२ टीमोठी 3 - पुर्वीय मगरअन्ट्यौ डीनको 1 टर तिमोथी नाकै इसे कुराको बुझडीस्न डानी, अन्त्यौ डीनकोवाङ बीर्हीमसेच समयको र राल्हे। 2 होडीक बेलुङ भर्मीको लाहाकी मट्टै माया जाट्च, पैसौ लोभ जाट्च, लाहा मट्टै बाड्को हो डेम आर्मीट्च, घमण्डी, अरुओ बडनाम जाट्चको छान्ले। होखुरीक लहो मोइ बोयो आज्ञा मामन्डीच, बैगुनी र अपवित्र छान्ले। 3 होखुरीक सुकीर माया माजाट्च, निर्दयी र होटन कुरा लैडीच, छाडा, बीर्हीमसेच, सेछ कुरा मन मापर्च छान्ले। 4 होखुरीकै अरुकी ढोका याहार, मनपरी जाट्चै, घमण्ड जाटार व्हाले अनी परमेश्वरकी डेनाङ मोज मज्जाकी न जाक्ले। 5 होखुरीक धर्मी च छान्च ल्हेस्ले टर साँचो शक्तिकी चहीँ इन्कार जाट्ले। याङ्च भर्मीकोलकीङ र नाको लोस ङुकी। 6 हीजैडेनाङ होखुरीक मढ्याङ कुडीकै च कुडीक इमकोवाङ नुङार पापकै फेट्चको र पट्ट खाल्या दुष्ट इच्छा जाट्च कम्जोर मास्टो भर्मीकोलाक लहो अढीनाङ राक्ले। 7 होसे मास्टो भर्मीकै पाखीयो लागी सधैँ कोसीस जाट्ले टर सत्य चहीँ सेन्र चीन्डीकी माय्होक्ले। 8 यान्नेस र याम्बेरेसै मोशौ विरोध जाट्नन्या, होटजाट्न न इसे भर्मीकै र साँचो सत्यकी विरोध जाट्ले। इखुरीकुङ बुढ्डी न बीगारीस्च र नक्कली विश्वासीको हो। 9 टर होखुरीक अझै लोट्च समय सम्म चहीँ टीक्डीस्की माय्होक्ले, हीजैडेनाङ यान्नेस र याम्बेरेसौ लेखा न होखुरीकुङ दुष्ट कामको र पट्ट न भर्मीकुङ म्याहासाङ डाङ्ले। तिमोथीकी पावलै याछ शिक्षा 10 टर नाकै चहीँ ङौ शिक्षा, ङौ चालचलन, ङौ जीवनौ लक्ष्य, ङौ विश्वास, ङौ धैर्यता, ङौ प्रेम, ङौ सहनसीलटा डाङ्ने। 11 एन्टीओखीया, आइकोनीयन र लुस्त्राङ ङै भोग्डीच डुःख नाकै सेम्हजा बुझडीस्नने। टर प्रभुये न ङाकी होसे पट्ट न आपटको लकीङ जीवाटाका। 12 सुये ख्रीष्ट येशूवाङ विश्वास जाटार सेछ जीवन जीवाच इच्छा जाट्ले होखुरीक पट्ट न सटावटाङ पर्ले। 13 टर दुष्ट र ठगको चहीँ अरुकी ठक्डीकी पानाङ लाहा न ठग्डीसार होखुरीक झन्-झन् बीगारीस्चै नुङ्ले। 14 टर नाको चहीँ लहे शिक्षा डुपार विश्वास जाट्च सत्य कुराङ लक्डीस्न ङुकी। होसे शिक्षाको नाकै सु-सुलकीङ डुप्मन्या, होसे च नाङ लाहाकी न ठाहा ले। 15 नाकै च मार्जा लेनाङ लकीङ न पवित्र धर्मशास्त्रौ कुराको सेम्हजा वार्न्हने। इसे न कुराको लकीङ ख्रीष्ट येशूवाङ विश्वास जाट्नाङ डुप्च मुक्तियो बारेयाङ बुझडीस्की ग्यान डुप्ले। 16 पट्ट न धर्मशास्त्र परमेश्वरौ प्ररणा लकीङ रीक्च हो, र इसे पाहाक्की, दुष्ट कामलकीङ ल्हेसाक्की हप्कडीकी, सचडीकी, र धार्मिकताङ टालीम याखी सेम्ह छान्ने। 17 परमेश्वरौ भर्मीकै पट्ट न सेछ कामको जाट्की य्होक्च अटछानै डेम न धर्मशास्त्र याछ हो। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.