२ टीमोठी 2 - पुर्वीय मगरख्रीष्ट येशूओ भक्त सीपाही 1 होटबाटै नाको चहीँ ए ङौ लेन्जा मीजा, ख्रीष्ट येशूवाङ लेच अनुग्रह लकीङ बलीयो छान्नी। 2 ङै वास्टै भर्मीकुङ म्याहासाङ नाकोकी पाहाक्च कुराको, अरु पाहाक्की य्होक्च विश्वासयोग्य भर्मीकोलाक र पाहाको। 3 ख्रीष्ट येशूओ असल सीपाही लेखा न नाकै र डुख सोट्नी। 4 सेनाङ भर्ती छान्च सीपाहीको अरु कामाङ माअल्मडीस्ले हीजैडेनाङ लहो सेनापटीकी खुसी पार्च होखुरीकुङ लक्ष्य छान्ले। 5 खेलकुडाङ भाग लाच खेलाडीये होलुङ नीयमको मामन्डीठर होचे पुरस्कार जुकी माय्होक्ले। 6 परीसरम जाटार बाली लैडीचये न होसे स्याच बालीयो पहीलो भाग डुप्की पर्ले। 7 ङै डेच इसे कुराको बीचार जाट्नी हीजैडेनाङ प्रभुये न नाकोकी इसे पट्ट न कुराको बुझडीस्की शक्ति याल्हे। 8 सीचलकीङ जीवाम सोच राजा दाउदौ सन्टान येशू ख्रीष्टकी आर्मीट्नी। ङै प्रचार जाट्च सेछ समाचार इसे न हो। 9 होसे न सेछ समाचार सेटाक्च बाटै ङै डुख भोक्डीमन ले। होडीक मट्टै होइन, अपराढीकी लेखा न साङ्लीये छ्याकार ठुन्नने। टर परमेश्वरौ बचनकी च सेन्र साङ्लीये छ्याकार डाकी माय्होक्ले। 10 होटबाटै न परमेश्वरै चुन्डीचकुङ लागी ङा पट्ट कुरा सहडीले, टा की होखुरीकै र सधैँभरी ङुमङुच महीमा खाटा ख्रीष्ट येशूवाङ लेच मुक्ति डुप्की अट य्होकै। 11 इसे भनाइ सत्य हो, “इडीक काल्हा होसकोखाटा सीमे डेनाङ, काल्हा र होसको खाटा न जीवाले, 12 इडीक काल्है होसकुङ लागी डुख सहडीले डेनाङ होसकोखाटा न राज्य र जाट्ले। होसकोकी काल्है इन्कार जाटा डेनाङ होसकै र काल्हाकी इन्कार जाट्ले। 13 इडीक काल्हा विश्वासीलो मालेनाङ र होसको च विश्वासयोग्य न छान्न ङुले हीजैडेनाङ होसकै लाहाकी न इन्कार जाट्की माय्होक्ले।” नीस कीसीमुङ शिक्षकको 14 मण्डलीयुङ पट्ट न भर्मीकोलाक इसे कुरा सम्झडीम यान्ही, र परमेश्वरौ म्याहासाङ कडा आज्ञा यान्ही। होखुरीकै शब्दकुङ बारेयाङ वाद विवाद माजाट्ख्यौ, होचे हीर फाइडा माजाट्ले। सेचकोलाक हानी मट्टै जाट्ले। 15 काराम सेकी मापर्च र सत्य बचनकी ठीकखाटा पाहाक्च कामदार लेखा न लहे लाहाकी परमेश्वरौ म्याहासाङ ग्रहणयोग्य खास्की कोसीस जाट्नी। 16 संसारुङ मुर्ख बोलीकोलकीङ लोस ङुनी। इचे च भर्मीकोलाक परमेश्वरलकीङ झन लोस आल्हे। 17 होङ्च शिक्षाको घेरेलार ल्होङ्चै नुङ्च म्हा लेखा न छान्ले। हुमेनीयस र फीलेटसौ शिक्षा र होङ्च न ले। 18 सीच लकीङ जीवाम सोच कुरा अघी न छान्न भ्यामने, अब माछान्ने डेच शिक्षा पाहार होखुरीकै कुडीक जनौ सत्य विश्वासकी न बीगारीम याम्हने। 19 टर परमेश्वर मेखोलै न काच जग सधैँ बलीयो छानार ङुमङुले। इला इट डेम रीक्ङने, “प्रभुये लहो भर्मीकोलाक चीन्डीले” अनी “प्रभुओ म्यार्मीन लाचको जटी पट्ट न खराब कामको लकीङ अलग ङुकी न पर्ले।” 20 धनीकुङ इमाङ सुन र चाँडीयो भाँडाको मट्टै माछान्ले, टर होला सीङ र झओ भाडाको र छान्ले। कोइ भाँडाको बाड्सो कामौ लागी क्योट्ले र कोइ भाँडाको चहीँ मार्जा कामौ लागी क्योट्ले। 21 इडीक पट्ट कीसीमुङ खराब कुराकोलकीङ शुद्ध छान्च भर्मी ले डेनाङ होसे बाड्को इजटौ भाँडा लेखा न छान्ले हीजैडेनाङ होचे लाहाकी चोखो डार मालीकौ लागी पट्ट सेछ कामौ लागी टयार छान्ले। 22 होटबाटै रेन्जा-आर्नामौ बेलाङ राछ मासेछ इच्छाकोलाक डासार शुद्ध मीमनै प्रभुओ म्यार्मीन लाच भर्मीकोखाटा धार्मिकता, विश्वास, प्रेम र शान्तियाङ व्हाकी। 23 टर वार्र्ह मावार्छ मुर्ख वाद विवाद लकीङ लोस ङुकी। नाकोकी ठाहा न ले, इखुरीक लकीङ च झगडा मट्टै छान्ले। 24 प्रभुओ सेवा जाट्चकै झगडा जाट्की माछान्ले। होसे पट्ट खाटा खाट्च छान्की पर्ले अनी सेम्ह पाहाक्की य्होक्च र पट्ट न कुरा सहडीकी य्होक्च छान्की पर्ले। 25 होचे लहो विरोधीकोलाक नम्र छानार सम्झडीकी य्होक्च छान्की पर्ले। होटजाट्न सायद परमेश्वरै होखुरीककी पश्चात्ताप जाट्च र सत्यताकी चीन्डीकी य्होक्च मीमन याल्हे। 26 इटजाट्न होखुरीक लाहा होसाङ राहार शैतानौ फन्डालकीङ भीस्की डुप्ले हीजैडेनाङ होखुरीककी शैतानै लहो कामौ लागी घोवार डामने। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.