१ टीमोठी 3 - पुर्वीय मगरमण्डलीयुङ गुरुको 1 इसे कुरा सत्य ले, इडीक सुयेर मण्डलीयुङ अगुवा छानार काम जाट्च मीमन जाट्ले डेनाङ होचे सेछ कामौ इच्छा जाट्ले। 2 होटबाटै अगुवा छान्च भर्मी चहीँ सुयेर दोष लैडीकी माय्होक्च, काट मट्टै मास्टो ब्याहा जाट्च छान्की पर्ले। लहे लाहाकी स्थिर जाट्की य्होक्च, लहे लाहाकी न अढीनाङ डाकी य्होक्च, होसे अरुलकीङ सम्मान डुप्च, पाहुनाकी मान जाट्च र सेम्ह शिक्षा पाहाक्की य्होक्च छान्की पर्ले। 3 हान रक्सी गार म्होर्च र झगडीया छान्की माछान्ले। टर होसे सहडीकी य्होक्च र नम्र, वाद विवाद माजाट्च, पैसौ लोभ माजाट्च छान्की पर्ले। 4 होचे लहो इमुङ व्यवहार सेम्ह क्योट्की य्होक्च, र लहो मीजाकोलाक सेम्ह आदर जाट्की पाहाक्च छान्की पर्ले। 5 इडीक लहो इमुङ व्यवहार र सेम्ह क्योट्की माय्होक्च भर्मीये परमेश्वरौ मण्डली कुटजाट्न क्योट्की य्होक्ले र? 6 होसे चाम-चाम विश्वास जाट्च नयाँ भर्मी र छान्की माछान्ले, नभा च होसे घमन्डै सोक्ले र शैतानै डुप्च दण्ड होचे र डुप्ले। 7 होटबाटै होसे भर्मी मण्डली भीत्री मट्टै होइन, बाहीरुङ अरु भर्मीकुङ म्याहासाङ र असल ठहरीस्च छान्की पर्ले। होसकी नभा च भर्मीकै निन्दा जाट्ले र होसे शैतानौ पासोवाङ पर्ले। मण्डलीयाङ सेवा जाट्चको 8 होटजाट्न न मण्डलीयाङ सेवा जाट्च डीकनको र आदर जाट्की योग्यौ छान्की पर्ले, अनी सत्य कुरा ङाक्च, धेरै हान रक्सी मागाच र दुष्ट टरीकै पैसा कमडीच लोभी छान्की माछान्ने। 9 होखुरीकै परमेश्वरलकीङ डुप्च लहो विश्वासकी चोखो बीबेकै जोगडीम डाकी य्होक्च छान्की पर्ले। 10 पहीला होखुरीककी जाँच्डीकी पर्ले, इडीक होखुरीक दोष मालेच ठहरीसा डेनाङ मट्टै होखुरीकै डीकन छानार सेवा जाट्की डुप्ले। 11 इटजाट्न न डीकनकुङ मास्टोको र बडनाम माछान्च, अरुकुङ निन्दा माजाट्च, टर लाहाकी अढीनाङ डार पट्ट कुराकोवाङ विश्वासी छानार आदर डुप्की ज्योस्च छान्की पर्ले। 12 मन्डीलीयाङ सेवा जाट्च डीकनौ र काट मट्टै मास्टो छान्की पर्ले। होचे लहो मीजाको र इमुङ व्यवहार सेम्ह खाटाकार क्योट्की य्होक्च छान्की पर्ले। 13 हीजैडेनाङ डीकनै जाट्की पर्च सेवा सुये सेम्ह जाट्ले होखुरीकै लोहो लागी पट्ट डेनाङ बाड्को इजट डुप्ले र ख्रीष्ट येशूवाङ लेच लहो विश्वासौ बारेयाङ अरुकोलाक साहासखाटा सेटाक्की य्होक्ले। बाड्को रहस्यौ कुरा 14 ङा नाको लेठाङ छीटो न राछ आशा डानाङ र चाहाँ इसे चीठी नाकोकी रीक्ङन ले। 15 इडीक ङा नाकोलेठाङ राखी ढीलो छाना डेनाङ र परमेश्वरौ परीवाराङ भर्मीकै कुङ्च व्यवहार जाट्की पर्च हो, होसे कुराको इसे चीठी लकीङ न वार्न्ह डानी। परमेश्वरौ परीवार चहीँ जीउँडो परमेश्वरौ मण्डली हो। इसे परमेश्वरौ मण्डली, सत्यौ जग र बलीयो खाँबा हो। 16 कान इसे कुरा स्वीकार जाट्ले, कानुङ विश्वासौ रहस्य कुडीक बाड्को ले: ख्रीष्ट भर्मीयो शरीरङ राहा, पवित्र आत्मै होसकोकी धर्मी टान्हाका, होसकोकी स्वर्गदूतकै डाङा, जात जातियुङ भर्मीकुङ मीघ्याङ होसकुङ सेछ-समचार फैलडीसा, संसारुङ वास्टै भर्मीकै होसकोकी विश्वास जाटा, होसको स्वर्गाङ गाराङ्ङ आल्हा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.