१ पट्रुस 1 - पुर्वीय मगर1 येशू ख्रीष्टौ प्रेरित छान्च ङा पत्रुसै पोन्टस, गलातीया, कापाडोकीया, एसीया र बिथनिया क्षेत्रकोवाङ परदेशी छानार टीटरबीटर छान्न ङुच परमेश्वरै चुन्डीच भर्मीकोलाक इसे चीठी रीक्ङन ले। 2 अघीलकीङ न लहो योजना अनुसार परमेश्वर बोये नाखुरीककी लहो न पवित्र भर्मीको छान्कीयो लागी चुन्डीच हो। येशू ख्रीष्टौ य्हुये पवित्र छानार होसकुङ न आज्ञा नाखुरीकै मन्डीकी य्होक्नी डेयार नाखुरीककी आत्मालकीङ लहौ खासा। नाखुरीकखाटा अनुग्रह र शान्ति प्रसस्त छान्न ङुख्यौ। जीबीट आशौ लागी परमेश्वरकी प्रशंसा 3 कानुङ प्रभु येशू ख्रीष्टौ बोइ परमेश्वरकी प्रशंसा। येशू ख्रीष्टकी सीचलकीङ जीवाटाकार बाड्को कृपा जाटा, र होसकै कानकी नयाँ जन्म याहा। इटबाटै कान बाड्को आशा डुपार जीवामे। 4 स्वर्गाङ परमेश्वर बोये सेन्र माघेरेल्च, सेन्र माबीगारीस्च र सेन्र माओइलडीस्च आसीस नाखुरीकुङ लागी टयार जाटार डाम याम्हने। 5 विश्वास जाट्च बाटै नाखुरीककी परमेश्वरौ शक्तिये जब सम्म मुक्ति माडुप्ले होडीक बेला सम्म जोगडीम डाले। होसे मुक्ति नाखुरीकुङ लागी टयार जाट्नने र समयौ अन्टीमाङ होसे डाङ्ले। 6 इसे कुराकोवाङ नाखुरीक मार्हाङ्नी, छान्कीयो लागी च चाँहा नाखुरीकै चेक्जा समयौ लागी खाल-खालुङ डुखको भोग्डीकी पर्नने। 7 नाखुरीकुङ विश्वासौ इसे जाँच चहीँ, होसे म्हेयाङ खारीयार जाँच्डीच टर कायाक नास छानार नुङ्च सुन डेनाङ र वास्टै मुल्यवान ले। होटबाटै इडीक नाखुरीकुङ विश्वास साँचो ले डेनाङ जब येशू ख्रीष्ट राल्हे टब होडीक बेला नाखुरीक प्रशंसा, महीमा र आदरौ योग्य छान्ले। 8 नाखुरीकै येशू ख्रीष्टकी माडाङ्नाङ र प्रेम जाट्नने। होसकोकी नाखुरीकै माडाङ्ने र पनी होसको मीटाक विश्वास जाट्नने। अनी बयान न जाट्की माय्होक्च बाड्को महीमीत आनन्दये नाखुरीकुङ मीमन न्हेप्मने। 9 हीजैडेनाङ नाखुरीकै होसको मीटाक विश्वास जाट्च बाटै नाखुरीकुङ आत्मै मुक्ति डुप्मने। 10 नाखुरीकै डुप्च इसे मुक्तियो बारेयाङ अगमवक्ताकै पा र छानबीन जाटा अनी परमेश्वरै नाखुरीककी याछ अनुग्रहौ बारेयाङ खायाक न डेम भ्यामन्या। 11 अगमवक्ताकुङ मीमन भीत्री लेच ख्रीष्टौ आत्मै ख्रीष्टै कुटजाट्न कष्टको भोग्डीकी पर्ले र होटै न्हुइङ कुटजाट्न बाड्को आदर डुप्ले डेयार अघीलकीङ न टान्हाक्ङ याम्हन्या। 12 होसे समयाङ परमेश्वरै अगमवक्ताकोलाक टान्हाक्च र होखुरीकै जाट्च होसे सेवा होखुरीकुङ फाइडौ लागी मालेया टर नाखुरीकुङ फाइडौ लागी लेया। अगमवक्ताकै प्रचार जाट्च सेछ समाचार स्वर्ग लकीङ बीर्न्हकाच पवित्र आत्मौ शक्तिलकीङ जाट्नन्या। स्वर्गदूतको र इसे कुरा डाङ्की खुब मीमन जाट्नने। पवित्र जीवन जीवाकी भाक्च 13 होटबाटै परमेश्वरौ काम जाट्कीयो लागी नाखुरीकुङ मीमन टयार खास्नी। होसीयार छान्नी र येशू ख्रीष्ट रान्हाङ नाखुरीकै डुप्च अनुग्रहाङ पुरा आशा डानी। 14 हीजैडेनाङ नाखुरीक परमेश्वरौ आज्ञाकारी बालखको हो होटबाटै पहीला हीर माव्हार्छ बेलाङ जाट्नाङ लेखा अब नाखुरीकै मासेछ कामको माजाट्की। 15 नाखुरीककी आर्घाच परमेश्वर पवित्र ले। होटबाटै नाखुरीक र नाखुरीकै जाट्च पट्ट न कामकुराङ पवित्र छान्नी। 16 धर्मशास्त्राङ इट डेयार रीक्ङने, “नाखुरीक पवित्र छान्नी, हीजैडेनाङ ङा पवित्र ले।” 17 प्रार्थना जाट्नाङ नाखुरीकै परमेश्वरकी बोइ डेयार पुकारीले। होसकै पट्ट न भर्मीकुङ लहा-लहे जाट्च काम अनुसार पक्षपात माजाट्न न्याय जाट्ले। होटबाटै जब सम्म नाखुरीक संसाराङ ङुले टब सम्म होसकुङ आदर जाट्च नाखुरीकुङ जीवन छान्ख्यौ। 18 हीजैडेनाङ नाखुरीककी ठाहा न ले, नाखुरीकुङ बोइ-बाज्युको लकीङ क्योस्न राछ व्यर्थौ रीटीठीटीको लकीङ नाखुरीककी छुटकारा यान्हाङ कुडीक बाड्को मोल टेरीकी पर्या। होसे सुन र चाँडी ल्याक्च नास छान्च ठोकको लकीङ डाम टेरीयार नाखुरीकै छुट्कारा डुप्च होइन। 19 टर नाखुरीककी ख्रीष्टौ बहुमुल्य य्हुये छुटकारा याहा। होसको हीर दोष मालेच र नीस्खोट भेडौ थुमा ल्याक्च न लेया। 20 परमेश्वरै होसकोकी संसार सृष्टि छान्की डेनाङ अघीलकीङ न चुन्डीमन्या, टर नाखुरीकुङ लागी इसे अन्टीम डीनकोवाङ होसको डाङा। 21 होसको लकीङ न नाखुरीकै परमेश्वर मीटाक विश्वास जाटा, सुये ख्रीष्टकी सीच लकीङ जीवाटाकार होसकोकी महीमीत पार्या। होटबाटै नाखुरीकुङ आशा र भरोसा परमेश्वर मीटाक ले। 22 अब नाखुरीकै सत्यकी पालना जाटार लहो मीमन शुद्ध पार्नने अनी विश्वासी डाजेभाइ र डै बहीनीकोलाक साँचो प्रेम जाट्नने। होटबाटै काटै काट्की भीत्री मीमन लकीङ न प्रेम जाट्नी। 23 परमेश्वरौ जीबीट बचन लकीङ नाखुरीकुङ नयाँ जन्म छान्नने, र होसे जीवन सधैँभरी ङुले। नाखुरीक नास छानार नुङ्च छोयौ सन्टानको होइन, टर सेन्र नास माछान्च परमेश्वरौ बचनौ छोयौ सन्टानको हो। 24 धर्मशास्त्रये डेले, “पट्ट भर्मीको घाँस ल्याक्च न ले अनी होखुरीकुङ इज्जट र जङ्गलुङ सार ल्याक्च न ले। घाँस ओइलडीसार नुङ्ले, सार झाल्की क्योट्ले, 25 टर प्रभुओ बचन सधैँभरी ङुम न ङुले।” अनी इसे प्रभुओ बचन न नाखुरीककी सेटाक्च सेछ समाचार हो। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.