१ ठेसलोनीकी 2 - पुर्वीय मगरथेसलोनीकीयाङ पावलौ काम 1 ङौ डाजेभाइको र डै बहीनीको, नाखुरीक खाटा कानै बीटडीच समय होटो न खेर मानुङा डेच च नाखुरीककी ठाहान ले। 2 होला राखी डेनाङ अगाडी लकीङ न फीलीप्पी सहरुङ भर्मीकै कानकी डुख याहा र बेइजट जाटा डेच कुरा र नाखुरीककी ठाहा न ले। टर वास्टै विरोधीको लेनाङ र परमेश्वरै कानकी साहस याछ बाटै नाखुरीककी कानै परमेश्वरौ सेछ समाचार सेटाक्की य्होका। 3 कानै पाहाक्च शिक्षाङ झुटो कुरा, मासेछ बीचारको अठबा कुसेर छलकपट माले। 4 परमेश्वरै कानकी विश्वासयोग्य ठान्डीच बाटै न सेछ समाचार सेटाक्कीयो लागी जीम्मा याहा। होटबाटै भर्मीकोलाक खुसी पार्की होइन, टर कानुङ मीमन जाँच्डीच परमेश्वरकी खुसी पार्की कान प्रचार जाट्ले। 5 नाखुरीककी र सेम्हजा ठाहा ले, नाखुरीक खाटा कानै सेन्र आर्भेट्च कुरा माजाटा, कानै नाखुरीक लकीङ फाइडा लाकीयो लागी हीर लोभ माजाटा। इसे कुरौ साक्षी परमेश्वर न ले। 6 कानै नाखुरीक लकीङ अठबा अरु सुर भर्मी लकीङ प्रशंसा मापा। कान ख्रीष्टौ प्रेरित छान्च हैसीयटै नाखुरीक मीटाक अधिकार जाट्की य्होक्च लेया। 7 टर लहो मीजाकोलाक दुध कास्च काट मोइ लेखा न नाखुरीकुङ मीघ्याङ कान नम्र छाना। 8 साँच्ची न नाखुरीककी कानै माया जाट्नने। नाखुरीकुङ इडीक वास्टै माया लक्डीस्ले की परमेश्वरौ सेछ समाचार सेटाक्की मट्टै होइन, कानुङ जीवन न याखी समेट टयार छानन्या। 9 ङौ डाजेभाइको र डै बहीनीको, कानै जाट्च मेहनत नाखुरीकै आर्मीट्नने। कानै नाखुरीक सुकीर भार मापर्ख्यौ डेम नाबीक नाम्सीन काम जाट्न नाखुरीककी परमेश्वरौ सेछ समाचार सेटाका। 10 नाखुरीक विश्वासी खाटा कान ङुनाङ पवित्र, ठीक र निर्दोष छानार ङुवा। इच्यो साक्षी परमेश्वर र नाखुरीक ले। 11 हीजैडेनाङ नाखुरीककी ठाहा ले, बोये लहो मीजाकोलाक जाट्नाङ लेखा न नाखुरीक खाटा कानै ब्यबहार जाटा। 12 नाखुरीकुङ चालचलन परमेश्वरकी जाक्ङ सेच छान्ख्यौ डेयार कानै उत्साह याल्हे र अर्ती याल्हे र पाहाक्ले। हीजैडेनाङ नाखुरीककी होसकुङ लहौ राज्य र महीमाङ आर्घाले। 13 कानै नाखुरीककी परमेश्वरौ शिक्षा पाहाक्नाङ भर्मीयो शिक्षाकी लेखा होइन, साँच्ची न परमेश्वरौ न शिक्षा हो डेम नाखुरीकै ला र इसे परमेश्वरौ शिक्षा न लेया। इटबाटै कान परमेश्वरकी धन्यवाद याल्हे। इसे शिक्षाये चाहाँ र नाखुरीक विश्वासीकुङ मीघ्याङ काम जाट्न न ङुमने। 14 ङौ डाजेभाइको र डै बहीनीको, नाखुरीक र ख्रीष्ट येशूकी विश्वास जाट्च यहूदियाङ लेच परमेश्वरौ मण्डलीको लेखा न छान्नने। हीजैडेनाङ यहूदीयुङ मण्डलीकै यहूदीको लकीङ न डुख भोग्डीया र होटजाट्न न नाखुरीकै र लहो न जाटीको लकीङ डुख भोग्डीया। 15 होसे यहूदीकै प्रभु येशूकी र अगमवक्ताकोलाक र साटा र कानकी र खेट्डीमका। होखुरीकै परमेश्वरकी जाक्ङ मासेच काम जाटा र पट्ट भर्मीकुङ विरोधी छाना। 16 होखुरीकै कानकी मुक्तियो सेछ समाचार अन्यजातिकोलाक सेटाक्की माय्हा। इटजाट्न होखुरीकै पापौ ठुप्रो खास्चै नुङा। अन्टीमाङ परमेश्वरौ मीरीस होखुरीक मीटाक पर्या। थेसलोनिकीकोलाक फेरी डुप्की पावलौ बाड्को इच्छा 17 ङौ डाजेभाइको र डै बहीनीको, नाखुरीक खाटा भार काटछीन डाङ्की माढीन्नाङ र मीमन-बीचाराङ चहीँ माभामन्या। कानै नाखुरीककी फेरी डुप्च बाड्को इच्छा जाट्नन्या। 18 कान नाखुरीक लेठाङ राखी पा। ङा पावल च झन कुडीक खेप राखी पा टर शैतानै कानकी राखी न माय्हा। 19 काल्हौ प्रभु येशू रान्हाङ होसकुङ म्याहासाङ आशा, आनन्द र गर्वौ मुकुट ही डेनाङ र नाखुरीक न हो, होइन र? 20 साँच्ची न नाखुरीक न कानुङ महीमा र खुसी हो। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.