२ ठेसलोनीकी 1 - पुर्वीय मगर1 कानुङ परमेश्वर बोइ र प्रभु येशू ख्रीष्टौ थेसलोनिकीयाङ लेच मण्डलीयुङ विश्वासी कोलाक कान पावल, सीलास र तिमोथी छानार इसे चीठी रीक्ङनले। 2 नाखुरीककी परमेश्वर बोइ र प्रभु येशू ख्रीष्टै अनुग्रह र शान्ति याख्यौ। ख्रीष्टै जाट्च न्याय 3 डाजेभाइको र डै बहीनीको, नाखुरीकुङ विश्वास वास्टै ल्होङ्ङ न ले। नाखुरीकै जाट्की पर्च माया र नाखुरीकुङ मीघ्याङ झन-झन ल्होङ्ने। कानै परमेश्वरकी नाखुरीकुङ बारेयाङ सधैँ धन्यवाद याखी न पर्ले। 4 होटबाटै नाखुरीकुङ पट्ट न खालुङ सटावट र डुख सहडीकी य्होक्च शक्ति र वीस्वासौ बारेयाङ कान परमेश्वरौ मण्डलीको भीत्री घमण्ड जाटार डेकी य्होक्ले। 5 इसे पट्ट न कुरै नाखुरीककी परमेश्वरौ राज्यौ योग्य ठहरीच परमेश्वरै न्याय जाट्ले डेच साक्षी हो। होटबाटै नाखुरीकै होसे न राज्यौ कारन डुख र भोक्डीम न ले। 6 परमेश्वर चहीँ ही ठीक ले होसे न जाट्च बाटै, होसकै नाखुरीककी डुख याछकोलाक बडला लाले। 7 अनी डुख सहडीच नाखुरीक र कानकी होसकै आराम याल्हे। इसे कुरा होडीक बेला छान्ले, जब प्रभु येशू लहो शक्तिसाली स्वर्गदूतको खाटा स्वर्गलकीङ म्हेओ ज्वालाङ राल्हे। 8 होसको राहार परमेश्वरकी माचीन्डीच कोलाक र कानुङ प्रभु येशूओ सेछ समाचारकी मामन्डीच कोलाक दण्ड याल्हे। 9 होखुरीकुङ सजाय चहीँ होखुरीककी प्रभुओ शक्तिसाली महीमा र सङ्गटी लकीङ न छ्युक्ङ याल्हे, अनी सधैँभरीयो लागी नास जाट्ले। 10 इसे कुरा प्रभु येशू फेरी राछ डीनाङ छान्ले। होसनीक प्रभु येशूये लहौ पवित्र भर्मीको लकीङ आदर र पट्ट न विश्वासीको लकीङ महीमा डुप्ले। नाखुरीक र होखुरीक खाटा काठोहाङ छान्ले, हीजैडेनाङ नाखुरीकै कानुङ साक्षीकी विश्वास जाटा। 11 होटबाटै परमेश्वरै कुसे जीवनौ लागी नाखुरीककी आर्घामे, होच्यौ योग्य खास्की र होसकुङ शक्तिये सेछ जाट्च इच्छा र विश्वासौ काम पुरा जाट्की साहायटा जाट्ख्यौ डेयार कान नाखुरीकुङ लागी सधैँ प्रार्थना जाट्ले। 12 होटजाट्न नाखुरीक लकीङ कानुङ प्रभु येशूओ म्यार्मीनौ आदर छान्ले अनी होसकोलकीङ नाखुरीकुङ र आदर छान्ले हीजैडेनाङ नाखुरीकै कानुङ परमेश्वरलकीङ र प्रभु येशू ख्रीष्ट लकीङ अनुग्रह डुप्मने। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.