१ युहन्ना 4 - पुर्वीय मगरसाँचो र झुटो आत्मा 1 ङौ जाक्च लाफाको, ङा खाटा पवित्र आत्मा ले डेच पट्ट न भर्मीकोलाक नाखुरीकै विश्वास माजाट्की, टर होखुरीक खाटा लेच आत्मा परमेश्वर लकीङ राछ हो की होइन डेयार जाँच्डीकी। हीजैडेनाङ धेरै झुटो अगमवक्ताको इसे संसाराङ ख्योम्ह राम्हने। 2 येशू ख्रीष्ट भर्मी छानार संसाराङ राछ कुराकी सुइकार जाट्च आत्मा न परमेश्वर लकीङ राछ आत्मा हो। इटै न नाखुरीकै परमेश्वरौ आत्माकी चीन्डीले। 3 येशू भर्मी छानार राछ हो डेच कुराकी सुइकार माजाट्च आत्माको चहीँ परमेश्वर लकीङ राछ होइन। होखुरीक चहीँ ख्रीष्टौ विरोधी आत्माको हो। होसे राल्हे डेच कुरा नाखुरीकै सेमने र होसे चाहाँ न इसे संसाराङ राम्हभ्यामने। 4 ए ङौ मार्जा बालखको, नाखुरीक च परमेश्वरौ सन्टानको हो र नाखुरीकै झुटो अगमवक्ताकोलाक जुमने हीजैडेनाङ नाखुरीकखाटा लेच पवित्र आत्मा चहीँ संसारुङ भर्मीकोखाटा लेच आत्मा डेनाङ शक्तिसाली ले। 5 होखुरीक संसारुङ हो, होटबाटै संसारुङ न कुरा ङाक्ले र होखुरीकै ङाक्च कुरा संसारुङ न भर्मीकै सेले। 6 टर काल्हाको च परमेश्वरौ हो र सुये परमेश्वरकी चीन्डीमने, होचे कानुङ कुरा सेले। सु परमेश्वरौ भर्मी होइन, होचे कानुङ कुरा मासेले। इटै न कानै साँचो आत्मा र झुटो आत्मा भाक्की य्होक्ले। परमेश्वर न प्रेम हो 7 ङौ जाक्च लाफाको, काल्हाको काटै काट्की प्रेम जाटीङ हीजैडेनाङ प्रेम चहीँ परमेश्वर लकीङ राछ हो। सुये प्रेम जाट्ले होसे परमेश्वर लकीङ जन्मडीस्च मीजाको हो र होचे परमेश्वरकी चीन्डीले। 8 सुये प्रेम माजाट्ले, होचे परमेश्वरकी माचीन्डीले, हीजैडेनाङ परमेश्वर प्रेम हो। 9 परमेश्वरै काल्हाकी लहो प्रेम इटजाट्न टान्हाका, की होसकुङ मीजा लकीङ कानै सेन्र मासीच जीवन डुप्ख्यौ डेयार होसकै लहो काट्जा मीजाकी र संसाराङ बीर्न्हका। 10 साँचो प्रेम इसेन हो: कानै परमेश्वरकी प्रेम जाट्च होइन, टर होसकै कानकी प्रेम जाटा र कानुङ पापौ बलीडान छान्कीयो लागी लहो मीजाकी संसाराङ बीर्न्हका। 11 ङौ जाक्च लाफाको, परमेश्वरै कानकी याङ्च प्रेम जाट्च बाटै कानै र काटै काट्की प्रेम जाट्की पर्ले। 12 सुयेर सेन्र परमेश्वरकी माडाङ्ङने। टर इडीक कानै काटै काट्की प्रेम जाटा डेनाङ परमेश्वर कान भीत्री ङुले र होसकुङ प्रेम कानखाटा पुरा छान्ले। 13 इटजाट्न काल्हा परमेश्वर खाटा छान्ले अनी होसको र काल्हा खाटा छान्ले डेच थाहा छान्ले, हीजैडेनाङ होसकै कानकी लहौ पवित्र आत्मा याम्हने। 14 परमेश्वर बोये लहो मीजाकी संसाराङ मुक्ति याखी बीर्न्हकाच कानै डाङा, र होच्यो न कान साक्षी याल्हे। 15 सुये येशूकी परमेश्वरौ मीजा हो डेयार सुइकार जाट्ले, होसेखाटा परमेश्वर ङुले, अनी होसे र परमेश्वर खाटा ङुले। 16 काल्हाको लहे र परमेश्वरै कानकी प्रेम जाट्च कुरा बुझडीस्ले र इला न भरोसा जाट्ले। परमेश्वर प्रेम हो, अनी प्रेमाङ लक्डीस्न ङुच भर्मी परमेश्वर खाटा ङुले र परमेश्वर होसे खाटा ङुले। 17 इटजाट्न न कानुङ मीघ्याङ परमेश्वरौ प्रेम पुरा छान्ने र न्यायौ डीनाङ काल्हाको बीर्हीखी मापर्ले हीजैडेनाङ ख्रीष्ट कुङ्च ले, कान र इसे संसाराङ होङ्च न ले। 18 प्रेमाङ बीर्हीमसेच कुरा माछान्ने। टर पुरा छान्च प्रेमै पट्ट न बीर्हीमसेच कुराको हटडीले, हीजैडेनाङ बीर्हीमसेच कुरौ सम्बन्ध च दण्डखाटा छान्ने। होटबाटै बीर्हीछ भर्मीयाङ चहीँ पुरा प्रेम माछान्ने। 19 काल्हाको परमेश्वरकी प्रेम जाट्ले, हीजैडेनाङ पहीला होसकै न कानकी प्रेम जाटा। 20 इडीक सुयेर “ङा परमेश्वरकी प्रेम जाट्ले” डेले, टर लहो डाजेभाइको र डै बहीनीकोलाक हेला जाट्ले डेनाङ होसे झुटो हो। हीजैडेनाङ लहे डाङ्च लहौ डाजेभाइको र डै बहीनीकोलाक न प्रेम माजाट्चये झन माडाङ्च परमेश्वरकी कुटजाट्न प्रेम जाट्की य्होक्ले? 21 अनी सुये परमेश्वरकी प्रेम जाट्ले, होचे लहो डाजेभाइको र डै बहीनीकोलाक र प्रेम जाट्की पर्ले। ख्रीष्टै कानकी याछ आज्ञा इसे न हो। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.