२ टीमोठी 1 - पुर्वीय मगर1 परमेश्वरौ इच्छै ख्रीष्ट येशूवाङ लेच जीवनौ प्रतिज्ञा सेटाक्की ङा पावल येशू ख्रीष्टौ प्रेरित छान्च हो। 2 ङाल्हौ न लेन्जा मीजा ल्याक्च तिमोथी नाकोकी ङा इसे रीक्ङन ले। परमेश्वर बोइ र काल्हौ प्रभु ख्रीष्ट येशूये नाङ्की अनुग्रह, कृपा र शान्ति याख्यौ। विश्वासयोग्य छान्न ङुकीयो लागी हौसला 3 ङौ शुद्ध बीबेकखाटा ङा ङौ बोइ बाज्युकै जाट्नाङ लेखा न परमेश्वरौ सेवा जाट्ले। नाबीक नाम्सीन ङौ प्रार्थनाङ ङा नाकोकी आर्मीट्ले। ङौ प्रार्थनाङ ङा नाकुङ लागी परमेश्वरकी धन्यवाद याल्हे। 4 नाको खाटा ङा भाच बेलुङ नाकुङ मीराप्डीकी आर्मीट्चै ङा आनन्दये न्हेप्की डीन्हीङ डेयार नाकोकी डुप्च बाड्को इच्छा जाट्नने। 5 ङाकी नाको खाटा लेच होसे सोझो विश्वासौ सम्झना ले। नाकुङ बज्ये लोइस र मोइ युनीसमा खाटा र होसे सोझो विश्वास लेया। अझै र नाको खाटा होङ्च न विश्वास ले डेच ङौ विश्वास ले। 6 होटबाटै ङा नाकोकी फेरी आर्मीटाक्ले, ङै नाको मीटाक मीहुट डानाङ परमेश्वरै याछ वरदानकी नीये क्योट्चै नुङ्की। 7 हीजैडेनाङ परमेश्वरै काल्हाकी बीर्हीछ आत्मा होइन टर शक्ति, प्रेम अनी लहे लाहाकी अनुसासनाङ डाकी य्होक्च आत्मा याम्हने। 8 होटबाटै कानुङ प्रभुओ साक्षी याखी माकाराकी र ङा ख्रीष्टौ लागी झ्यालखानाङ पर्चबाटै र माकाराकी बरु नाङ र परमेश्वरौ शक्तियाङ सेछ समाचार सेटाक्की डुख सोटो। 9 परमेश्वरै न कानकी जीवाका र लहो न भर्मी छान्की कानकी आर्घा। काल्है जाट्च कामौ आधाराङ होइन, टर मेखोल्हौ न इच्छा र अनुग्रहौ आधाराङ याङ्च जाट्च हो। इसे चहीँ सृष्टि छान्की डेनाङ अघीलकीङ न काल्हाकी ख्रीष्ट येशूये याछ अनुग्रह हो। 10 अनी होसे अनुग्रह चाहा कानकी मुक्ति याछ ख्रीष्ट येशू राहार टान्हाक्ङने। होसकै मृत्युओ शक्तिकी नास जाटा र सेछ समाचार लकीङ सेन्र मासीच जीवन टान्हाका। 11 परमेश्वरै इसे न सेछ समाचार सेटाक्कीयो लागी ङा प्रचारक र प्रेरित अनी शिक्षक छान्की भाका। 12 होटबाटै न ङा इसे कुराकुङ डुख भोक्डीमन ले। टर ङाकी काराम मासेले हीजैडेनाङ ङै सु मीटाक विश्वास डामने, होसे ङाकी ठाहा ले। परमेश्वरै ङाकी जीम्मा याछ कुराकी होसकै न ख्रीष्ट राछ डीन सम्मौ लागी जोगडीयार डाले। इसे कुराङ ङा ढुक्क ले। 13 ङै नाकोकी पाहाक्च सत्य शिक्षौ नमुनाकुङ पालना जाट्की, ख्रीष्ट येशूवाङ लेच विश्वास र प्रेमाङ डाम डाकी। 14 नाकुङ जीम्माङ याछ सेछ कुराकोलाक काल्हा भीत्री बास ङुच पवित्र आत्मौ शक्तिये जोगडीम डाकी। 15 एसीयाङ लेच पट्ट न विश्वासीकै ङाकी डास्च कुराको च नाकोकी ठाहा न ले। होकुरीक मढ्याङ फुगेलस र हर्मोगेनस समेट हो। 16 ओनेसीफरसौ परीवाराङ प्रभुये दया अट जाटै, हीजैडेनाङ होचे ङाकी वास्टै खेप हौसला याहा। अनी ङा झ्यालखानाङ लेनाङ र होसे ङाकी डुप्की राखी माकारा। 17 टर होसे रोमाङ राछ बीट्टीकै होचे ढुइँ-ढुइँ पार ङाकी डुपा। 18 मुक्ति याछ ख्रीष्ट राछ डीनाङ प्रभुलकीङ होचे कृपा डुप्की अट य्होकै। नाकोकी ठाहा न ले, एफीससाङ लेनाङ र होचे ङाकी वास्टै कुराङ सघडीमन्या। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.