१ युहन्ना 3 - पुर्वीय मगरपरमेश्वरौ मीजाको 1 ङोस्नी, परमेश्वर बोये काल्हाकी कुडीक धेरै प्रेम जाट्नने! होसकुङ प्रेमौ कारनै न काल्हाको परमेश्वरौ मीजाको डेयार चीन्डीमने, अनी चीन्डीच मट्टै होइन साँच्ची न मीजाको हो। टर संसारुङ भर्मीकै काल्हाकी माचीन्डीले, हीजैडेनाङ होखुरीकै परमेश्वरकी माचीन्डीया। 2 ङौ जाक्च लाफाको, चाँहा चहीँ काल्हाको परमेश्वरौ न मीजाको हो। टर पीहीन ही छान्ने, होसे च कानकी थाहा माले। टर इडीक कुरा वार्ल्हे, जब ख्रीष्ट राल्हे, टब कान र होसको ल्याक्च न छान्ले, हीजैडेनाङ होसको कुङ्च ले, कानै होङ्च न होसकोकी डाङ्ले। 3 अनी ख्रीष्ट मीटाक इसे आशा डाच काट-काट जना भर्मीये कुटजाट्न होसको पवित्र ले, होटजाट्न न लाहाकी पवित्र खास्ले। 4 पाप जाट्न ङुच भर्मीये व्यवस्था भङ्ग जाट्ले, हीजैडेनाङ व्यवस्था भङ्ग जाट्की न पाप हो। 5 नाखुरीककी थाहा ले की कानुङ पाप मेट्डीकीयो लागी न ख्रीष्ट संसाराङ राहा। होसको खाटा पाप न माले। 6 होटबाटै ख्रीष्ट खाटा लेच भर्मीये सधैँ पाप जाट्न माङुले। पाप जाट्न ङुचये चहीँ न ट होसकोकी डाङ्ले न ट चीन्डीले। 7 मार्जा बालखको, सुयेर नाखुरीककी ढाट्डीकी माडीन्ख्यौ! ठीक काम जाट्च भर्मी न ख्रीष्ट ल्याक्च धर्मी ठहरीस्ले। 8 पाप जाट्न ङुच चहीँ शैतानौ भर्मी हो। शैतानै सुरुलकीङ न पाप जाट्न राम्हने। होटबाटै शैतानौ कामकी नास जाट्की डेम परमेश्वरौ मीजा संसाराङ राछ हो। 9 परमेश्वरौ सन्टानकै पाप जाट्न माङुले हीजैडेनाङ होसेखाटा परमेश्वरौ स्वभाव छान्ने। होचे पाप जाट्न ङुकी माय्होक्ले हीजैडेनाङ होसे परमेश्वरौ मीजाको हो। 10 परमेश्वरौ मीजाको र शैतानौ मीजाको इटैन चीन्डीकी य्होक्ले, की परमेश्वरौ अघी ठीक काम माजाट्च र लहो विश्वासी डाजेभाइको र डै बहीनीकोलाक प्रेम माजाट्च चहीँ परमेश्वरौ सन्टान होइन। काटै काट्की प्रेम जाट्नी 11 नाखुरीकै सुरुलकीङ न सेच खबर इसे न हो, “काल्है, काटै काट्की प्रेम जाट्की पर्ले।” 12 नाखुरीक कयीन ल्याक्च छान्की माछान्ने। होसे शैतानलकीङ राछ भर्मी लेया र होचे लहो भाइ हाबीलकी साटा। होचे लहो भाइकी हीजै साटा? हीजैडेनाङ होच्यौ कामको दुष्ट लेया, टर भायो कामको चहीँ असल लेया। 13 डाजेभाइको र डै बहीनीको, इडीक संसारुङ भर्मीकै नाखुरीककी हेला जाट्ले डेनाङ अचम्म मामन्डीकी। 14 कानकी थाहा ले, काल्हाको च मृत्युलकीङ जीवनाङ सरीस्न भ्यामने, हीजैडेनाङ कानुङ विश्वासी डाजेभाइको र डै बहीनीकोलाक कान प्रेम जाट्ले। सुये प्रेम माजाट्ले होसे मृत्युओ बन्धनाङ न छान्ले। 15 लहो विश्वासी डाजेभाइको र डै बहीनीकोलाक हेला जाट्च चहीँ ज्यानमारा हो, अनी कुसेर ज्यानमारा खाटा सेन्र मासीच जीवन माङुले डेच कुरा च नाखुरीककी थाहा ले। 16 येशू ख्रीष्टै कानुङ लागी लहो परान याहा। इटै न कानै प्रेम ही हो डेच कुरा बुझडीस्की य्होक्ले। अनी कानै र लहो विश्वासी डाजेभाइको र डै बहीनीकुङ लागी लहो प्राण याखी पर्ले। 17 इडीक सुर खाटा संसारुङ धन-सम्पत्ति लेनाङ र होचे लहो विश्वासी डाजेभाइको र डै बहीनीकुङ खाँचो डाङ्नाङ र मीमन कठोर जाट्ले डेनाङ, परमेश्वरौ प्रेम होसेखाटा कुटजाट्न ङुले? 18 बालखको, कानै मेङेर अठबा कुरै मट्टै प्रेम माजाटीङ, टर काम लकीङ अनी सत्यताङ प्रेम जाटीङ। परमेश्वरौ म्याहासाङ साहस 19 होटबाटै, इटजाट्न न काल्है काटै काटकी प्रेम जाटा डेनाङ इटै न काल्हाको सत्यौ भर्मीको हो डेम वार्ल्हे, र इटजाट्न परमेश्वरौ म्याहासाङ कानै काल्हौ मीमनकी साहस याखी य्होक्ले। 20 कानुङ मीमनै काल्हाकी डोस लैडीनाङ र काल्है वार्खी पर्ले, की परमेश्वर च काल्हौ मीमन डेनाङ बाड्को ले। होसकै पट्ट न कुरा वार्ल्हे। 21 ङौ जाक्च लाफाको, इडीक कानुङ मीमनै काल्हाकी डोस मालैडीया डेनाङ च काल्हाकी परमेश्वरौ अघी नुङ्की आट राल्हे। 22 अनी काल्है ही ङेल्हे, होसे होसकै काल्हाकी याल्हे, हीजैडेनाङ कानै होसकुङ आज्ञा मन्डीले र होसकोकी जाक्ङ सेच कामको जाट्ले। 23 होसकुङ आज्ञा चहीँ परमेश्वरौ मीजा येशू ख्रीष्टौ म्यार्मीनाङ विश्वास जाट्की र ख्रीष्टै याछ आज्ञा अनुसार काटै काट्की प्रेम जाट्की न हो। 24 अनी परमेश्वरौ आज्ञाको मन्डीच भर्मी चहीँ परमेश्वर खाटा छान्ने, र परमेश्वर होसे खाटा छान्ने। इटजाट्न परमेश्वर कानखाटा छान्ने डेच कुरा होसकै याछ पवित्र आत्मा लकीङ न कानै वार्खी य्होक्ले। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.