१ ठेसलोनीकी 4 - पुर्वीय मगरपरमेश्वरकी जाक्ङ सेच जीवन 1 अन्टीमाङ ङौ डाजेभाइको र डै बहीनीको, नाखुरीकै परमेश्वरकी जाक्ङ सेच जीवन कुटजाट्न जीवाकी पर्ले डेच कुरा कान लकीङ पाम्ह य्होक्ने। होटबाटै होट न जाट्न न र ले। अब कान नाखुरीककी प्रभु येशूओ म्यार्मीनाङ बिन्ती जाट्ले की नाखुरीकुङ बानी ब्यहोराको झन सेछ छान्चै नुङ्ख्यो। 2 हीजैडेनाङ कानै नाखुरीककी प्रभु येशू लकीङ डुप्च कुसे-कुसे आज्ञाको याम्हने, होसे नाखुरीककी ठाहा ले। 3 नाखुरीक पवित्र छान्नी डेच परमेश्वरौ इच्छा हो, होटबाटै नाखुरीक व्यभिचार लकीङ लोस ङुनी। 4 पवित्र र आदर खाटा लहो मास्टो खाटा ङुकी, होसे चहीँ नाखुरीक काट-काट जनै वार्खी, 5 नाखुरीक पट्टये परमेश्वरकी माचीन्डीच अरु भर्मीकै लेखा व्यभिचार जाट्च मास्च बीचार लाकी माछान्ले टर पवित्र छानार लहौ मास्टो खाटा जीवन बीटडीकी वार्खी पर्ले। 6 इसे बारेयाङ सुयेर विश्वासी डाजेभाइकुङ मास्टोको खाटा व्यभिचार जाट्की माछान्ने। याङ्च पाप जाट्चकोलाक प्रभुये बाड्को दण्ड याल्हे डेयार पहीला न कानै नाखुरीककी इसे विषयाङ कडा चेटावनी याम्हने। 7 हीजैडेनाङ परमेश्वरै कानकी अपवित्र जीवन जीवाकी आर्घाच होइन, टर पवित्र जीवन जीवाकी डेम आर्घाच हो। 8 होटबाटै इसे शिक्षाकी मामन्डीचये भर्मीकी होइन, परमेश्वरौ आज्ञा माटेरीच हो, होसे न परमेश्वरै नाखुरीककी लहो पवित्र आत्मा याम्हने। 9 टर विश्वासी डाजेभाइ कोलाक माया जाट्की पर्ले डेच कुरा च नाखुरीककी रीक्ङ ङुकी मापर्ले। परमेश्वर लहे न नाखुरीककी लाहा-लाहाङ माया जाट्की पर्ले डेयार पाहाक्ङन्या। 10 नाखुरीकै माकेडोनीयाङ लेच पट्ट न विश्वासी डाजेभाइको र डै बहीनीकोलाक माया जाट्नने। अझै झन वास्टै माया जाट्चै नुङ्नी डेम कान नाखुरीककी हौसला याल्हे। 11 कानै नाखुरीककी डेनाङ लेखा न शान्तियो जीवन जीवाच जाट्नी। लहो कामाङ मीमन लैडीनी र लहो न मीहुटै काम जाट्च जाट्नी। 12 होट छान्नाङ नाखुरीककी अरु विश्वास माजाट्च भर्मीकै र नाखुरीककी आदर जाट्ले, र नाखुरीककी खाँचो पर्नाङ अरुखाटा भर पर्की र मापर्ले। प्रभु फेरी राल्हे 13 ङौ डाजेभाइको र डै बहीनीको, सीम भ्याच विश्वासीकुङ बारेयाङ कान नाखुरीककी डेले, टा की अरु आशा मालेच भर्मीकै लेखा नाखुरीकै होखुरीकुङ लागी शोक माजाट्नी। 14 हीजैडेनाङ येशू सीयार जीवाम सोमने डेच कुराङ कान विश्वास जाट्ले। होटजाट्न न येशूवाङ विश्वास जाटार सीचकोलाक परमेश्वरै होखुरीककी सीच लकीङ जीवाटाक्ले टा की होखुरीक येशू खाटा छान्ख्यो। 15 प्रभुओ बचन लकीङ कान नाखुरीककी इसे कुरा डेले। प्रभु राछ डीनसम्म कान जीवाम ङुचकै होसे सीम भ्याचकोलाक कुसे कीसीमै र रीट्की माय्होक्ले। 16 हीजैडेनाङ होसनीक प्रभु सोयम मेखोला न आग्यौ बाड्को सोर खाटा, प्रधान स्वर्गदूतौ सोर र परमेश्वरौ टुरही म्हुट्च बेलाङ प्रभु स्वर्ग लकीङ राल्हे र होडीक न बेला ख्रीष्टकी विश्वास जाटार सीचको पट्ट डेनाङ पहीला जीवाम सोले। 17 टब कान जीवाचको होखुरीक खाटा न प्रभुकी डेबुवाङ डुप्की सर्घाङ गाराङ्ङ आल्हे, अनी सधैँभरी कान प्रभुखाटा न ङुले। 18 होटबाटै इसे बचनको लकीङ काटै काट्की उत्साह यान्ही। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.