१ युहन्ना 5 - पुर्वीय मगरदुष्ट संसारमीटाक कानुङ बीजय 1 येशू न मुक्ति याछ ख्रीष्ट हो डेयार विश्वास जाट्चको पट्ट न परमेश्वरौ मीजाको हो। अनी बोइकी प्रेम जाट्चकै होसकुङ मीजाकी र प्रेम जाट्ले। 2 जब कानै परमेश्वरकी प्रेम जाट्ले र होसकुङ आज्ञाको मन्डीले, टब इटै न थाहा डीन्ल्हे, की कानै परमेश्वरौ सन्टानकी प्रेम जाट्ले। 3 हीजैडेनाङ परमेश्वरौ आज्ञाको मन्डीकी न परमेश्वरकी प्रेम जाट्की हो। अनी होसकुङ आज्ञाको गार्हो माले। 4 हीजैडेनाङ परमेश्वरौ सन्टानको काट-काट जनै दुष्ट संसारकी जुकी य्होक्ले। कानुङ विश्वासै न कान संसारकी जुले। 5 दुष्ट संसारकी सुये जुकी य्होक्ले? येशूकी परमेश्वरौ मीजा हो डेयार सुइकार जाट्चये न संसारकी जुकी य्होक्ले। येसु ख्रीष्टौ साक्षीको 6 येशू ख्रीष्ट डीयाङ बप्तिस्मा लार अनी क्रुसाङ य्हु जोकाकार राहा, डी लकीङ मट्टै होइन, य्हु र डी लकीङ न राछ हो। इसे कुरा सत्य हो डेयार पवित्र आत्मै न साक्षी याल्हे हीजैडेनाङ पवित्र आत्मा सत्य ले। 7 सोम न साक्षीको ले: 8 आत्मा, डी र य्हु। इसे सोमै न काट्न खाल्या साक्षी याल्हे। 9 कानै भर्मीये याछ साक्षीकी विश्वास जाट्ले। टर भर्मीकुङ साक्षी डेनाङ परमेश्वरै याछ साक्षी झन महान ले। हीजैडेनाङ परमेश्वरै न लहो मीजौ बारेयाङ साक्षी याम्हने। 10 होटबाटै सुये परमेश्वरौ मीजा मीटाक विश्वास जाट्ले, होचे परमेश्वरै डेच कुराङ विश्वास जाट्ले। टर परमेश्वराङ विश्वास माजाट्चये चहीँ होसकुङ साक्षीकी न झुटो खास्ले। हीजैडेनाङ परमेश्वरै लहो मीजौ बारेयाङ याछ साक्षीकी होचे विश्वास माजाट्ले। 11 अनी साक्षी इसे न हो: परमेश्वरै कानकी सेन्र मासीच जीवन याम्हने, र इसे जीवन होसकुङ मीजाखाटा ले। 12 सुखाटा परमेश्वरौ मीजा ले, होसेखाटा सेन्र मासीच जीवन छान्ने, टर सुखाटा परमेश्वरौ मीजा माछान्ने, होसेखाटा सेन्र मासीच जीवन माछान्ने। सेन्र मासीच जीवन 13 सेन्र मासीच जीवन डुप्मने डेच कुरा नाखुरीकै अट वार्है डेम न परमेश्वरौ मीजा मीटाक विश्वास जाट्च नाखुरीककी ङा इसे चीठी रीक्ङन ले। 14 परमेश्वरौ अगाडी नुङ्नाङ कानुङ इसे न भरोसा ले: कानै होसकुङ इच्छा अनुसार ही ङेन्हाङ र होसकै कानुङ कुरा सेले। 15 कानै सेन ङेन्हाङ र होसकै कानुङ कुरा सेले। अनी इसे कुरा सत्य हो डेयार वार्छबाटै कानै इसे र वार्न्हने की होसको खाटा ही ङेम्हने होसे कुरा कानै डुप्मने। 16 इडीक सुयेर लहौ विश्वासी डाजेभाइको र डै बहीनीकै पाप जाट्च डाङ्ले, र होसे पापै मृत्युवाङ चहीँ माटाहाक्ले, होङ्च अवस्ठाङ होचे प्रार्थना जाट्न याख्यौ, र परमेश्वरै होसकी जीवन याल्हे। टर इसे चहीँ मृत्युवाङ माटाहाक्च पाप जाट्चकुङ लागी मट्टै हो। याङ्च पाप र छान्ले, होचे मृत्युवाङ टाहाक्ले, होच्यो लागी नाखुरीकै प्रार्थना जाट्न याखी पर्ले डेयार ङा माडेले। 17 पट्ट न मास्च काम जटी पाप हो, टर पट्ट न पापै मृत्युवाङ चहीँ माटाहाक्ले। 18 परमेश्वरौ सन्टानको सुयेर पाप जाट्न माङुले हीजैडेनाङ परमेश्वरौ मीजै होसकी सधैँ जोगडीयार डाले, र शैतानै होसकी हानी जाट्की न माय्होक्ले। इसे कुरा कानकी थाहा ले। 19 संसार न शैतानौ अधिनाङ लेनाङ र कान चहीँ परमेश्वरौ सन्टान हो डेच कुरा कानकी थाहा ले। 20 अनी परमेश्वरौ मीजा राहा र होसकै कानकी साँचो परमेश्वरकी चीन्डीच ज्ञान याहा। इसे कुरा कानकी थाहा ले। कान होसकुङ मीजा येशू ख्रीष्ट खाटा लेचबाटै साँचो परमेश्वर खाटा ले। होसको न साँचो परमेश्वर र सेन्र मासीच जीवन याछ हो। 21 मार्जा बालखको, नाखुरीक लहे लाहाकी मूर्तिको लकीङ लोस ङुनी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.