२ ठेसलोनीकी 3 - पुर्वीय मगरप्रार्थनौ लागी बिन्ती 1 अन्टीमाङ डाजेभाइ र डै बहीनीको, नाखुरीकुङ मीघ्याङ छान्नाङ लेखा न प्रभुओ सेछ समाचार छीट्टो बड्डीस्ख्यौ, र इचे आदर डुप्ख्यौ डेयार कानुङ लागी प्रार्थना जाट्न यान्ही। 2 अनी कुडीक जना भर्मीको खाटा विश्वास मालेच बाटै परमेश्वरै कानकी खराब भर्मीकोलकीङ जोगडीख्यो डेम प्रार्थना जाट्न यान्ही। 3 टर प्रभु च विश्वास योग्य ले, होसकै न नाखुरीककी बलीयो खास्ले र होसे शैतानलकीङ जोगडीयार डाले। 4 कानै डेच लेखा न नाखुरीकै जाट्न न ले र जाट्ले डेयार कानै प्रभुवाङ न पुरा भरोसा डामने। 5 परमेश्वरै नाखुरीकुङ रीदयकी जाट्च माया र ख्रीष्टौ सहडीच शक्ति बुझडीस्की प्रभुये न डोरीख्यौ। पट्टकै काम जाट्की न पर्ले 6 ङौ डाजेभाइको र डै बहीनीको, कानुङ प्रभु येशू ख्रीष्टौ म्यार्मीनाङ कान नाखुरीककी आज्ञा याल्हे, अल्छी विश्वासीको र कानै याछ शिक्षा मामन्डीच विश्वासीको लकीङ लोस ङुनी। 7 हीजैडेनाङ नाखुरीक खाटा लेनाङ कानै अल्छी जाटार माङुवा। कानै लेखा न नाखुरीकै र जाट्की पर्ले डेच कुरा च नाखुरीककी ठाहा न ले। 8 नाखुरीक सुकीर डुख माहीङ डेयार कानै नाबीक नाम्सीन मेहनट जाटार काम जाटा। पैसा माय्हाम कानै सुखाटा र हीर माज्या। 9 कानै नाखुरीक लकीङ सहायता डुप्च अधिकार मालेचये होइन, टर नाखुरीकुङ लागी नमुना छान्की कानै इट जाटा। 10 नाखुरीक खाटा लेनाङ न कानै नाखुरीककी डेमन्या, “इडीक सुयेर काम माजाट्ले डेनाङ होचे माज्याख्यौ।” 11 हीजैडेनाङ कानै सेमने, की नाखुरीक मढ्याङ कुडीक जना च अल्छीको लेटा। होखुरीक लाहा चहीँ हीर काम माजाट्ले, टर फोकै जाट्च कामाङ व्यार्थौ मीहुट काले। 12 अब याङ्च भर्मीकोलाक प्रभु येशू ख्रीष्टौ म्यार्मीनाङ कान आज्ञा र अर्ती याल्हे, की होखुरीकै माच्याक्ङ लहौ काम जाट्ख्यौ र लहौ जीबीका क्योट्ख्यौ। 13 टर डाजेभाइको र डै बहीनीको, नाखुरीक चहीँ भलाइ जाट्च कामाङ सेन्र माम्हुङ्की। 14 नाखुरीक मढ्याङ सुयेर कानै इसे चीठीयाङ रीक्च कुरा इडीक मन्डीकी इन्कार जाट्ले डेनाङ, होसे भर्मीकी चीन्डीम डाकी र होसे खाटा हीर सङ्गट माजाट्की, र होसे मेल्हा न काराम सेकी पर्ले। 15 टर होङ्चकोलाक र शत्रु लेखा माजाट्न लहो न विश्वासी डाजेभाइको र डै बहीनीकोलाक लेखा न जाटार चेटावनी यान्ही। अन्तिम अभिवादन 16 अब कानकी शान्ति याछ प्रभु लहे न सधैँ नाखुरीककी पट्ट न कीसीमै शान्ति याख्यौ। नाखुरीक पट्टको खाटा प्रभु ङुख्यौ। 17 ङा पावलै, लहो न मीहुटै इसे अन्टीम अभिवादन रीकार याम्हकामन ले। ङै रीक्च पट्ट न चीठीयाङ याङ्च न सही जाट्च जाट्न ने। ङा इटजाट्न न रीक्ले। 18 कानुङ प्रभु येशू ख्रीष्टौ अनुग्रह नाखुरीक पट्टको खाटा ङुख्यौ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.