प्रेरित 12 - पुर्वीय मगरहेरोद राजालकीङ सतावट 1 होडीक बेला राजा हेरोद अग्रिपासै मण्डलीयुङ कुडीक जना विश्वासीकोलाक मासेम्ह सटडीकी ठाला। 2 होचे युहन्नौ डाजे याकुबकी टरवारै साट्की लैडीया। 3 याकुबकी साट्रखीङ यहूदीको मार्हाङ्छ डाङार हेरोदै पत्रुसकी र घोवा। इसे घटना अखमीरी रोटोओ चाडौ बेलाङ छानन्या। 4 होटै हेरोदै पत्रुसकी घोरखीङ झ्यालखानाङ का र छुट्कारौ चाड न्हुइङ मट्टै होसकी न्यायौ लागी भर्मीकुङ अगाडी राक्च बीचार जाटार होसकी रुङ्की डेम बुली टोलीयुङ बुली सीपाहीकोलाक जीम्मा याहा। 5 इटजाट्न पत्रुसकी झ्यालखानाङ का टर होच्यौ लागी मण्डलीये परमेश्वर खाटा लगाटार प्रार्थना जाट्न ङुमन्या। झ्यालखानीङ पत्रुसै छुटकारा डुप्च 6 हेरोदै पत्रुसकी न्यायौ लागी भर्मीकुङ म्याहासाङ बाहीर राक्की पर्च डीनौ अगाडीयुङ नाबीक पत्रुस नीस जना सीपाहीकुङ मीघ्याङ मीस्न ङुमन्या। होसकी नीस साङ्लै छ्याक्नन्या र सीपाहीको र झ्यालखानौ गालाम अगाडी टोङ्हार रुङ्ङङुमन्या। 7 मोसोमायाङ प्रभुओ काट स्वर्गदूत होला डाङा र कोठाङ ट्याङ-ट्याङ डाङ्ङ ज्योति चम्कडीसा। अनी स्वर्गदूतै पत्रुसकी कोट्याकार, “छीटो सोना” डेयार होसकी सोटा। होटै पत्रुसौ नीस मीहुटाङ छ्याक्च साङ्लाको भाराहार झाला। 8 होटै स्वर्गदूतै पत्रुसकी डेया, “पटुका छ्याको र जुट्टा बील्हो।” अनी पत्रुसै होटन जाटा। फेरी स्वर्गदूतै होसकी डेया, “खास्टो बील्हार ङा न्हुङ-न्हुङ रान्हा।” 9 पत्रुस होटै ख्योव्हार स्वर्गदूतौ न्हुङ-न्हुङ नुङा। टर स्वर्गदूतै जाट्च इसे कुरा साँच्ची न हो डेयार होसकी थाहा माछाना। होचे दर्शन डाङ्ङन ले डेम आर्मीटा। 10 होखुरीक पहीला र दोस्रो रुङ्च सीपाहीकुङ टोली लकीङ चेसार सहराङ ख्योछ फलामौ गालामाङ टाहा। होसे गालाम मेल्हा न होखुरीकुङ लागी फोसा र होखुरीक बाहीर ख्योव्हार काट गल्लीयो लामीङ नुङा र तुरुन्तै स्वर्गदूत पत्रुसकी डासार व्हा। 11 होटै पत्रुस झस्याङ्ग छानार लहाकी ही छान्च हो डेम थाहा डुपा र होचे डेया, “अब ङाकी साँच्ची न थाहा छाना, प्रभुये लहो स्वर्गदूत बीर्न्हकार हेरोद राजौ मीहुटीङ र यहूदीकै ङाकी ही जाट्की पामन्या होसे पट्ट लकीङ जोगडीया।” 12 पत्रुसकी इसे कुरा थाहा छान्च पछी, होसे मर्कूस डेच युहन्नौ मोइ मरीयमौ इमाङ नुङा। होला वास्टै विश्वासीको जम्मा छानार प्रार्थना जाट्न न लेया। 13 पत्रुसै गालाम ढ्वाक-ढ्वाक जाटा र रोडा डेच काट नोकर्नी गालाम फोकी राहा। 14 होचे पत्रुसौ सोर चीन्डीया र मार्हाङार गालाम माफोम न ल्हेसार खेर्न नुङा, “पत्रुस गालामटुङाङ टोङ्ह ङुमने” डेयार सेटाका। 15 टर होखुरीकै रोडाकी डेया, “नाङ बौलडीसा की य्हाले?” टर होचे साँच्ची न हो डेयार जीड्ढी जाटा। अनी होखुरीकै डेया, “होसे पत्रुसकी सहायटा जाट्च स्वर्गदूत औँला।” 16 टर पत्रुसै चहीँ गालाम ढ्वाक-ढ्वाक जाट्न न ङुवा। होटै गालाम फोनाङ होसकी डाङार होखुरीक छक्क पर्या। 17 पत्रुसै माच्याक्नी डेम मीहुटै इसारा जाटा र प्रभुये होसकी कुटजाट्न झ्यालखानालकीङ बाहीर छ्युका डेच पट्ट न घटनाको होखुरीककी सेटाका। होटै न्हुइङ होखुरीककी डेकी डेम “इसे खबर याकुब र अरु डाजे-भाइकोलाक सेटाक्की” डेयार होसे होटै अर्को न ठावाङ नुङा। 18 ट्याङरखीङ गोराक न पत्रुसकी ही छाना डेम सीपाहीकुङ मीघ्याङ बाड्को हल्ल-खल्ल छाना। 19 हेरोद राजै होसकी पाकी लैडीया टर माडुप्च पछी सीपाहीकोलाक कडा केरकार जाटा। हीर जबाफ माडुप्नाङ होखुरीककी साट्की डेम हुकुम याहा। होटै हेरोद राजा यहूदिया डासार कैसरीया सहराङ नुङार होला न ङुवा। हेरोद राजा सीच 20 हेरोद राजा टुरोस र सीडोनुङ भर्मीकोखाटा सार्है मीरीस ख्योम्हन्या। होसे नीस सहरुङ भर्मीकै ज्याच अन्न हेरोदौ देशीङ राक्की परन्या। होटबाटै होखुरीक काट मीमनुङ छानार हेरोद लेठाङ खाट्की डेम राहा। होच्यौ काम जाट्च भर्मी बलस्तसखाटा साहयटा ङेहार राजाकी डुप्की बिन्ती जाटा। 21 होटै टोक्डीच डीननीक राजै बील्छ बढीन बील्हार हेरोद सीङ्हासनाङ ङुवा र भर्मीकोलाक होचे भासन याहा। 22 भर्मीकै “इसे च डेवटौ बोली हो, भर्मीयो होइन!” डेयार च्याका। 23 हेरोदै परमेश्वरकी आदर माजाट्चबाटै होडीक बेला न प्रभुओ काट स्वर्गदूतै होसकी पर्हार जाटा र बीरामी छाना अनी होसे डुकार सीया। 24 टर परमेश्वरौ बचन चहीँ नीरन्टर फैलडीस्चै र विश्वासीको बड्डीस्चै नुङा। 25 बार्नाबास र साउल लोहो सेवाकाइ पुरा जाटार यरूशलेमीङ एन्टीओखीयाङ ल्हेसा। होखुरीकै युहन्ना डेच मर्कूसकी र लाहाखाटा राका। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.