२ टीमोठी 4 - पुर्वीय मगरसेछ समाचार सेटाक्च जीम्मा 1 परमेश्वरौ म्याहासाङ र जीउँडो र सीचकुङ न्याय जाट्की राछ ख्रीष्ट येशूओ म्याहासाङ, अनी होसको राहार राज्य जाट्ले डेच कुराकी जोड याहार ङा नाकोकी कडा आज्ञा याल्हे, 2 परमेश्वरौ सेछ समाचार सेटाक्नी, कुङ्च समयाङ र सेछ समाचार सेटाक्की टयार छानार ङुकी, नम्र छानार दुष्ट कामलकीङ ल्हेसाक्की हप्कडीनी, चेटावनी यान्ही, हौसला यान्ही र शिक्षा याखी माचुकडीस्की। 3 हीजैडेनाङ याङ्च समय राम्हन ले, भर्मीकै साँचो शिक्षाकी सहडीकी माय्होक्ले। टर होखुरीक लहे जाक्ङ सेच कुराको मट्टै सेकी इच्छा जाट्ले होटबाटै लाहाकी मज्जा सेच कुराको सेटाक्च शिक्षकको भेला जाट्ले। 4 होखुरीकै सत्य कुराको सेकी न मापाले टर दन्त्य कठाको चहीँ सेकी मीमन जाट्ले। 5 टर नाको चहीँ पट्ट न कुराङ सचेट छान्नी, डुख सोट्नी, सेछ समाचार सेटाक्च काम जाट्नी र लहे सेवा जाट्की डुप्च काम पुरा जाट्नी। 6 अब ङा च बली छान्की पामने। ङा सीच बेला राम्हभ्यामने। 7 ङै पट्ट डेनाङ सेछ विश्वासौ लडाइ जाट्न भ्यामने। ङै खेर्च काम भ्यामने, र ङौ विश्वासकी ङै ढान्न डामने। 8 अब ङौ लागी धार्मिकतौ मुकुट डामने, होसे चहीँ धार्मिकतौ ठीकखाटा न्याय जाट्च प्रभुये न होसको राछ नीक ङाकी याल्हे। ङाकी मट्टै होइन, होसको फेरी राछ लाम ङोस्च पट्टकोलाक न याल्हे। पावलौ अन्टीम कुराको 9 ङाकी डुप्की य्होक्ठर छीटो रान्ही। 10 डेमासै संसारकी प्रेम जाट्न ङाकी डासार होसे थेसोलोनीके पट्टी नुङा। परमेश्वरौ कामौ लागी केरेसेन्स गलातीयाङ नुङा र तीतस चहीँ दलमातियाङ नुङा। 11 ङा खाटा च चाहाँ लुका मट्टै ले। मर्कूसकी चहीँ नाकै लाहा खाटा न लार राखी। होचे ङौ कामाङ साप्फी सघडीकी य्होक्ले। 12 टुखीकसकी ङै एफीससाङ बीर्न्हकामने। 13 त्रोआसाङ कार्पस लेठाङ डास्च ङौ खास्टो नाको रान्हाङ लार रान्ही। होला लेच कीताबको र छालाङ रीक्च कीताब चहीँ माम्य्हाक्ङ राक्ङ याखी। 14 ढाटुओ काम जाट्च अलेक्जेन्डरै ङाकी एकदम मास्च जाटा। होचे जाट्च कामौ बडला चहीँ होसकी प्रभुये न याल्हे। 15 होचे काल्हौ कुरौ एकडम विरोध जाट्ले। होटबाटै नाको र होसीयार छानार ङुनी। 16 पहीलो पटक ङौ मुद्दा क्योस्च बेलाङ सुयेर ङौ पक्षाङ माङाका। पट्टये ङाकी डास्न याहा। इच्यो दोष होखुरीककी मालग्डीस्ख्यो। 17 टैपनी प्रभुये न ङाखाटा छानार ङाकी शक्ति याहा। होटबाटै ङै पट्ट न अन्यजाति भर्मीकोलाक परमेश्वरौ सेछ समाचार सेम्हजा सेटाक्की य्होका। इटजाट्न होसकै ङाकी सीङ्हौ मेङ्गेर लकीङ जोगडीया। 18 प्रभुये न ङाकी पट्ट खालुङ खराबीको लकीङ जोगडीले। होसकै न ङाकी जोगडीयार लहो स्वर्गौ राज्याङ आल्हे। होसकुङ सधैँभरी प्रशंसा छान्न ङुख्यो। आमेन। 19 प्रिस्किला, अकीलास र ओनेसीफरसौ परीवारकोलाक ङौ मीझोर ले। 20 इरास्तस कोरिन्थीयाङ न ङुमने। टोरोफीमस बीरामी छान्च बाटै होसकी ङै मीलेटसाङ न डासा। 21 जुङ्छ महीना मालक्डीस्न न छीटो राछ कोसीस जाट्नी। युबुलस, पुडेस, लीनस, क्लौडीया र इला लेच पट्ट न विश्वासी डाजेभाइको र डै बहीनीकै नाकोकी झोर्ले डेमकामने। 22 प्रभु नाकुङ आत्मा खाटा न लेख्यो। नाखुरीक पट्टखाटा परमेश्वरौ अनुग्रह ङुख्यो। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.