२ युहन्ना 1 - पुर्वीय मगर1 ङा मण्डलीयुङ अगुवै परमेश्वर लकीङ चुन्डीच मास्टो भर्मी र होच्यो मीजाकोलाक, इसे चीठी रीक्ङन ले। ङा नाखुरीककी साँचो रुपाङ प्रेम जाट्ले। ङै मट्टै होइन टर सत्यकी चीन्डीचको पट्टकै नाखुरीककी प्रेम जाट्ले। 2 कान नाखुरीककी प्रेम जाट्ले हीजैडेनाङ सत्य कान भीत्री ले, अनी सत्य सधैँभरीयो लागी कान खाटा न ङुले। 3 परमेश्वर बोइ र होसकुङ मीजा येशू ख्रीष्टै कानकी अनुग्रह, कृपा र शान्ति याख्यौ। पट्ट न सत्यता र प्रेमाङ इसे कानुङ छान्ख्यौ। सत्य र प्रेम 4 नाकुङ मीजाको मढ्याङ कुडीक जनाकी परमेश्वर बोये कानकी याछ आज्ञा अनुसार सत्यताङ व्हाच डुपार ङाकी सार्है मार्हाङ्ङ सेया। 5 ए मास्टो भर्मी, ङै नाकोकी कुसेर नयाँ आज्ञा रीक्च होइन। टर सुरुलकीङ न कान खाटा लेच आज्ञा अनुसार ङा नाकोकी बिन्ती जाट्ले, कान पट्टको काटै काट्की प्रेम जाटीङ। 6 अनी प्रेम जाट्की न परमेश्वरौ आज्ञा मन्डीयार व्हाकी हो। नाखुरीक पट्टकै सेच सुरुलकीयुङ आज्ञा इसे न हो, की नाखुरीक पट्टकै काटै काट्की प्रेम जाट्की पर्ले। 7 “येशू ख्रीष्ट भर्मी छानार शरीराङ राछ होइन” डेयार वास्टै जना झुटो ङाक्चको संसाराङ राम्हने। याङ्च भर्मी न झुटो अनी येशू ख्रीष्टौ विरोधीको हो। 8 होटबाटै होसीयार छान्की, कुसे कुरौ लागी काल्है काम जाट्नन्या, होच्यौ डुप्की पर्च इनाम म्हाटाक्च होइन टर पट्ट न डुप्च छान्नी। 9 ख्रीष्टौ शिक्षाकी डासार बाहीरुङ अरु कुरा पट्टी लक्डीस्च भर्मीखाटा परमेश्वर माङुले। टर होसकुङ शिक्षा माडास्न ङुच खाटा चहीँ बोइ र मीजा नीस न ङुले। 10 होटबाटै ख्रीष्टौ शिक्षा माय्हाम न झुटो ङाक्च भर्मी नाखुरीकुङ सभाङ राहा डेनाङ, होसकी इम भीत्री पर्की र माय्हाखी अनी स्वागट र माजाट्की। 11 हीजैडेनाङ होसकी स्वागट जाट्की न होच्यो दुष्ट कामाङ सहभागी छान्की हो। 12 ङाखाटा नाखुरीककी डेकी पर्च कुराको च धेरै न ले, टर कागज र मसीये होसे कुराको मारीक्ङ नाखुरीककी न डुपार कुरा जाट्की मीमन ले। अनी होडीक बेला काल्हाको काठोहाङ न साप्फी मार्हाङ्ले डेच र ङौ आशा ले। 13 परमेश्वरै चुन्डीच नाकुङ बहीनीयो मीजाकै नाकोकी झोर्ले डेमन ले। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.