प्रेरित 11 - पुर्वीय मगरपत्रुसै यरूशलेमुङ मण्डलीकी बयान याछ 1 यहूदियाङ लेच प्रेरितको र अरु विश्वासी डाजे-भाइकै अन्यजातिकै र परमेश्वरौ बचन विश्वास जाट्लेसा डेम सेया। 2 अनी पत्रुस यरूशलेमाङ राहा, टब खतना जाट्च यहूदी विश्वासीकै होसकी दोष याखी ठाला, 3 “नाको खटना माजाट्च भर्मीकुङ इमाङ नुङार होखुरीक खाटा ज्याकी गाकी माछान्च लेया।” 4 होटबाटै पत्रुसै ही-ही घटना छानन्या, होसे कुराको सुरुलकीङ न पट्ट न डेकी ठाला। 5 “ङा योप्पा सहराङ प्रार्थना जाट्न ङुनाङ ङै काट दर्शन डाङा। बाड्को टन्ना ल्याक्च बुली पट्टी छ्याक्च स्वर्ग लकीङ म्हाका झाल्चै जाट्च डाङा र होसे ङा लेठाङ राहा। 6 होटै ङै होसकी सेम्हजा ङोसा, होला पृथ्वीयुङ पट्ट न पसुको र जङ्गली जनावरको, घस्रडीस्च जन्टुको र सर्घाङ भुर्च ग्वाजाको डाङा। 7 ङै इट डेच काट सोर सेया, ‘ए पत्रुस सोना, होखुरीककी साटार ज्यौ।’ 8 टर ङै डेया, ‘होइन प्रभु, ङै सेन्र हीर अशुद्ध ठोक र व्यवस्थै ज्याकी माछान्ले डेच ठोक माज्यामे।’ 9 टर फेरी स्वर्ग लकीङ होसे न सोरै ङाकी डेया, ‘परमेश्वरै शुद्ध खास्न भ्याच ठोककी नीये अशुद्ध मामन्डीयो।’ 10 अनी सोम खेप सम्म होट न छानार होसे पट्ट न ठोकको फेरी स्वर्गलाक न ल्हेसा। 11 होडीक न बेला कैसरीया लकीङ ङाकी आर्घाकी बीर्न्हकाच सोम जना भर्मीको ङा ङुच इमाङ टाराहा। 12 होटै पवित्र आत्मै ङाकी होखुरीक खाटा अप्ठ्यारो मामन्डीम नुङ्की डेया। होखुरीक छ जना विश्वासी डाजे-भाइको र ङाखाटा नुङा र कान कर्नेलियसौ इम भीत्री पर्या। 13 अनी होचे कानकी डेया, काट स्वर्गदूत होच्यौ इमाङ राहार इट डेच होचे डाङा, ‘योप्पा सहराङ लेच पत्रुस डेच सीमोनकी आर्घाम कानी। 14 होचे नाङ्की बचन सेटाक्ले, र होसे बचन लकीङ न नुओ पट्ट न परीवारै मुक्ति डुप्ले।’ 15 “होटै ङा ङाक्की ठाला, टब सुरुवाङ काल्हा मीटाक पवित्र आत्मा रान्हाङ लेखा न होखुरीक मीटाक र राहा। 16 टब प्रभुये डेच होसे बचन ङै आर्मीटा, ‘युहन्नै च डीये बप्तिस्मा याहा टर नाखुरीकुङ चहीँ पवित्र आत्माङ बप्तिस्मा छान्ले।’ 17 प्रभु येशू ख्रीष्ट मीटाक विश्वास जाट्नाङ परमेश्वरै कानकी पवित्र आट्मौ वरदान याम्हन्या, होखुरीककी र होसे न वरदान यार्हखीङ परमेश्वरकी रोकडीकी य्होक्च ङा सु हो र?” 18 पत्रुसौ इसे कुरा सेरखीङ यहूदी विश्वासीको होसकी दोष याखी डासार “अहो! परमेश्वरै अन्यजातिकोलाक र सेन्र मासीच जीवन डुप्कीयो लागी पश्चात्ताप जाट्च मौका याल्हेसा” डेयार परमेश्वरौ प्रशंसा जाटा। एन्टीओखीया सहरौ मण्डली 19 स्तिफनसकी साट्रखीङ यरूशलेमाङ सतावट छान्चबाटै होलुङ विश्वासीको पट्टलाक छरपस्ट छानार नुङा। होखुरीक फोनीके, साइप्रस र एन्टीओखीयासम्म टाहा टर अरु जातिकोलाक चहीँ होइन यहूदीकोलाक मट्टै बचन प्रचार जाटा। 20 टर होखुरीक कुडीक जना चहीँ साइप्रस र कुरेनीयुङ विश्वासीको लेया र होखुरीक एन्टीओखीयाङ नुङार अन्यजातिकोलाक र प्रभु येशूओ बारेयाङ सेटाका। 21 होखुरीक खाटा प्रभुओ शक्ति लेचबाटै वास्टै भर्मीकै विश्वास जाटा र बाड्को सङ्ख्याङ प्रभुपट्टी ल्हेसा। 22 इसे खबर यरूशलेमाङ लेच मण्डलीयुङ भर्मीकै सेया। होटै होखुरीकै बारनाबासकी एन्टीओखीयाङ बीर्न्हका। 23 होला टाहार होलुङ भर्मीकोवाङ परमेश्वरौ अनुग्रह डाङार होसे मार्हाङा। होटै होचे होखुरीक पट्ट कोलाक प्रभुवाङ पुरा मीमनै विश्वासी छान्न ङुकी डेम उत्साह याहा। 24 बारनाबास पवित्र आत्मा र विश्वासै न्हेप्च असल भर्मी लेया। होचे जाट्न वास्टै भर्मीकै प्रभुकी विश्वास जाटा। 25 होस न्हुइङ साउलकी पाकी डेम बारनाबास टार्सस सहराङ नुङा। 26 होचे साउलकी डुपा र होसकी एन्टीओखीयाङ राका। होखुरीक काट वर्ष सम्म मण्डलीयुङ भर्मीकोखाटा सङ्गटी जाट्चै र वास्टै भर्मीकोलाक शिक्षा याहा। एन्टीओखीयाङ न पट्ट डेनाङ पहीला विश्वासी कोलाक ख्रीष्टीयान डेच हो। 27 होडीक बेला कुडीक जना अगमवक्ताको यरूशलेमलकीङ एन्टीओखीयाङ राहा। 28 अनी होखुरीक मढ्याङ अगाबस डेच काट जना सोवार संसाराङ बाड्को अनीकाल छान्की पामने डेच कुरा पवित्र आत्मालकीङ भविष्यवाणी ङाका। (होसे अनीकाल क्लौडीयस राजै राज्य जाट्च बेलाङ छाना।) 29 होटै याङ्च कुरा सेयार पट्ट न विश्वासीकै लाहा-लहे य्होक्ठर यहूदियाङ ङुच डाजे-भाइकुङ सहायटौ लागी भेटी याम्हकाच नीस्चय जाटा। 30 अनी होखुरीकै सोट्च भेटी बारनाबास र साउलौ मीहुटीङ यरूशलेम मण्डलीयुङ अगुवाकोलाक याम्हका। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.