प्रेरित 10 - पुर्वीय मगरकर्नेलियसै पत्रुसकी आर्घाच 1 कैसरीया सहराङ कर्नेलियस डेच काट जना भर्मी लेया र होसे इटालीया डेच रोमी पल्टनुङ कप्तान लेया। 2 होसे परमेश्वराङ भक्टी जाट्च भर्मी लेया अनी होसे र होच्यौ पट्ट न जाहानको परमेश्वर खाटा बीर्हीमन्या। होचे गरीबकोलाक भीत्री मीमनीङ सहायटा जाट्चै र सधैँ परमेश्वर खाटा प्रार्थना जाट्नन्या। 3 कायाक नाम्सीन होचे सोम बजे पट्टी दर्शनाङ परमेश्वरौ काट स्वर्गदूतै लाहा पट्टी राहार इट डेच सेया, “ए कर्नेलियस!” 4 अनी कर्नेलियस बीर्हीयार स्वर्गदूतकी सेम्हजा ङोसार डेया, “हजुर, प्रभु?” स्वर्गदूतै होसकी डेया, “नुओ प्रार्थना र नीये गरीबकोलाक जाट्च सहायटाकुङ पट्ट न कुरा परमेश्वर लेठाङ टाम्हने र होसे पट्ट न होसकै आर्मीट्न डामने। 5 अब योप्पा सहराङ सीमोन डेच पत्रुसकी आर्घाकी भर्मीकोलाक बीर्न्हकौ। 6 होसे छालौ काम जाट्च सीमोनौ इमाङ ङुमने, होच्यौ इम समुन्द्रओ छेवाङ ले।” 7 इट डेम भ्यारखीङ स्वर्गदूत कर्नेलियसखाटा बिदा छाना। होटै कर्नेलियसै नोकरको मढ्याङ लहो नीस जनाकीर परमेश्वरकी मन्डीच काट जना सीपाहीकी आर्घा। होसे सीपाहीये चहीँ सधैँ कर्नेलियसौ सेवा जाट्नन्या। 8 होखुरीककी पट्ट न कुरा डेयार योप्पा सहराङ बीर्न्हका। 9 पीउर्हाक लेखो नाम्सीन बार्ह बजे पट्टी होखुरीक योप्पा सहर खेरेप टार्हामन्या र होडीक बेला पत्रुस चहीँ प्रार्थना जाट्की डेम इमौ कौसीयाङ नुङा। 10 पत्रुसकी मीटुक रन्छीमन्या र हीर ज्याच-गाच मीमन जाटा र अरुकै ज्यामा-गामा टयार जाट्नन लेनाङ होडीक बेला न होसे प्रार्थनाङ ढ्यान-मग्न छाना। 11 पत्रुसै स्वर्ग फोस्च र होटै बुलीकोनाङ न छ्याक्च बाड्को टन्ना ल्याक्च पृथ्वी पट्टी झाल्नन लेच डाङा। 12 होसे टन्नाङ पृथ्वीयुङ पट्ट न खाल्या पसुको, झाङ घसारीसार व्हाच जीव जन्टु र सर्घाङ भुर्च ग्वाजाको लेया। 13 होचे याङ्च काट सोर सेया, “ए पत्रुस सोना, होखुरीककी साटार ज्यौ।” 14 टर पत्रुसै डेया, “होइन प्रभु, ङै सेन्र हीर अशुद्ध ठोक र व्यवस्थै ज्याकी माछान्ले डेच ठोक माज्यामे।” 15 होसे सोर फेरी होचे सेया, “परमेश्वरै शुद्ध खास्च ठोककी नीये अशुद्ध मामन्डीयो।” 16 याङ्च सोम खेप सम्म छाना होटै होसे टन्ना तुरुन्तै स्वर्ग पट्टी आल्हा। 17 पत्रुस लहे डाङ्च दर्शनौ अर्थ ही औँला डेम मीमनाङ अलमल्ल छान्न ङुमन्या र होडीक न बेला कर्नेलियसै बीर्न्हकाच भर्मीको सीमोनौ इम पाचै गालामटुङाङ टाराहा। 18 र होखुरीकै बाड्को सोरै गीना, “सीमोन डेच पत्रुस इला ङुमे की?” 19 जब पत्रुसै दर्शनौ बारेयाङ बीचार जाट्न न लेया, पवित्र आत्मै होसकी डेया, “ङोसो, सोम जना भर्मीकै नाङ्की इला पामन ले। 20 सोना र म्हाका नुङ्ना अनी डोढार मामन्डीम होखुरीक खाटा नुङ्ना, हीजैडेनाङ होखुरीककी ङै बीर्न्हकाच हो।” 21 होटै पत्रुस म्हाका झाला र होसे भर्मीको लेठाङ नुङार डेया, “नाखुरीकै पाच भर्मी ङा न हो, नाखुरीक इला ही कामै राछ औँला?” 22 होखुरीकै डेया, “काट जना कप्तान कर्नेलियसै कानकी बीर्न्हकाच हो। आसको इमान्डारी र परमेश्वर खाटा बीर्हीछ भर्मी ले। आसकोकी पट्ट यहूदी जातिकै र आदर जाट्ले। नाकोकी आसकुङ इमाङ आर्घार नाकोलकीङ सन्देश सेकी डेम काट पवित्र स्वर्गदूतै आसकोकी आज्ञा याम्हने।” 23 पत्रुसै होखुरीककी इम भीत्री आर्घा र होखुरीक होसे नाबीक होला न बास ङुवा। पीउर्हाक लेखो पत्रुस र योप्पाङ लेच कुडीक जना विश्वासी डाजे-भाइको र होसे भर्मीकोखाटा नुङा। 24 आपर्हीन लेखो होखुरीक कैसरीयाङ टाहा। कर्नेलियसै लहो कुटुम्बको र खाट्च लाफाकोलाक आर्घार होखुरीककी लेन्न ङुमन्या। 25 जब पत्रुस इमाङ टार्हाछ बीट्टीकै कर्नेलियसै डुपा र होच्यौ मीहीलाङ झोरा। 26 टर पत्रुसै होसकी इट डेचै सोटा, “सोनी, ङाच काट भर्मी मट्टै हो।” 27 पत्रुस कर्नेलियस खाटा ङाक्चै इम भीत्री पर्या। होला होचे वास्टै जना भर्मीको जम्मा छान्च डुपा। 28 पत्रुसै होखुरीककी डेया, “अरु जातिकोखाटा सङ्गट जाट्की र होखुरीक खाटा डुप्की चहीँ काट यहूदीयो लागी व्यवस्थौ विरुद्ध हो डेच कुरा नाखुरीककी थाहा न ले। टर परमेश्वरै ङाकी सुकीर अशुद्ध माठहरीडीकी डेयार टान्हाक्ने। 29 होटबाटै आर्घाच बीट्टीकै हीर अप्ठ्यारो मामन्डीम ङा नाखुरीक लेठाङ राहा। नाखुरीकै ङाकी हीजै आर्घाच औँला? अब डेनी।” 30 कर्नेलियसै डेया, “बुलीयाक अगाडी ङा नामसीन सोम बजे इमाङ प्रार्थना जाट्न न लेया। होडीक न बेला चहकीलो बढीन बील्छ काट जना भर्मी ङौ म्याहासाङ टोङ्हा 31 र डेया, ‘ए कर्नेलियस, परमेश्वरै नुओ प्रार्थना सेमने र नीये गरीबकोलाक याछ दानौ बारेयाङ होसकै आर्मीट्न ने। 32 होटबाटै योप्पाङ लेच सीमोन डेच पत्रुसकी आर्घाकी भर्मी बीर्न्हकौ। होसे समुन्ड्ओ छेवाङ छालौ काम जाट्च सीमोनौ इमाङ ङुमने।’ 33 होस न्हुइङ ङै तुरुन्तै नाकोलेठाङ भर्मी बीर्न्हका अनी नाको दया जाटार राम्ह याहा। अब प्रभुये नाकोकी आज्ञा याछ पट्ट न कुराको सेकी कान पट्टको परमेश्वरौ अगाडी भेला छान्नने।” पत्रुसै बचन सेटाक्च 34 होटै पत्रुस ङाक्की ठाला, “साँच्ची न चाहाँ ङै डाङ्ने, परमेश्वरै सुकीर पक्छ्यपाट माजाट्ले। 35 भर्मी कुसे जातियो लेनाङ र होसकोखाटा बीर्हीले र ठीक काम जाट्ले, होसे होसकुङ म्याहासाङ ग्रहण योग्यौ छान्ले। 36 परमेश्वरै येशू ख्रीष्ट लकीङ इस्राएलीकोलाक बीर्न्हकाच शान्तियो सेछ समाचार नाखुरीककी थाहा न ले। होसको न पट्टकुङ प्रभु हो। 37 युहन्नै बप्तिस्मौ प्रचार जाट्च न्हुइङ, गालील लकीङ सुरु जाटार पट्ट यहूदियाभरी प्रचार जाट्च बचन इसे न हो। 38 नाखुरीककी थाहा न ले, परमेश्वरै नासरतुङ येशूकी पवित्र आत्मा र शक्तिये अभिषेक जाटा। अनी होसको सेछ काम जाट्चै र शैतानै सटडीच पट्ट कोलाक गेपाक्चै व्हा, हीजैडेनाङ परमेश्वर होसकोखाटा लेया। 39 होसकै यहूदिया क्षेत्राङ र यरूशलेमाङ जाट्च पट्ट न कुराकुङ कान साक्षी ले। अनी होसकोकी होखुरीकै क्रूसाङ टङ्गडीयार साटा। 40 टर सोम याकाङ होसकोकी परमेश्वरै सीच लकीङ जीवाटाका र होसकोकी डाङ्की डीन्हा। 41 पट्ट न भर्मीकोलाक चहीँ होइन, टर कानकी परमेश्वरै साक्षी खास्कीयो लागी अगाडी लकीङ न चुन्डीमन्या। अनी होसको सीच लकीङ जीवाच न्हुइङ कानखाटा डुपा र कान होखुरीक न हो सुये होसकोखाटा ज्याम-गाम जाटा। 42 होसकै कानकी भर्मीकोलाक प्रचार जाट्की र होसको जीवाचकुङ र सीचकुङ न्याय जाट्च छान्कीयो लागी परमेश्वर लकीङ न चुन्डीच व्यक्ति हो डेच गबाही याखी आज्ञा याम्हने। 43 पट्ट अगमवक्ताकै र होसकुङ बारेयाङ इट डेयार गबाही याम्हने होसको मीटाक विश्वास जाट्चको पट्टये होसकुङ म्यार्मीनाङ पाप-क्षमा डुप्ले।” 44 पत्रुसै इसे कुरा ङाक्नाङ-ङाक्नाङ न बचन सेचको पट्ट मीटाक पवित्र आत्मा राहा। 45 पत्रुस खाटा राछ योप्पुङ यहूदी विश्वासीको अन्यजातिको मीटाक र परमेश्वरौ वरदान पवित्र आत्मा राछ डाङार अचम्म मन्डीया। 46 हीजैडेनाङ अन्य भासाकोवाङ ङाकार होखुरीकै परमेश्वरौ प्रशंसा जाट्च होखुरीकै सेया। अनी पत्रुसै डेया, 47 “कानै लेखा न इखुरीकै र पवित्र आत्मा डुप्मने। अब इखुरीककी डीयो बप्तिस्मा लाकी सुये ठुन्की य्होक्ले र?” 48 होटबाटै पत्रुसै होखुरीककी येशू ख्रीष्टौ म्यार्मीनाङ बप्तिस्मा लाकी डेम आज्ञा याहा। होटै होखुरीकै पत्रुसकी कालाप डीन सम्म मेखुरीक खाटा ङुकी डेयार बिन्ती जाटा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.