१ युहन्ना 2 - पुर्वीय मगरख्रीष्ट काल्हौ सहायता 1 ङौ मार्जा बालखको, नाखुरीकै पाप माजाट्नी डेयार ङा इसे कुराको नाखुरीककी रीक्ङन ले। टर इडीक सुयेर पाप जाट्की क्योटा डेनाङ र कानुङ पक्षाङ परमेश्वर बोइ खाटा बिन्ती जाट्न याछ काट जना धार्मिक येशू ख्रीष्ट कानखाटा ले। 2 होसको कानुङ पाप मेट्डीकी डेम बलीडान छाना। कानुङ लागी मट्टै होइन, टर संसारुङ पट्ट न भर्मीकुङ पापौ लागी र हो। 3 इडीक कानै परमेश्वरौ आज्ञाको मन्डीमने डेनाङ इटै न थाहा छान्ले की साँच्ची न कानै होसकोकी चीन्डीमनेसा। 4 सुये “ङा परमेश्वरकी चीन्डीले” डेले, टर होसकुङ आज्ञाको मामन्डीले डेनाङ होसे झुटो हो, र होसे खाटा सत्य माछान्ले। 5 टर सुये परमेश्वरौ बचन मन्डीले, होचे परमेश्वरकी पुरा माया जाट्च छान्ले। इटै न कान होसको खाटा ले डेच कुरा थाहा छान्ले। 6 परमेश्वर खाटा ले डेच भर्मीये येशूओ ल्याक्च न चालचलनाङ व्हाकी पर्ले। नयाँ आज्ञा 7 ङौ जाक्च लाफाको, नाखुरीककी रीक्च इसे आज्ञा नयाँ होइन। टर इसे सुरुलकीङ न नाखुरीक खाटा लेच पुरानो आज्ञा न हो। इसे पुरानो आज्ञा नाखुरीकै पहीला न सेम भ्याच बचन हो। 8 टै पनी काट नयाँ आज्ञा ङा नाखुरीककी रीक्ङन ले। इच्यो सत्य ख्रीष्टाङ र नाखुरीक खाटा डाङ्ङने। हीजैडेनाङ छुम्छ म्हाट्न न ले, टर अघी न ज्योति चम्कडीस्न भ्यामने। 9 इडीक सुये “ङा ज्योतियाङ ले” डेले टर होचे लहो डाजेभाइको र डै बहीनीकोलाक हेला जाट्ले डेनाङ होसे अझै र छुम्ठाङ न ले। 10 टर सुये लहो डाजेभाइको र डै बहीनीकोलाक माया जाट्ले, होसे ज्योतियाङ छान्ले र लाहाकी बाँढा छान्च हीर कुरा होसे खाटा माछान्ले। 11 टर लहो डाजेभाइको र डै बहीनीकोलाक हेला जाट्च चहीँ छुम्ठाङ छान्ले। अनी छुम्ठाङ व्हानाङ कुलाक नुङ्ङन ले, डेच कुरा होसकी थाहा माछान्ले, हीजैडेनाङ छुम्छये जाट्नाङ होसकी डाङ्की माय्होक्च खास्न भ्याच छान्ने। 12 ङौ मार्जा बालखको, ख्रीष्टौ म्यार्मीनौ लागी नाखुरीकुङ पाप क्षमा छान्च बाटै नाखुरीककी ङा इसे कुराको रीक्ङन ले। 13 बोइको, सुरुलकीङ न लेच ख्रीष्टकी नाखुरीकै चीन्डीले होटबाटै ङा नाखुरीककी रीक्ङन ले। जवान भर्मीको, नाखुरीकै दुष्ट शैतानकी जुमने होटबाटै ङा नाखुरीककी रीक्ङन ले। 14 ङौ बालख मीजाको, ङा नाखुरीककी रीक्ङन ले, हीजैडेनाङ सुरुलकीङ न लेच होसकोकी नाखुरीक चीन्डीले। जवान भर्मीको, ङा नाखुरीककी रीक्ङन ले, हीजैडेनाङ नाखुरीक बलीयो ले अनी परमेश्वरौ बचन नाखुरीक खाटा ले, र नाखुरीकै होसे दुष्टकी जुमने। 15 संसार र होला लेच कुसे कुराकी र माया माजाट्नी। सुये संसारकी माया जाट्ले, होचे परमेश्वर बोइकी माया जाट्की माय्होक्ले। 16 हीजैडेनाङ संसाराङ लेच पट्ट न कुराको, मीमीकौ लोभ, जीवनौ सेखी, शरीरौ मास्च इच्छा इसे कुराको चहीँ परमेश्वर बोइ लकीङ राछ होइन टर संसार लकीङ राछ हो। 17 संसार र होलुङ खराब कुराको सु भर्मीये चाहाना जाट्ले होसे नास छानार नुङ्ले र होच्यो मास्च इच्छाको र नास छानार नुङ्ले, टर परमेश्वरौ इच्छाङ व्हाच भर्मी चहीँ सधैँभरीयो लागी ङुमङुले। ख्रीष्टौ विरोधी 18 ङौ मार्जा बालखको, इसे अन्टीम समय हो। ख्रीष्टौ विरोधी राम्हन ले डेच कुरा नाखुरीकै सेमने। ख्रीष्टौ धेरै विरोधीको च अघी न राम्हने। होटबाटै इटै न कान वार्ल्हे, की इसे अन्टीम समय हो। 19 होखुरीक कानुङ मालेया, होटबाटै कानकी डासार नुङा। इडीक कानुङ लेनाङ च कानखाटा न ङुच लेया। होखुरीकै कानकी डासार नुङा अनी होसेलकीङ न होखुरीक कानुङ होइन डेच कुरा टान्हाक्ले। 20 टर नाखुरीककी चहीँ ख्रीष्टै पवित्र आत्मा याम्हने, र नाखुरीक पट्टकै सत्य वार्न्हने। 21 नाखुरीकै सत्यकी माचीन्डीमे डेयार ङै रीक्च होइन, टर नाखुरीकै सत्यकी चीन्डीच बाटै न रीक्च हो। सत्यलकीङ हीर झुटो माख्योले डेच कुरा र नाखुरीककी थाहा ले। 22 अनी झुटो सु हो ट? येशू न मुक्ति याछ ख्रीष्ट हो डेच कुरा इन्कार जाट्च भर्मी न झुटो हो। होङ्च भर्मी न मुक्ति याछ ख्रीष्टौ विरोधी हो। होचे परमेश्वर बोइ र मीजा नीसकी न इन्कार जाट्ले। 23 मीजाकी इन्कार जाट्च कुसेर भर्मी खाटा परमेश्वर बोइ माङुले। सुये मीजाकी सुइकार जाट्ले, होसे खाटा परमेश्वर बोइ र ङुले। 24 होटबाटै कुसे शिक्षा नाखुरीकै सुरुलकीङ न सेमने, होसे नाखुरीकुङ रीदयाङ डानी। इडीक नाखुरीकै सेच शिक्षा नाखुरीकुङ रीडयाङ ले डेनाङ नाखुरीक र परमेश्वर बोइ र होसकुङ मीजाखाटा ङुले। 25 अनी मीजै याल्हे डेयार काल्हा खाटा जाट्च प्रतिज्ञा चहीँ सेन्र मासीच जीवन न हो। 26 ङा इसे पट्ट न कुरा नाखुरीककी झुटो ङाकार बहकडीकी पाच भर्मीकुङ बारेयाङ रीक्ङन ले। 27 टर ख्रीष्टै लहो पवित्र आत्मा नाखुरीककी याम्हने। होसे पवित्र आत्मा सधैँ नाखुरीक खाटा ङुले, अनी नाखुरीककी सुयेर पाहाक्की मापर्ले। पवित्र आत्मै न नाखुरीककी पट्ट न कुराको पाहाक्ले। होसकै पाहाक्च कुरा सत्य छान्ले, झुटो माछान्ले। होटबाटै पवित्र आत्मै पाहाक्च शिक्षा मन्डीयार ख्रीष्ट खाटा ङुनी। 28 अब मार्जा बालखको, होसको खाटा ङुनी टा की होसकोकी डाङ्नाङ कानै हीम्मट डुप्ले, अनी होसको रान्हाङ होसकुङ म्याहासाङ कानै काराम सेकी मापार्ले। 29 इडीक ख्रीष्ट धर्मी ले डेच कुरा नाखुरीकै वार्हा डेनाङ, नाखुरीकै इसे कुरा र वार्ल्हे की ठीक काम जाट्च काट-काट जना भर्मी परमेश्वरौ मीजाको हो। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.