१ पट्रुस 4 - पुर्वीय मगरबडलीस्च जीवन 1 कुटजाट्न ख्रीष्टै शरीराङ डुख भोग्डीया, होटजाट्न न नाखुरीक र होङ्च न कीसीमुङ बीचार लार बलीयो छान्नी, हीजैडेनाङ सुये शरीराङ डुख भोग्डीमे, होचे पाप जाट्की डास्ले। 2 होटबाटै होचे बाँकी लेच लहौ जीवन फेरी भर्मीयो इच्छाङ होइन, टर परमेश्वरौ इच्छाङ बीटडीले। 3 हीजैडेनाङ अगाडीयुङ समयाङ नाखुरीक परमेश्वरकी माचीन्डीच भर्मीकै जाट्च ल्याक्च न चालचलनाङ व्हामन्या। नाखुरीक मास्च इच्छा जाट्च, शरीरौ अभीलासा जाट्च, हान रक्सी गाच, भोजाङ वास्टै हान रक्सी गार म्होर्च र झीर्न सेच मूर्तिको पुजा जाट्नन्या। 4 अब नाखुरीकै होङ्च दुष्ट कुराको माजाट्ले र परमेश्वरकी माचीन्डीचकै होङ्च डाङार छक्क पर्नने। होटबाटै होखुरीकै नाखुरीककी बेइज्जट जाट्ले। 5 टर होसे भर्मीकै जीवाच र सीचकुङ न्याय जाट्की टयार छान्च परमेश्वरौ म्याहासाङ बयान याखी पर्ले। 6 होटबाटै च सीम भ्याच कोलाक समेट सेछ समाचार सेटाक्च हो। इसे जीवनाङ अरु जीवाच भर्मीकुङ लेखा न होखुरीकुङ र न्याय छान्ख्यो र होखुरीक र परमेश्वर लेखा न आत्माङ जीवाकी य्होक्ख्यौ डेयार सीच न्हुइङ र होखुरीककी सेछ समाचार सेटाक्च हो। 7 पट्ट न कुराकुङ अन्ट्य खेरेप राम्हने। होटबाटै नाखुरीकै प्रार्थना जाट्की य्होक्ले अनी लहे लहाकी अधिनाङ डार होसीयार छान्की पर्ले। 8 पट्ट डेनाङ वास्टै काटै काटकी साँचो प्रेम जाट्नी, हीजैडेनाङ प्रेमै न हील्की माय्होक्च पापको हुप्ले। 9 काटै काट्की लहौ इमाङ गन-गन माजाट्न सेछ मीमनै आर्घानी। 10 परमेश्वरखाटा खाल खालुङ आत्मीकी वरदानको ले होसे आत्मीकी वरदानको भर्मीकोलाक याम्हने। होसे लहे डुप्च आत्मीकी वरदानको अरुकुङ भलाइयो लागी क्योट्नी। 11 ङाक्च वरदान डुप्चये परमेश्वरौ बचन ङाक्ख्यौ, सेवा जाट्चये परमेश्वरौ शक्तिये सेवा जाट्ख्यौ। इटजाट्न येशू ख्रीष्ट लकीङ पट्ट न कुराकोवाङ परमेश्वरकी न महीमा छान्ख्यौ। सधैँभरी होसकुङ न महीमा र शक्ति छान्न ङुख्यौ! आमेन। डुखाङ आनन्द 12 ङौ विश्वासी डाजेभाइको र डै बहीनीको, डुख कष्टलकीङ नाखुरीकुङ जाँच छान्नने, टर इसे सेन्र माछान्च कुरा छाना डेयार नाखुरीक अचम्म मामन्डीनी। 13 टर ख्रीष्टौ डुखाङ सहभागी छान्की डीन्हने डेयार आनन्द मन्डीनी हीजैडेनाङ होसकुङ बाड्को महीमा डाङ्नाङ नाखुरीक आनन्द खाटा मार्हाङ्की य्होक्नी। 14 इडीक ख्रीष्ट मीटाक विश्वास जाट्नाङ नाखुरीकुङ बेइज्जट छान्ले डेनाङ लाहाकी आसीस डुप्च आर्मीट्नी, हीजैडेनाङ परमेश्वरौ महीमीत आत्मा नाखुरीकखाटा बास ङुमने। 15 टर नाखुरीक मढ्याङ सुयेर डुख डीन्हा डेनाङ भर्मी साट्च, खुस, अपराधी वा फोकुङ कामाङ मीहुट काचये लेखा चहीँ डुख माडीन्ख्यौ। 16 टर पनी ख्रीष्टकी विश्वास जाट्च बाटै डुख भोग्डीकी पर्नाङ माकाराख्यौ। टर ख्रीष्टौ म्यार्मीन लाकी डीन्न्हने डेयार परमेश्वरकी धन्यवाद याख्यौ। 17 हीजैडेनाङ न्याय च परमेश्वरौ लहौ न भर्मीकोलकीङ सुरु छान्च बेला राम्हने, र इडीक काल्हौ र न्याय जाट्ले डेनाङ परमेश्वरौ सेछ समाचारकी विश्वास माजाट्च भर्मीकुङ झन् कोङ्च न्याय छान्ने औँला? 18 धर्मशास्त्राङ डेमने, “इडीक धर्मी भर्मीकोलाक जीवाटाक्की च मुस्कील छान्ले डेनाङ परमेश्वरकी न विश्वास माजाट्च पापी भर्मीकुङ हालट च झन ही छान्ले औँला?” 19 होटबाटै परमेश्वरौ इच्छा अनुसार डुख भोग्डीचकै सेछ काम जाट्की माडास्न होखुरीकै लाहाकी सृष्टि जाट्च परमेश्वर मीटाक भरोसा डाकी पर्ले। होसकै लहो प्रतिज्ञा सधैँ पुरा जाट्ले। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.