१ ठेसलोनीकी 5 - पुर्वीय मगरप्रभुओ लाम ङोस्न ङुनी 1 ङौ डाजेभाइको र डै बहीनीको, इसे कुराको सेन र कुडीक बेला छान्ले डेयार नाखुरीककी रीक्ङ ङुकी मापर्ले। 2 हीजैडेनाङ नाबीक माआर्मीट्च बेलाङ खुस रान्हाङ लेखा न प्रभु राछ डीनाङ र होटजाट्न न राल्हे। इसे कुरा नाखुरीककी पुरै ठाहा ले। 3 भर्मीकै पट्ट पट्टी न शान्ति र सुरक्षा ले डेम ङुच छान्ले। होडीक न बेला मोसोमायाङ मास्टो भर्मीकी मीजा डीन्छ व्यथा लग्डीस्नाङ लेखा न आपत आइपर्ले र होखुरीक सुर भीस्की माढीन्ले। 4 टर ङौ डाजेभाइको र डै बहीनीको, नाखुरीक छुम्ठाङ माले। होटबाटै प्रभु राछ डीनाङ खुस मोसोमायाङ रान्हाङ लेखा न रान्हाङ नाखुरीकै चहीँ अचम्म मन्डीकी मापर्ले। 5 हीजैडेनाङ नाखुरीक पट्ट न ज्योतियो सन्टान र डीन हो। कान नाबीक र छुम्छौ सन्टान होइन। 6 होटबाटै अरुको लेखा कान मामीसीङ, टर झेर्न ङुइङ, र आत्माङ स्थिर छानीङ। 7 हीजैडेनाङ मीस्च भर्मीको नाबीक मीस्ले, र म्होर्चको र नाबीक न म्होर्ले। 8 टर कान चहीँ डीनुङ सन्टान लेचबाटै सधैँ आत्माङ स्थिर ङुइङ। कानै विश्वास र प्रेमौ छाटीयो पाटा, अनी मुक्तियो आशौ टोप पुहीङ। 9 हीजैडेनाङ परमेश्वरै कान मीटाक मीरीस व्हाक्की डेम भाक्च होइन, टर प्रभु येशू ख्रीष्ट लकीङ मुक्ति याखी डेम भाक्च हो। 10 होसको कानुङ सट्ठाङ सीया, होटबाटै कान सीनाङ र जीवाम ङुनाङ र होसको रान्हाङ कान चहीँ होसको खाटा न जीवाकी य्होक्ले। 11 इटबाटै चाहाँ जाट्नाङ लेखा न नाखुरीकै काटै काट्की उत्साह यान्ही र बलीयो पार्च काम जाट्नी। पावलै विश्वासीकोलाक याछ सल्लाह 12 ङौ डाजेभाइको र डै बहीनीको, कान नाखुरीककी बिन्ती जाट्ले, नाखुरीकुङ मीघ्याङ मीमन लैडीयार प्रभुओ काम जाट्च र नाखुरीककी चेटावनी याछ अगुवाकोलाक आदर जाट्नी। 13 होखुरीकै जाट्च कामौ लागी माया जाटार होखुरीककी बाड्को आदर जाट्नी र नाखुरीक पट्टको लाहा लहाङ खाटार ङुनी। 14 डाजेभाइको र डै बहीनीको, कान नाखुरीककी बिन्ती जाट्ले अल्छीकोलाक काम जाट्की डेयार चेटावनी यान्ही। बीर्हीचकोलाक उत्साह यान्ही। कमजोरकोलाक सहायता जाट्नी र पट्टको खाटा सहनसील छानार ङुनी। 15 नाखुरीकुङ मीघ्याङ सुयेर खराबी जाटा डेनाङ होच्यो बडला खराबी माजाट्नी, टर काटै काट्की र पट्ट भर्मीकोलाक भलाइ जाट्च मीमन जाट्नी। 16 सधैँ न मार्हाङार ङुनी। 17 सधैँभरी प्रार्थना जाट्न ङुनी। 18 पट्ट न परिस्थितियाङ धन्यवाद यान्ही, हीजैडेनाङ ख्रीष्ट येशूआङ नाखुरीकुङ लागी परमेश्वरै मीमन जाट्च इसे न हो। 19 पवित्र आत्माकी काम जाट्की मारोकडीनी। 20 परमेश्वर लकीङ राछ बचनकी हेला माजाट्नी। 21 टर पट्ट न कुराकी जाँच्डीनी र कुसे कुरा सेछ ले होसकी बलीयो खाटा घोम डानी। 22 पट्ट खालुङ मासेछ दुष्ट कुराको लकीङ लोस ङुनी। 23 शान्तियो परमेश्वर लहे न नाखुरीककी पवित्र डाख्यौ। कानुङ प्रभु येशू ख्रीष्ट फेरी रान्हाङ नाखुरीकुङ आत्मा, प्राण र शरीर निर्दोष छान्ख्यौ। 24 नाखुरीककी आर्घाच परमेश्वर विश्वास योग्य लेचबाटै होसकै इसे पट्ट न कुरा जाट्न याल्हे। 25 ङौ डाजेभाइको र डै बहीनीको, कानुङ लागी र प्रार्थना जाट्न यान्ही। 26 होला लेच विश्वासी ङौ डाजेभाइको र डै बहीनीकोलाक प्रेमखाटा झोर्नी। 27 पट्ट न डाजेभाइको र डै बहीनीकुङ म्याहासाङ इसे चीठी परेसार सेटाक्ङ यान्ही डेम ङा प्रभुओ म्यार्मीनाङ बिन्ती जाट्ले। 28 कानुङ प्रभु येशू ख्रीष्टओ अनुग्रह नाखुरीक खाटा ङुम ङुख्यौ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.