैडेनाङ प्रभुओ शिक्षाओ बारेयाङ होचे अचम्म मन्डीया। पावल एन्टीओखीयुङ पीसीडीया सहराङ 13 पावल र मेन लाफाको पाफोस सहरलकीङ पानीजहाजाङ काल्हार पामफीलीयुङ पर्गा सहराङ टाहा। होटै युहन्ना डेच मर्कूस चहीँ बारनाबास र पावलकी डासार यरूशलेमाङ ल्हेसा। 14 टर पावल र बारनाबास चहीँ पर्गा लकीङ ख्योव्हार पीसीडीयुङ एन्टीओखीयाङ नुङा र होखुरीक म्हुङ बाट्च डीननीक सभा ङुच-इम भीत्री नुङार ङुवा। 15 मोशौ व्यवस्था र अगमवक्ताकुङ कीताब लकीङ परेस्न भ्यारखीङ सभाङुच-इमुङ शासककै होखुरीक लेठाङ इट डेयार बीर्न्हका, “ए भाइको, नाखुरीक खाटा भर्मीकुङ लागी अर्ती याछ बचन ले डेनाङ डेम यान्ही।” 16 पावल टोङ्हा र भर्मीकोलाक माच्याक्की डेम मीहुटै इसारा जाटा र डेया, “ए इस्राएलुङ भर्मीको र अन्यजाति परमेश्वरकी मन्डीचको, ङौ कुरा सेनी। 17 इस्राएली जातिकुङ परमेश्वरै कानुङ बोइ-बाज्युकोलाक चुन्डीया र मिश्रदेशाङ ङुनाङ होखुरीककी बाड्को जाति खासा। होसकुङ शक्तिशाली मीहुटै होखुरीककी होसे देशलकीङ छ्युकार राका। 18 उजाड-ठाँवाङ चालीस वर्ष सम्म होसकै न होखुरीककी ङोसा। 19 टब होसकै कनान देशुङ साट जातिकोलाक नास जाटार कानुङ पुस्ताकी अधिकार जाट्की याहा। 20 इसे पट्ट न कुरा ओल्खीयो लागी बुली सय पचास वर्ष टडीक समय लक्डीसा। होटै न्हुइङ समुएल अगमवक्तौ पालो सम्म परमेश्वरै शासन जाट्कीयो लागी न्यायकर्ताको याहा। 21 होस न्हुइङ होखुरीकै राजा ङेहा र परमेश्वरै बेन्यामीन कुलुङ कीसौ लेन्जा मीजा साउलकी राजा याहा। होचे चालीस वर्षसम्म राज्य जाटा। 22 परमेश्वरै साउलकी हटडीरखीङ दाउदकी होखुरीकुङ राजा खासा। होच्यौ बारेयाङ परमेश्वरै डेया, ‘ङै यीसैयो मीजा दाउदकी ङौ मीमन लेखा न डुपा। होचे ङौ पट्ट न इच्छा पुरा जाट्ले।’ 23 इसे भर्मीयो सन्टान लकीङ न लहे जाट्च प्रतिज्ञा अनुसार परमेश्वरै इस्राएलीकुङ लागी काट मुक्तिदाता येशूकी बीर्न्हका। 24 येशू राखी डेनाङ अगाडी युहन्नै इस्राएलुङ पट्ट न भर्मीकोलाक लहे जाट्च पापौ पश्चात्ताप जाटार बप्तिस्मा लाकी डेम प्रचार जाटा। 25 युहन्नै लहो काम भ्याकी पाचबेलाङ डेया, ‘नाखुरीक ही डेले, ही ङा मसीह हो? ङा होसको होइन। टर ङा न्हुइङ काट जना राल्हे, होसकुङ मीहीलुङ चप्पलौ फीटा पीसाक्ङ याखी सम्म र ज्योस्च ङा माले।’ 26 “ए, अब्राहामौ सन्टानको र परमेश्वर खाटा बीर्हीछ अन्यजाति डाजे-भाइको, इसे मुक्ति याछ सेछ-समचार काल्हा लेठाङ न बीर्न्हकामने। 27 हीजैडेनाङ यरूशलेमुङ बासीन्डाको र होखुरीकुङ शासककै येशू न मसीह हो डेयार माचीन्डीया। हरेक म्हुङ बाट्च डीनाङ परेस्च अगमवक्ताकुङ बचनको र माबुझडीसा। होटबाटै होसकोकी मृत्युदण्डओ आज्ञा याहा र होसकुङ बारेयाङ रीक्च बचन पुरा छाना। 28 येशूकी साट्की पर्च कारन हीर माडुप्नाङ र होखुरीकै होसकोकी साट्की पर्ले डेयार पिलातस खाटा बिन्ती जाटा। 29 होसकुङ बारेयाङ धर्मशास्त्राङ रीक्च पट्ट न कुरा होखुरीकै पुरा जाट्रखीङ येशूकी होखुरीकै क्रूसीङ झालाकार चीहानाङ ठाका। 30 टर परमेश्वरै होसकोकी सीच लकीङ जीवाटाका। 31 होसको खाटा गालील लकीङ यरूशलेमाङ राछकै होसकोकी वास्टै याक सम्म डाङ्ङ ङुवा। होखुरीक न चाहाँ इस्राएलुङ भर्मीकुङ म्याहासाङ होसकुङ साक्षीको हो। 32 परमेश्वरै कानुङ बोइ-बाज्युकोखाटा प्रतिज्ञा जाटा। होटबाटै सेछ-समाचार कान नाखुरीककी सेटाक्ले, 33 कुटजाट्न परमेश्वरै येशूकी सीच लकीङ जीवाकार सोटा। होसे कुरा काल्हा, होखुरीकुङ सन्टानौ लागी पुरा जाट्न याहा, भजनसंग्रह नीसाङ रीक्ङने, ‘नाङ ङौ लेन्जा मीजा हो, छीनी ङै नाङ्की डीनन्हने।’ 34 “अनी परमेश्वरै मुक्ति याछ ख्रीष्टकी अब सेन्र मासीच जाट्न सीच लकीङ जीवाक्ले डेच बारेयाङ चहीँ इट डेमने, ‘ङा नाखुरीककी दाउदखाटा प्रतिज्ञा जाट्च पवित्र र अटल आसीसको याल्हे।’ 35 “हीजैडेनाङ अर्को ठावाङ र इट डेमने, ‘नाकै लहो पवित्र जनौ शरीर घेरेल्की माय्हाले।’ 36 “दाउदै लहे न इसे बारेयाङ माडेया, हीजैडेनाङ आसकै चहीँ लोहो पुस्ताङ जीवन भरी परमेश्वरौ योजना अनुसार सेवा जाटा, र होसे सीरखीङ मेन बोइ-बाज्युकोखाटा ठाका र होच्यौ शरीर घेरेला। 37 टर सुकी परमेश्वरै सीच लकीङ जीवाटाका होसकुङ शरीर चहीँ माघेरेला। 38 होटबाटै डाजे-भाइको, नाखुरीककी थाहा छान्ख्यौ, इसे न भर्मी येशूलकीङ पाप-क्षमा छान्ले डेच घोसना नाखुरीककी जाट्नने। 39 नाखुरीक विश्वास जाट्चको पट्टकै होसको लकीङ न पट्ट न पापलकीङ छुटकारा डुप्नने। होसे छुटकारा मोशौ व्यवस्थालकीङ नाखुरीकुङ लागी सम्भव मालेया। 40 होटबाटै होसीयार ङुनी, नभा च अगमवक्ताकुङ कीताबाङ रीक्च इसे कुरा नाखुरीक मीटाक आइआपरे: 41 ‘ङोस्नी, ए गील्ला जाट्चको, अचम्म मन्डीनी अनी नास छान्नी, हीजैडेनाङ नाखुरीकुङ समयाङ ङा काट काम जाट्ले, होसे कामौ बारेयाङ सुयेर नाखुरीककी डेम यान्हाङ र नाखुरीकै विश्वास माजाट्ले।’” 42 पावल र बारनाबास सभाङुच इमीङ ख्योव्हार नुङ्च बेलाङ भर्मीकै “अर्को म्हुङ बाट्चनीक र इसे न कुरौ बारेयाङ सेटाक्ङ याख्यौ, डेयार होखुरीककी बिन्ती जाटा।” 43 सभा भ्यारखीङ यहूदीको र यहूदी धर्म मन्डीच अन्यजाति भक्टको पावल र बारनाबासकी डुटा। अनी पावल र बारनाबास होखुरीक खाटा ङाक्चै परमेश्वरौ अनुग्रहाङ सधैँ ङुम-ङुकी डेयार होखुरीक खाटा बिन्ती जाटा। 44 अर्को म्हुङ बाट्च डीनाङ वास्टै जसो न सहरुङ भर्मीको प्रभुओ बचन सेकी डेम उल्टडीसार राहा। 45 होटै यहूदीकै भीडकोलाक डाङार होखुरीकुङ मीमन डाहै न्हेपा र पावलै ङाक्च कुरौ विरोधाङ होसकी च्याका। 46 टर पावल र बारनाबासै साहास जाटार डेया, “परमेश्वरौ बचन चहीँ पट्ट डेनाङ पहीला नाखुरीककी न सेटाक्की खाँचो लेया। नाखुरीकै इसकी इन्कार जाटार लाहाकी सेन्र मासीच जीवनौ लागी अयोग्य ठहरडीचबाटै कान अब अन्यजातिको लेठाङ नुङ्ले। 47 हीजैडेनाङ प्रभुये कानकी याङ्च आज्ञा याम्हने, ‘पृथ्वीयो अन्ट सम्म मुक्ति टाहाक्की डेम ङै नाखुरीककी अन्यजातिकुङ लागी काट ज्योति छान्की चुन्डीमने।’” 48 इसे कुरा सेयार अन्यजातिको मार्हाङ्छै प्रभुओ बचनौ प्रशंसा जाटा र सेन्र मासीच जीवनौ लागी चुन्डीचको जटीये बचनकी विश्वास जाटा। 49 प्रभुओ बचन पट्ट क्षेत्रलाक फैलडीसा। 50 टर पावल र बारनाबासौ विरोधाङ यहूदीकै भक्ति जाट्च र भर्मीकै मान जाट्च मास्टो भर्मीको र सहरुङ मुख्य-मुख्य भर्मीकोलाक सोटा। होखुरीककी सटडीयार मेखुरीकुङ क्षेत्र लकीङ छ्युकार खेट्डीम का। 51 पावल र बारनाबासै चहीँ परमेश्वरै न न्याय जाट्ले डेम लोहो मीहीलुङ झाबुल होखुरीकुङ विरोधाङ खार्हाम डार आइकोनीयन सहराङ नुङा। 52 एन्टीओखीया सहराङ डास्न डाच बीस्वासीको पवित्र आत्मा र आनन्दै न्हेपा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.