१ टीमोठी 4 - पुर्वीय मगरझुटो कुरा पाहाक्च अगुवाको 1 पवित्र आत्मै बुझडीस्च जाट्न डेमने, पीहीन राछ समयाङ वास्टै भर्मीकै विश्वासकी ट्याक्डीले। अनी होखुरीक बहकडीच आत्माको र भूतकुङ झुटो शिक्षा पट्टी नुङ्ले। 2 याङ्च शिक्षाको चहीँ झुटो ङाक्च र कपटी भर्मीकोलकीङ राल्हे, होखुरीकुङ बीबेक खान्छ फालामै नाप्च ल्याक्च हीर ठाहा माडीन्छ छान्ले। 3 होखुरीकै ब्याहा जाट्की माछान्ले र कुडीक ज्याच कुराको र ज्याकी माछान्ले डेयार पाहाक्ले। टर विश्वास जाट्चको र सत्यकी चीन्डीचकै धन्यवाद याहार होसे ज्याच कुराको ज्याख्यौ डेम न परमेश्वरै होसे ज्याच कुराको खास्च हो। 4 परमेश्वरै खास्च पट्ट न ठोक सेछ ले, र धन्यवाद याहार स्वीकार जाटा डेनाङ कुसे ठोक र इन्कार जाट्की मापर्ले, 5 हीजैडेनाङ होसकी परमेश्वरौ बचन र प्रार्थना चोखो खास्ले। 6 इडीक नाकै इसे कुराको भाइ बहीनीकोलाक बुझडीम याहा डेनाङ, नाको विश्वास र सत्य बचनाङ होर्च र ठीक शिक्षा डुट्च ख्रीष्ट येशूओ सेछ सेवा जाट्च छान्ने। 7 परमेश्वरकी मामन्डीच र अर्थ मालेच दन्त्य कठाको लकीङ जोगोडीस्नी। टर परमेश्वरकी सेवा जाट्च जीवन जीवाकी लाहाकी टालीम यान्ही। 8 हीजैडेनाङ शरीरौ टालीमाङ लक्डीसा डेनाङ च ठोरै कुराङ मट्टै फाइडा छान्ले। टर आत्मौ टालीम जाटा डेनाङ चहीँ वास्टै कुराङ फाइडा छान्ले, होला चहुँङ र न्हुइङ राछ जीवन नीसौ न फाइडौ लागी प्रतिज्ञा ले। 9 इसे विश्वास जाटार मन्डीकी पर्च सत्य कुरा हो। 10 होटबाटै कान सधैँ कडा मीहीनेट जाटार काम जाट्ले, हीजैडेनाङ कानुङ आशा जीउँडो परमेश्वराङ डामने, होसकै पट्ट न भर्मीकोलाक मुक्ति याखी य्होक्ले टर खास जाट्न होसको मीटाक विश्वास जाट्चकोलाक चहीँ हो। 11 इसे न कुराकोलाक जोड याहार नाको र पाहाक्च जाट्नी। 12 रेन्जा ले डेनाङ न नाकोकी सुयेर टुच्छ माआर्मीट्ख्यो। विश्वासीकुङ म्याहासाङ नाकुङ बोली बचन, बानी बेहोरा, प्रेम, विश्वास र शुद्धता चहीँ नाको काट नमुना छान्की य्होक्नी। 13 ङा मार्हाठर सम्म नाकै भर्मीकोलाक धर्मशास्त्र पढेसार सेटाक्की, परचार जाट्की र शिक्षा याखीयाङ ढ्यान यान्ही। 14 नाकै डुप्च वरदानकी हीर काम मालक्डीच माआर्मीट्की, होसे वरदान मण्डलीयुङ अगुवाकै होखुरीकुङ मीहुट नाको मीटाक डार प्रार्थना जाट्नाङ अगमवाणी लकीङ नाकै डुप्च हो। 15 इसे कुराकोवाङ ढ्यान यान्ही र लहो पुरा मीमन लैडीनी, र नाको लहो कामाङ सेम्ह छान्चै नुङ्च पट्टकै डाङ्ख्यौ। 16 नाको कुजाट्न जीवामन ले होच्यो बारेयाङ र लहे याछ शिक्षौ बारेयाङ होसीयार छान्की। ठीक जीवन जीवाचै र शिक्षा याछै नुङ्की। इट जाट्नाङ नाकै लाहाकी अनी नाकुङ शिक्षा सेचकोलाक समेट परमेश्वरै जीवाक्ले। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.