YUDA 1 - Embimbiliya - Bíblia Sagrada em Umbundu

¹ Ame ndi Yuda, ndukuenje wa Yesu Kristu, haime ndu manji a Tiago; Ñasi loku sonehela ava va kovongiwa, haivo va soliwa la Suku Isia, kuenda va laviwila Yesu Kristu.

² Ohenda lombembua locisola ci love kokuene.

³ A vakuacisola, nda kaile lutima woku vu sonehela oku vangula lene ondaka yeyovo lietu, puãi nda vetiwa onjanga yoku vu sonehela loku vu peya okuti vu yakela ekolelo lina lia eciwa olumue ku vakuetavo.

⁴ Momo omanu vamue va iñila ño vekongelo latutu. Episo liavo lia va sokiyiwila ale osimbu. Omanu vaco vakuakutomba Suku, haivo va pengisa ocali ca Suku yetu okuti ca va iha evelo lioku lingainga upuepue, kuenje va likala Yesu Kristu, eye lika Cime cetu, haeye Ñala yetu.

⁵ Kaliye, ndaño wa kũlĩhi ale ovina evi viosi, haimo njongola oku wivaluisi okuti, una wa popela omanu kofeka ye Egito haeye, noke, wa nyõla vali ava ka va tavele.

⁶ Kuenda vali, ovangelo vana ka va lavele olomangu viavo, puãi va tunda kocitumalo cavo, wa va kapa alienge ka a pui kuenje wa va yikila vowelema wonjembo toke kekanga lieteke linene.

⁷ Kuenda vali, ovaimbo a Sodomo la Gomora, lovaimbo akuavo a lisungue lao, omo a lieca kukahonga loku kuama ovilinga viumbondo lupuepue, ndeci omanu vaco va kasi loku linga, cilo a linga elungulo, momo a kasi loku yambuiwa londalu ka yi pui.

⁸ Haico alume vaco, vovilivelo viavo, va vihisa atimba avo, kuenje va pembula olombiali, loku sepula oviendalomuenyo viaspiritu ulamba.

⁹ Puãi, ndaño ungelo unene, Mingeli, eci a liyaka leliapu omo va lipatãlela etimba lia Mose, ka lukutile oku u pisa londaka yesepu, puãi wa popia hati, Ñala a ku lemele eye.

¹⁰ Ava puãi, va sepula ovina viosi ka via va lombolokele, kuenje ovina va limbuka ño ndeci ovinyama ka vi kuete olondunge vi vi limbuka, ovio va nyõliwa lavio.

¹¹ Ngongo yavo! Momo va kuama onjila ya Kaini, va yolekela kokulueya kua Balama ha va limuisa ovipako, kuenje va nyõliwa lokuñualelapo Suku, ndeci Kora a nyõliwa lakuo.

¹² Omanu vaco va linga ndatime kolofesta viene viocisola. Ka va kuete osõi yoku linga ño ovombondo avo osi, ndaño va kasi loku lia kumue lene. Ka va sokolola vali umue ukuavo, te oku lisokolola ovo muẽle lika. Omanu vaco alende ka a kuete ovava, kuenje a pungua ño lofela, haivo oviti via loluka, ka vi kuete apako, via fa luvali, via tukũka,

¹³ haivo akimba okalunga a tema, hao a tumõha efelefele liosõi yao, haivo olombungululu vi tungayala ño, lokutekava kuowelema ko pui kua vi pongiyiwila.

¹⁴ Ava ovo vana Enoke, una ukuacitumbulukila cepanduvali tunde ku Adama, a imbila owanji, eci a linga hati, Tala! Ñala weya lolohũlũkai via lua violosandu viaye.

¹⁵ Weyilila oku tetuluila vosi, loku pisa vosi va tomba Suku. Wa va pisila ovilinga viosi vietombo va lingila oku tomba Suku. Wa va pisilavo ovina viosi vĩvi via popia vakuakandu va tomba tomba Suku.

¹⁶ Omanu vaco vakuakuñuñula, haivo vakuakulisiõsiõla. Va kuama kuama oloñeyi viavo. Ovimẽla viavo vi popia popia oku lipanda. Va sumbilila omanu okuti va likokela oku kuatisiwa locame.

¹⁷ Ene puãi a vakuacisola, ivaluki olondaka via popiwa lovapostolo va Ñala yetu Yesu Kristu.

¹⁸ Va popia lene vati, Kotembo yesulilo ku kala vakuesepu va kuama oloñeyi viavo vĩvi, haivio vi tombisa Suku.

¹⁹ Ava, ovo va koka olonepele, haivo va kuama ño-o oloñeyi vietimba ndovinyama, ka va kuete Espiritu.

²⁰ Ene puãi, a vakuacisola, lipamisi lekolelo liene li kola. Likutilili ve Espiritu Sandu.

²¹ Kali vocisola ca Suku. Feleveli ohenda ya Ñala yetu Yesu Kristu yu neneli omuenyo ko pui.

²² Tavisi vamue vakuatatahãi pokati kavo.

²³ Popeli vamue loku vopa vondalu. Kuateli vamue ohenda lohele, loku suvuka uwalo wa vĩhisua lakandu etimba.

²⁴ Kaliye, kuna o tẽla oku u lavi okuti ka vu lipundoka, loku u talamisi kovaso ulamba waye lesanju lia lua kuenda loku pua atondelo,

²⁵ okuti ku Suku, eye lika Suku, haeye Upopeli wetu wa tu popela leka lia Ñala yetu Yesu Kristu, kokuaye ku kale ulamba luwale luviali lunene, tunde kuna ka kua kaile otembo, la cilo, kuenda toke koloneke vi enda ño-o hũ. Amene.