१ पट्रुस 3 - पुर्वीय मगरब्याहा जाट्च लहो लेन्जा-मास्टोको 1 ब्याहा जाट्च मास्टोको, नाखुरीक लहौ लेन्जाकुङ अधिनाङ ङुनी। र इटजाट्न होखुरीकै परमेश्वरौ बचन पालना माजाट्नाङ र लहौ मास्टोकुङ सेछ चालचलनै जाट्नाङ होखुरीकुङ मीमनौ परिवर्तन छान्की य्होक्ले, र होखुरीकै परमेश्वरकी विश्वास जाट्ले। नाखुरीकै डेकी न मापर्ले, 2 हीजैडेनाङ नाखुरीकुङ चालचलन कुडीक शुद्ध र आदर योग्यौ ले डेच कुरा मेखुरीक लेन्जाकै न वार्ल्हे। 3 नाखुरीकै मीछामौ सीङ्गार, सुनौ गहना र महङ्गो बढीनको बील्हार बाहीरी रुपाङ मासीङ्गारीस्नी। 4 टर नाखुरीकुङ भीत्री मीमन सेछ छान्की पर्ले, होसे सेन्र नास छानार मानुङ्च नम्र र सान्ट आत्मा चहीँ सेछ छान्की पर्ले र इसे चहीँ परमेश्वरौ म्याहासाङ महङ्गो ले। 5 खायाक परमेश्वराङ आशा डाच पवित्र मास्टो भर्मीको सीङ्गारीस्नाङ र लहो लेन्जौ अधिनाङ ङुमन्या। 6 सारा र होङ्च न लेया। होचे लहौ लेन्जा अब्राहामै डेच मन्डीमन्या, होसकी “ङौ मालीक” डेमन्या। कुसे कुराङ र माबीर्हीम सेछ जाटा डेनाङ नाखुरीक र सारौ न मास्टो मीजाको हो। 7 लेन्जाको, होटजाट्न न नाखुरीकै र लहौ मास्टोकोलाक आदर जाट्की पर्ले। नाखुरीकै इसे कुरा माम्य्हाक्की, की नाखुरीकुङ मास्टोको नाखुरीक डेनाङ कमजोर ले, टर होखुरीक खाटा सेछ ब्यबहार जाट्नी, हीजैडेनाङ होखुरीकै र नाखुरीक खाट-खाट न सेन्र मासीच जीवनौ उपहार डुप्ले। याङ्च जाट्नी होटबाटै नाखुरीकुङ प्रार्थनाङ बाढा माराल्हे। सेछ काम जाट्नाङ भोग्डीच डुख 8 ङा अन्टीमाङ डेले, नाखुरीक पट्टको काट न मीमनुङ र काटै काटौ मर्म बुझडीस्च छान्की पर्ले। डाजेभाइको र डै बहीनीकोलाक लेखा न काटै काटकी माया जाट्नी र काटै काटकी दया टान्हाक्नी र नम्र छान्नी। 9 सुयेर मासेछ जाटाडेनाङ होसकी नाखुरीकै बडला मालानी, सरापडीया डेनाङ र मासरापडीनी। टर होच्यौ सट्टा आसीस यान्ही हीजैडेनाङ इच्यौ लागी न नाखुरीककी परमेश्वरै आर्घाच हो, की नाखुरीकै आसीस डुप्की य्होक्नी। 10 धर्मशास्त्रये डेले, “सुये जीवनकी माया जाट्ले, र सेछ डीनको डाङ्च मीमन जाट्ले, होचे लहो मेलेटकी मास्च कुराको ङाक्की र मेङेरकी ढाट्डीकी याखी माछान्ले। 11 होसे मास्च काम लकीङ ल्हेसार सेछ काम जाट्की पर्ले। होचे शान्तिकी पाकी पर्ले र होसकी न डुट्की पर्ले। 12 हीजैडेनाङ प्रभुये धर्मी भर्मीकोलाक वास्टा जाट्ले अनी होखुरीकुङ प्रार्थना सेले टर सुये दुष्ट काम जाट्ले होखुरीककी चहीँ होसकै विरोध जाट्ले।” 13 इडीक नाखुरीक सेछ काम जाट्च मीमन जाट्ले डेनाङ नाखुरीककी हानी जाट्च सु छान्ले र? 14 टर इडीक सेछ काम जाट्नाङ र डुख भोग्डीकी पर्या डेनाङ नाखुरीककी कुडीक आसीस याल्हे। होटबाटै सुखाटा र माबीर्हीनी र चीन्टा माजाट्नी। 15 टर नाखुरीकुङ जीवनाङ ख्रीष्टकी प्रभु मन्डीयार आदर जाट्नी। नाखुरीकुङ मीमन भीत्री लेच आशौ बारेयाङ सुयेर गीना डेनाङ होच्यौ उटर याखी टयार ङुनी। 16 टर उटर यान्हाङ नम्र छानार आदर जाटार ङाक्नी। नाखुरीकुङ बीबेक सफा डानी, होट छाना डेनाङ नाखुरीकुङ विरोधाङ ङाक्च र ख्रीष्टाङ नाखुरीकुङ सेछ चालचलन डाङार निन्दा जाट्चको मेखुरीक न काराम सेकी पर्ले। 17 मासेछ काम जाटार डुख भोग्डीकी डेनाङ सेछ काम जाटार परमेश्वरौ इच्छा अनुसार डुख भोग्डीकी झन सेम्ह हो। 18 हीजैडेनाङ ख्रीष्ट सधैँभरीकी ओल्छ जाट्न पापौ लागी काट चोटी सीम याहा। नाखुरीककी परमेश्वर लेठाङ टाहाक्की पापी मालेनाङ र पापीकुङ लागी सीम याहा। होसको भर्मीयो शरीराङ सीया, टर पवित्र आत्मा लकीङ जीउँडो छाना। 19 अनी होसकै इसे न पवित्र आत्मा लकीङ नुङार कैडाङ पर्च आत्माकोलाक प्रचार जाटा। 20 इसे भर्मीकुङ आत्माको चहीँ नुहै बाड्को जहाज खास्च बेलाङ पाप लकीङ ल्हेस्लेकी डेयार परमेश्वरै लेन्च आत्माको लेया। टर होखुरीकै परमेश्वरौ आज्ञा मामन्डीया। जहाज भीत्री लेच ठोरै भर्मीको जम्मा आठ जना मट्टै डी लकीङ जीवाम्या। 21 इसे डी बप्तिस्मा लाच काट चीन्ह हो, इचे नाखुरीककी जीवाटाक्ले। इसे जीवाङ पर्च री हुर्च लेखा होइन टर इसे शुद्ध बीबेकै परमेश्वरखाटा जाट्च बिन्ती हो। हीजैडेनाङ येशू ख्रीष्ट सीच लकीङ जीवाचबाटै बप्तिस्मै नाखुरीककी र जीवाटाक्ले। 22 होसको सीच लकीङ जीवाचपछी स्वर्गाङ नुङा र चाहाँ परमेश्वरौ डोरपट्टी ङुमने अनी पट्ट न स्वर्गदूत र स्वर्गाङ लेच अधिकार र शक्तिको होसकुङ अधिनाङ ले। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.