१ टीमोठी 5 - पुर्वीय मगरविश्वासीकुङ जीम्मेवारी 1 लाहा डेनाङ बुढा भर्मीकोलाक माहक्कारीकी, टर आसकोकी लहो बोइकी लेखा न सम्झडीकी। अनी लाहा डेनाङ मार्जाकोखाटा लहो भाइकोलाक लेखा न जाटार व्यवहार जाट्की। 2 होटजाट्न न बुढी भर्मीकोलाक र लहो मोइकी लेखा न, अनी लाहा डेनाङ मार्जा मास्टो जजाकोखाटा लहो न बहीनीको लेखा न चोखो मीमनै व्यवहार जाट्की। 3 लहो सुर मालेच साँच्ची न बीढवाकुङ खाँचोकोवाङ सेम्ह सहायता जाट्नी। 4 टर इडीक मीजाको अठबा नाटी-नाटीनाको लेच बीढुवाको ले डेनाङ चहीँ होखुरीककी मेन मीजाको अठबा नाटी-नाटीनीकै न अटकोकै। पहीला होखुरीकै लहो परीवारौ वास्टा जाटार परमेश्वरौ सेवा जाट्की पाखी पर्ले। मोइ-बोये जाट्च उपकारौ रीन टेरीख्यौ, हीजैडेनाङ इट जाटा डेनाङ परमेश्वर र मार्हाङले। 5 लहो सुर मालेच बीढुवाकै चहीँ लहो भरोसा परमेश्वराङ मट्टै डाले। अनी नाबीक-नाम्सीन होखुरीकै परमेश्वर खाटा सहायता ङेछै प्रार्थना जाट्न ङुले। 6 टर मोज-मज्जा जाटार ङुच बीढुवा चहीँ जीवनाङ र होच्यो आत्मा चहीँ सीच लेखा न हो। 7 होटबाटै पट्ट न विश्वासीकुङ लागी इसे आज्ञा यान्ही, र होखुरीक दोष बीनुङ छान्ख्यौ। 8 टर सुयेर लहो भर्मीकोलाक र खास जाट्न लहो न परीवारकी माङोस्ले डेनाङ होचे सत्य विश्वासकी इन्कार जाट्ले, र होसे अविश्वासीको डेनाङ र खराब छान्ले। 9 साठी बर्स ओल्छ बीढुवाकुङ म्यार्मीन मट्टै बीढुवा खाटाङ रीक्की। होखुरीकुङ काट जना लेन्जाखाटा मट्टै ब्याहा छान्नन्या। 10 होखुरीकै सेछ काम जाटार म्यार्मीन क्योस्च छान्की पर्ले। लहो मीजाकोलाक सेम्ह होरोक्च, र पाहुनाकोलाक मान जाट्च, परमेश्वरौ पवित्र भर्मीकुङ मीकु हुरार सेवा जाट्च, डुखवाङ पर्चकोलाक सहायटा जाट्च र सेछ कामाङ लहो मीमन लैडीच छान्की पर्ले। 11 टर आर्नाम बीढुवाकुङ म्यार्मीन चहीँ बीढुवा खाटाङ मारीक्की, हीजैडेनाङ होखुरीकै मौका डुप्नाङ फेरी ब्याहा जाट्की मीमन जाट्ले अनी ख्रीष्टौ कामकी डास्न याल्हे। 12 इटजाट्न होखुरीकै प्रभुखाटा पहीला जाट्च बाचा भङ्ग जाट्च बाटै होखुरीक दोसी ठहरीस्ले। 13 इडीक होखुरीकुङ म्यार्मीन बीढुवा खाटाङ रीक्ङने डेनाङ, अरुकुङ इम-इमाङ छेर्हाम व्हाच अल्छी छान्ले। होडीक मट्टै होइन इलकुङ कुरा आलाक र आलकुङ कुरा इलाक सेटाकार भर्मीकोलाक माखाटाक्च, फोकुङ कामाङ मीहुट काच, ङाक्की माछान्च कुराको र ङाक्च छान्ले। 14 होटबाटै ङा आर्नाम बीढुवाकोलाक चहीँ फेरी ब्याहा अट जाटै डेच सल्लाह याल्हे। अनी होखुरीकै मीजाको डीन्ख्यो अनी इमुङ व्यवहारको सय्हारीख्यौ। होटजाटा डेनाङ कानकी शैतानै कानुङ बडनाम जाट्च मौका माडुप्ले। 15 हीजैडेनाङ कुडीक जना आर्नाम बीढुवाको च अघी न ल्हेस्न नुङार शैतानकी डुट्नने। 16 इडीक सुर विश्वासी मास्टो भर्मीकुङ लहो पर्च बीढुवाको ले डेनाङ होचे होखुरीककी सघडीख्यौ। होटजाटा डेनाङ मण्डलीकी भार माछान्ले। होटबाटै सुर मालेच बीढुवाकोलाक मट्टै मण्डलीये ङोस्ख्यौ। 17 मण्डलीकी सेम्ह ङोस्च अगुवाकोलाक डोबर आदर छान्की पर्ले। खास जाटार परमेश्वरौ बचन प्रचार जाट्च र पाहाक्च कामाङ परीसरम जाट्चकै चहीँ इसे डुप्की न पर्ले। 18 हीजैडेनाङ धर्मशास्त्रये डेमने, “ज्याकी लकीङ छेक्डीकी डाइँ जाट्च ठोरौ मेङेराङ मोहोला काम माय्हाखी” र “काम जाट्चकै कामौ ज्याला डुप्की पर्ले।” 19 नीस वा सोम जना साक्षीको माछान्ठर मण्डलीयुङ अगुवाकुङ विरोधाङ लैडीच दोष मासेकी। 20 टर पाप जाट्च अगुवाकोलाक चहीँ पट्टकुङ म्याहासाङ हक्कारीकी, होटजाटा डेनाङ मण्डलीयुङ अरु अगुवाको र बीर्हीले। 21 ङा नाकोकी परमेश्वर, ख्रीष्ट येशूओ म्याहासाङ र पवित्र स्वर्गदूतकुङ म्याहासाङ इसे शिक्षा मन्डीकी आज्ञा याल्हे। हीर पक्षपात माजाट्न इसे नीयमको मन्डीकी। 22 मण्डलीयो काम जीम्मा याखीयो लागी सुर मीटाक मीहुट डाकी हटार माजाट्नी। अरु भर्मीकुङ पापाङ भाग मालानी र लहो जीवन सधैँ शुद्ध डानी। 23 घरी घरी नाकुङ मीटुक बीक्चबाटै डी मट्टै होइन, टर मीटुक बीक्नाङ उसौ लागी चे-चेस्जा अङ्गुरौ मड्य र गाच जाट्नी। 24 कुडीक जना भर्मीकुङ पाप चहीँ पहीला न छ्याङ्गै डाङ्च छान्ले, अनी होखुरीक अघी न दोसी ठहरीस्ले। टर कुडीकौ पाप चहीँ बीस्टारै न्हुइङ मट्टै डाङ्ले। 25 होटजाट्न न कुडीक सेछ कामको चहीँ पहीला न छ्याङ्गै डाङ्च छान्ले। अनी कुसे छ्याङ्गै माडाङ्ले, होसे आर्च्युहार ङुकी र माय्होक्ले। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.