२ पट्रुस 1 - पुर्वीय मगर1 येशू ख्रीष्टौ सेबक र प्रेरित ङा सीमोन पत्रुस लकीङ काल्हौ परमेश्वर र येशू ख्रीष्टौ धार्मिकतालकीङ काल्हा खाटा लेच ल्याक्च न बहुमुल्य विश्वास डुप्चकोलाक: 2 परमेश्वर र काल्हौ प्रभु येशूकी चीन्डीचबाटै नाखुरीककी अनुग्रह र शान्ति प्रशस्त खाटा छान्चै नुख्यौ। परमेश्वरै आर्घाच र भाक्च 3 सेछ जीवन जीवाकी चहडीस्च पट्ट न कुरा परमेश्वरौ शक्तिये डुप्मने हीजैडेनाङ लहो महीमा र भलाइ लकीङ आर्घाच परमेश्वरकी कानै चीन्डीमने। 4 इटजाट्न न होसकै प्रतिज्ञा जाट्च महान र बहुमुल्य वरदान कानकी याम्हने। इसे याखीयो कारन चहीँ इसे वरदान लकीङ नाखुरीक इसे संसारुङ भ्रष्ट इच्छाको लकीङ भोग्डीसार परमेश्वरौ स्वभावाङ सहभागी छान्नी डेयार हो। 5 इटबाटै य्होक्ठर नाखुरीकुङ विश्वासाङ भलाइ फाट्नी र भलाइयाङ ज्ञान फाट्नी, 6 ज्ञानाङ सहडीकी य्होक्च शक्ति, सहडीकी य्होक्च शक्तियाङ धैर्य, धैर्याङ भक्टी, 7 भक्टीयाङ विश्वासी डाजेभाइकुङ दया र दयाङ पट्टकी जाट्च प्रेम फाट्नी। 8 नाखुरीककी चहडीस्च कुराको इसे न हो, अनी इसे कुराको प्रशस्त ले डेनाङ नाखुरीकै कानुङ प्रभु येशू ख्रीष्टौ ज्ञानाङ वास्टै मीस्या स्याटाक्च छान्ले। 9 इसे भर्मीको याङ्चको हो की खेरेपुङ कुराको र डाङ्की माय्होक्च अन्ढाको ल्याक्च न हो। होखुरीकै लहो पुरानो पाप लकीङ शुद्ध छान्च कुराको म्य्हाक्ङ भ्याच छान्ले। 10 होटबाटै विश्वासी डाजेभाइको र डै बहीनीको, परमेश्वरै नाखुरीककी आर्घाच र चुन्डीच कुराकी नीस्चीट जाट्कीयो लागी झन जोसीलो छान्नी। हीजैडेनाङ इसे कुराको जाटा डेनाङ, नाखुरीक सेन्र परमेश्वर लकीङ लोस माछान्ले। 11 होटजाट्न न कानुङ प्रभु र मुक्ति याछ येशू ख्रीष्टौ सधैँभरी ङुम-ङुच राज्याङ नाखुरीकै पर्च हक डुप्ले। 12 होटबाटै ङा नाखुरीककी इसे कुराको सधैँ न आर्मीटाक्ले, लेकीयौ लागी च नाखुरीककी इसे पट्ट न कुरा ठाहा ले, अनी नाखुरीकै डुप्च सत्यताङ बलीयो र छान्न ने। 13 ङा इसे शरीराङ जीवाम ङुठर नाखुरीककी इसे कुराको आर्मीटाक्ङ ङुकी ङाकी सेम्ह सेले। 14 हीजैडेनाङ ङा वार्ल्हे, कानुङ प्रभु येशू ख्रीष्टै ङाकी टान्हाक्ङ याम्हने, की ङौ इसे शरीरकी अब डास्च बेला छीट्टो न राम्हन ले। 15 ङा सीम भ्याच न्हुइङ र इसे कुराको आर्मीट्की य्होक्नी डेयार ङा नाखुरीककी सधैँ य्होक्ठर बुझडीच कोसीस जाट्ले। ख्रीष्टौ महीमा डाङ्चको 16 कानुङ प्रभु येशू ख्रीष्ट बाड्को महीमा र शक्तियाङ फेरी राल्हे डेच कुरा कानै नाखुरीककी डन्ट्यकठाकुङ भराङ सेटाक्च होइन। कानै लहो मीमीकै न होसकुङ बाड्को महीमा डाङा। 17 परमेश्वर बोये होसकोकी आडर र महीमा जाट्नाङ अनी “इसे ङौ प्यारो जाक्ङ सेच मीजा हो, इसे खाटा ङा साप्फी मार्हाङ्ने” डेयार बाड्को शक्तिसाली महीमा लकीङ होसकोकी सोर रान्हाङ कान होला लेया। 18 होसे पवित्र डाँडाङ कान होसकोखाटा लेनाङ स्वर्ग लकीङ राछ इसे सोर कानै लहे न सेया। 19 होटबाटै अगमवक्ताकै प्रचार जाट्च बचनाङ कान अझै पक्का छानार भरोसा डाले। नाखुरीकै इसे कुराङ ढ्यान याखी सेम्ह छान्ले, हीजैडेनाङ इचे होसे डीन मार्हाठर र नाखुरीकुङ भीत्री रीदयाङ गोराकुङ टुगा फेरार माचम्कडीस्ठर छुम्ठाङ ढाच बट्टीयो काम जाट्ले। 20 धर्मशास्त्राङ अगमवक्ताकै ङाक्च कुराको होखुरीक लहो न मीमनै माङाक्न्या डेच कुरा चहीँ खास जाट्न नाखुरीकै वार्खी पर्ले। 21 हीजैडेनाङ भर्मीयो इच्छालकीङ कुसेर अगमवाणी माराहा, टर पवित्र आत्मालकीङ अगुवाइ डुपार भर्मीकै परमेश्वरौ टर्फ लकीङ ङाक्च हो। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.