२ ठेसलोनीकी 2 - पुर्वीय मगरमुख्य दुष्ट भर्मी 1 ङौ डाजेभाइको र डै बहीनीको, कानुङ प्रभु येशू ख्रीष्ट फेरी राल्हे डेच बारेयाङ अनी होसकोकी डुप्की कान काठोहाङ भेला छान्ले डेच बारेयाङ नाखुरीककी डेले, 2 की कुसेर अगमबानी वा प्रचार वा कुसेर चीठीये प्रभु राम्ह भ्यामने डेम सेटाका डेनाङ, होसे कुरा कान लकीङ राछ औँला डेम आर्मीटार नाखुरीक माआटडीस्की न ट नाखुरीकुङ मीमन न बीचलीट छान्ख्यौ। 3 टर नाखुरीककी सुयेर अनी कुसेर कीसीमै झुक्कडीकी माडीन्ख्यौ। हीजैडेनाङ पहीला परमेश्वरौ विरोधाङ बाड्को विद्रोह माछान्ठर सम्म र नास छान्की पर्च व्यवस्था भङ्ग जाट्च भर्मी मार्हाठर सम्म प्रभुओ डीन मार्हाले। 4 होचे लाहाकी न बाड्को खासार भर्मीकै परमेश्वर डेम आरमीट्च पट्ट न कुराकोलाक र पुजा जाट्च पट्ट न ठोकौ विरोध जाट्ले। होचे याङ्च सम्म जाट्ले की परमेश्वरौ मन्दिराङ पर्यार लहे लाहाकी न परमेश्वर डेले। 5 ही नाखुरीकै माआर्मीट्ने, ङा नाखुरीक खाटा काठोहाङ लेनाङ ङै इसे पट्ट न कुराको च नाखुरीककी डेमन्या, होइन र? 6 होसे दुष्ट भर्मी मेन समय राछ पछी डाङ्ले। चाहाँ न याङ्च कुरा छान्की क्योट्की माय्हाखीयो लागी होसकी रोकडीम डामने। इसे कुरा च नाखुरीककी ठाहा न ले। 7 होसे व्यवस्था भङ्ग जाट्च भर्मीयो शक्तिये अघीलकीङ न काम जाट्न न ले। टर होसकी रोकडीम डाच शक्ति माहटडीस्ठर होच्यौ दुष्ट काम बाहीर माडाङ्ले। 8 होटै होसे व्यवस्था भङ्ग जाट्च भर्मी डाङ्ले। प्रभु येशू रान्हाङ होसकुङ ज्योटीयो शक्तिये होसकुङ मेङ्गेरुङ सासै होसकी नास जाट्ले। 9 होसे दुष्ट भर्मीये शैतानौ शक्ति लार राल्हे र पट्ट खालुङ झुटो चीन्हको र अचम्मौ कामको जाट्ले। 10 होचे नास छान्च जटी पट्टकी होच्यौ दुष्ट काम लकीङ छलीले हीजैडेनाङ होखुरीकै मुक्टी याछ सत्यकी माया जाट्की र होस अनुसार जीवाकी मीमन माजाटा। 11 होटबाटै होखुरीकै झुटो कुराकी न विश्वास जाट्ख्यौ डेयार परमेश्वरै होखुरीक मीटाक काट छल जाट्च शक्ति बीर्न्हकाले। 12 होखुरीकै सत्यकी विश्वास माजाटार अन्याय जाट्कीयाङ न मार्हाङ्छकै सजाय डुप्ख्यौ डेयार न परमेश्वरै याङ्च जाट्च हो। मुक्तियो लागी भाक्चको 13 प्रभुये माया जाट्च डाजेभाइको र डै बहीनीको, नाखुरीकुङ लागी कानै सधैँ धन्यवाद याखी न पर्ले, हीजैडेनाङ सुरुलकीङ न पवित्र आत्मौ पवित्र खास्च काम लकीङ र सत्यतामीटाक विश्वासलकीङ जीवाकी परमेश्वरै नाखुरीककी चुन्डीया। 14 इच्यौ न लागी कानै सेटाक्च सेछ समाचारलकीङ कानुङ प्रभु येशू ख्रीष्टौ महीमा डुप्की डेयार होसकै नाखुरीककी आर्घाच हो। 15 होटबाटै डाजेभाइको र डै बहीनीको, स्थिर छानार ङुनी र कानै डेच अठबा रीक्च सत्य शिक्षाकी मन्डीनी। 16 कानुङ प्रभु येशू ख्रीष्ट र परमेश्वर बोये कानकी माया जाटा र होसकुङ अनुग्रहै सेन्र अन्त्य माछान्च उत्साह र सेछ आशा याहा। 17 होसकै पट्ट न सेछ काम कुराङ साहस र शक्ति नाखुरीककी याख्यो। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.