१ टीमोठी 6 - पुर्वीय मगर1 नोकरकै लहो मालीककोलाक पट्ट न कुराङ आदर जाट्ख्यौ, र होटजाटा डेनाङ कुचे र परमेश्वरौ म्यार्मीन र कानै याछ शिक्षाकी दोष याखी माय्होक्ले। 2 अनी विश्वासी मालीककोलाक होखुरीकुङ नोकरकै काल्हौ न विश्वासी डाजेभाइको र डै बहीनीको च होनी डेयार ठोरै आदर जाट्च माजाट्ख्यौ। बरु होखुरीकुङ सेवा सेम्हजा जाट्ख्यौ हीजैडेनाङ होखुरीककी फाइडा छान्की डेच लोहो विश्वासी डाजेभाइको र डै बहीनीकोलाक फाइडा छान्की हो। इसे कुराकोवाङ शिक्षा र उत्साह याछ जाटो। झुटो शिक्षा र सत्य धन 3 सुये बेग्लै शिक्षाको पाहाक्ले, र कानुङ प्रभु येशू ख्रीष्टौ सत्य शिक्षा र कानै जाट्की पर्च भक्तियो शिक्षा मामन्डीले डेनाङ, 4 होसे भर्मी हीर माव्हार्न होटन घमण्डये सोक्ले। होचे व्यार्थौ वाद विवाद जाट्ले, काट काट कुराङ झगडा जाट्न ङुले। इसे कुराकै डाहा, झगडा, बडनाम र मासेछ सङ्खाको मट्टै राक्ले। 5 याङ्च भर्मीकै च एकोहोरो खाटा गन गन जाट्न ङुले। होखुरीकुङ बुद्धि बीगारीस्च छान्ले। होखुरीकै सत्य न गुमडीच छान्ले। अनी होखुरीकै परमेश्वरकी भक्ति जाट्की चहीँ धनि छान्च टरीका डेम आर्मीट्ले। 6 टर सन्टोकखाटा परमेश्वरकी जाट्च भक्ति न बाड्को लाभ हो। 7 हीजैडेनाङ कानै इसे संसाराङ न ट हीर लार राहा, न ट इटै नुङ्नाङ हीर आल्हे। 8 टर कानकी ज्याकी र बील्खी ओल्हा डेनाङ च कान होला न सन्टोक जाट्की पर्ले। 9 टर धनि छान्च मीमन जाट्च भर्मीको चहीँ परिक्षाङ फसडीस्ले। होखुरीक मुर्ख र हानी जाट्च इच्छाकुङ पासोवाङ पर्ले। अनी होसे खराब इच्छाकै जाट्नाङ होसकी बीर्हीमसेच नास छान्च ठावाङ टाहाक्ले। 10 हीजैडेनाङ पट्ट खाल्या खराबौ जरा न पैसाकी माया जाट्की हो। कुडीक भर्मीको पैसा कमडीच लोभाङ लक्डीसार विश्वास जाट्की डास्नने, अनी होटबाटै न होखुरीक लहे लाहाकी न डुखवाङ पार्यार होखुरीकुङ मीमन बीक्ङने। तिमोथीयो लागी शिक्षा 11 टर तिमोथी, नाको परमेश्वरौ भर्मी छान्च बाटै, इसे मास्च कुराकोलकीङ लोस ङुनी। अनी नाकै परमेश्वरौ म्याहासाङ ठीक ठहरीस्च कुरा, भक्ति, विश्वास, माया, सहडीकी र नरम छान्च कुराकोवाङ लहो मीमन लैडीकी। 12 र लहो विश्वासौ जीवनाङ बड्डीस्चै नुङ्नाङ सेन्र मासीच जीवनकी घोम ङुनी, हीजैडेनाङ होच्यौ न लागी परमेश्वरै नाकोकी आर्घाच हो। अनी नाकै वास्टै भर्मीकुङ म्याहासाङ लहो विश्वासौ साक्षी र याम्हने। 13 पट्ट ठोककी जीवन याछ परमेश्वरौ र पन्तियस पिलातसौ म्याहासाङ साँचो साक्षी याछ ख्रीष्ट येशूओ अगाडी ङा नाकोकी इसे आज्ञा याम्हन ले, 14 नाकै प्रभु येशू ख्रीष्ट मार्हाठर परमेश्वरौ आज्ञाकी सेम्ह मन्डीकी, टा की नाकोकी सुयेर दोष लैडीकी माडीन्ख्यौ। 15 परमेश्वरै न येशू ख्रीष्टकी ठीक समयाङ फेरी बीर्न्हकाले। हीजैडेनाङ परमेश्वर न पट्ट डेनाङ आसीसीट र काट मट्टै मालीक, राजाकुङ र महाराजा र प्रभुकुङ र महान प्रभु हो। 16 होसको खाटा मट्टै सधैँभरी जीवाम ङुच जीवन ले, र होसको ज्योतियाङ ङुले अनी होला सुर खेरेप नुङ्की माय्होक्ले। होसकोकी चाहाँ सम्म सुयेर माडाङ्ने र डाङ्की र माय्होक्ले। सधैँभरी ङुच शक्ति र आदर होसकोखाटा न ङुख्यौ। आमेन। 17 चाहाँ इसे संसाराङ धनि छान्च भर्मीकोलाक घमन्ड माजाट्की डेनी। हीजैडेनाङ होसे धन सम्पत्ति सधैँभरी माङुले, टर कानुङ सुखौ लागी प्रशस्त खाटा पट्ट ठोक याछ परमेश्वर मीटाक न भरोसा डाकी डेनी। 18 भलाइ जाट्च काम जाट्की, भलाइ छान्च कामाङ धनि छान्की, मीमन फोस्च र अरुकोलाक पुङ्ङ याछ छान्की डेनी। 19 इट जाट्नाङ होखुरीकै पीहीन राछ लहो जीवनाङ काम लग्डीस्च धन सम्पत्ति जगौ रुपाङ जम्मा जाट्ख्यौ, अनी होखुरीकै साँचो जीवन डुप्की य्होक्ले। 20 ए तिमोथी, परमेश्वरै नाकोकी कुसे कुरा जीम्मा याम्हने, होसकी सेम्ह जोगडीम डाकी। कुडीक जना भर्मीकै संसारुङ मुर्ख कुराकी ज्ञान डेयार मन्डीच झुटो कुरा लकीङ र जोगडीस्नी। 21 कुडीक जना भर्मीको इसे कुराङ लक्डीसार लहो विश्वासौ लाम म्य्हाक्ङने। परमेश्वरौ अनुग्रह नाखुरीक पट्टको खाटा ङुख्यौ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.