१ ठेसलोनीकी 3 - पुर्वीय मगरतिमोथीकी थेसलोनिकीयाङ बीर्न्हकाच 1 होटबाटै नाखुरीक खाटा भार ङुकी माय्होक्चबाटै कानै एथेन्स सहराङ तिमोथीबीना न ङुकी मीमन जाटा। 2 अनी ख्रीष्टौ सेछ समाचार कान खाटा न प्रचार जाट्च कानुङ भाइ तिमोथी परमेश्वरौ सेवक हो। नाखुरीककी हौसला याहार विश्वासाङ बलीयो खास्की डेम होसकी नाखुरीक लेठाङ बीर्न्हकामने। 3 होटबाटै होडीक बेलुङ कष्टकै जाट्नाङ सुयेर ख्रीष्टकी माडास्ख्यो डेच कानुङ इच्छा लेया। नाखुरीक लाहाकी न ठाहा ले, की इच्यौ लागी न कानकी बीर्न्हकाच हो। 4 हीजैडेनाङ कानै नाखुरीकखाटा लेच बेलाङ अघीलकीङ न याङ्च कष्टको राल्हे। साँच्ची न होङ्च न छानार इसे कुरा नाखुरीककी ठाहा ले। 5 होटबाटै ङै अझै सहडीकी माय्होकार न नाखुरीकुङ विश्वास वार्खी डेम तिमोथीकी बीर्न्हका। नाखुरीककी शैतानै परिक्षाङ पार्या डेनाङ कानै जाट्च काम व्यर्थ छान्ने डेम ङाकी बीर्हीम सेमन्या। 6 टर तिमोथी चाम-चाम नाखुरीककी डुपार कान लेठाङ टार्हा र नाखुरीकुङ विश्वास र मायौ सेछ समाचार कानकी सेटाका। नाखुरीकै कानकी डुप्की साप्फी इच्छा जाटार सधैँ माया खाटा कानकी आर्मीट्ले डेच होचे खबर सेटाका। कानै र नाखुरीककी डुप्च होडीक न इच्छा जाट्नने। 7 होटबाटै ङौ डाजेभाइको र डै बहीनीको, नाखुरीकुङ बलीयो विश्वासौ खबर सेयार कानुङ पट्ट न डुख र नीरासौ बेलाङ र कानकी खुसी सेमने। 8 हीजैडेनाङ नाखुरीकै प्रभुवाङ बलीयो विश्वास जाट्नने डेच सेनाङ कानकी साँच्ची न सास रान्हाङ लेखा न छाना। 9 नाखुरीकुङ कारनै परमेश्वरौ म्याहासाङ कान आनन्द मन्डीले। होच्यौ लागी कानै परमेश्वरकी कुडीक धन्यवाद यान्हाङ र माओल्ल्हे। 10 नाखुरीककी फेरी डुप्की डेयार कान नाबीक नाम्सीन परमेश्वरखाटा प्रार्थना जाट्न ङुमने। डुपार नाखुरीकुङ विश्वासाङ ही-ही कुरा कमी ले, होसे पुरा जाट्न याखी य्होक्च लेया। 11 अब कानुङ परमेश्वर बोइ मेखोलै र प्रभु येशूये नाखुरीक लेठाङ राखी कानुङ लागी लाम खोलीम याख्यौ। 12 कानै नाखुरीककी माया जाट्नाङ लेखा न प्रभुये नाखुरीकुङ मीघ्याङ र काटै काट्की र पट्ट न भर्मीको खाटा झन-झन माया जाट्चै नुङ्ख्यौ। 13 कानुङ प्रभु येशू लहो पवित्र भर्मीको खाटा रान्हाङ कानुङ परमेश्वर बोयो म्याहासाङ नाखुरीकुङ रीदयकी पवित्र र निर्दोष खासार बलीयो खास्न याख्यौ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.